“Andam na alang sa Akong Patriyarkal nga Panalangin,” Alang sa Kalig-on sa mga Kabatan-onan, Ago. 2023.
Andam na alang sa Akong Patriyarkal nga Panalangin
Ang kabatan-onan mipakigbahin kon giunsa nila pagkahibalo nga sakto na ang panahon.
Paghulagway pinaagi ni Valentina Sumano
“Sa tinuod lang nanlimbasog gyod ko sa pipila ka bulan aron mahibalo sa saktong panahon. Namalandong ug nag-ampo ko matag gabii. Paglabay sa pipila ka bulan, ang akong bishop nangutana kon duna na ba koy patriyarkal nga panalangin. Miingon ko nga wala pa, ug siya miingon, ‘OK! Interbiyohon ka nako human sa pagsimba karon!’ Human sa pagpakigsulti sa akong bishop, mibati ko nga andam na nga modawat sa akong patriyarkal nga panalangin. Akong naamgohan nga ang pangutana sa akong bishop mao ang tubag niadtong akong mga pag-ampo nga akong gibati nga wala tubaga.”
Makaya S., Texas, USA, nakadawat sa panalangin sa edad nga 15
“Mobalhin ko gikan sa akong pinuy-anan ug wala mahibalo asa ko dad-on sa akong kapalaran. Nagkinahanglan ko sa tabang sa Dios!”
Clarissa B., Washington, USA, nakadawat sa panalangin sa edad nga 13
“Nag-ampo ko sa wala pa ang kinatibuk-ang komperensiya aron mahibalo kon andam na ba ko, ug morag ang matag pakigpulong miawhag nako nga mokuha og patriyarkal nga panalangin.”
Duncan J., Utah, USA, nakadawat sa panalangin sa edad nga 17
“Usa ka higala mipakigbahin nga sa panagtigom alang sa sakramento naka-ideya siya nga mokuha sa iyang patriyarkal nga panalangin. Pagkasunod Dominggo, miabot ang sama nga ideya sa akong hunahuna, apan mibati ko nga dili takos. Mao nga akong gitrabaho ang akong katakos hangtod nga nakadawat ko sa akong panalangin. Sa usa ka kamping sa kabatan-onan, mipakigbahin ko sa akong pagpamatuod bahin sa patriyarkal nga mga panalangin, nga nakadasig sa usa ka higala aron makadawat sa iyang panalangin. Dayon kining tibuok nga istorya nakadasig sa akong igsoong lalaki sa pagpangandam aron makadawat sa iyaha!”
Theodor W., Switzerland, nakadawat sa panalangin sa edad nga 17
“Nagsugod ko sa paghunahuna bahin niini sa daghang higayon, ug dayon migahin ko og panahon sa pag-ampo ug pagpakig-istorya sa akong mga ginikanan.”
Arial C., Idaho, USA, nakadawat sa panalangin sa edad nga 17
“Nagtinguha ko niini! Wala koy pipila ka dagkong kasinatian. Naghunahuna lang ko bahin niini, gusto ko niini, ug mibati nga sakto kini.”
Zeeli H., Utah, USA, nakadawat sa panalangin sa edad nga 16
“Nangayo ko og giya sa Dios, ug Siya mitubag nga ang patriyarkal nga panalangin makatabang nako.”
Marcelo T., Philippines, nakadawat sa panalangin sa edad nga 18
“Nagsige ko og hunahuna bahin niini! Dayon ang leksiyon sa seminary nag-ingon, ‘Kon naghunahuna ka niini, tingali panahon na.’”
Bethanie C., Utah, USA, nakadawat sa panalangin sa edad nga 15
“Nakadesisyon ko nga magkuha sa akong patriyarkal nga panalangin human sa sinsero nga pag-ampo uban sa tinguha nga makabaton og panabot gikan sa Dios.”
Dustin H., Maryland, USA, nakadawat sa panalangin sa edad nga 17
“Nag-ampo ko alang sa tabang human sa lisod gayod nga gabii. Human sa pag-ampo, mibati ko niining makatandog nga pagbati nga ‘Ikaw kinahanglan nga mokuha sa imong panalangin.’”
Cambrie D., Utah, USA, nakadawat sa panalangin sa edad nga 16
“Dili ko segurado kon andam na ba ko nga modawat sa akong patriyarkal nga panalangin, apan usa ka gabii miluhod ko ug nag-ampo bahin niini. Dihadiha dayon akong gibati ang kalipay ug kalinaw.”
Jocelyn R., Utah, USA, nakadawat sa panalangin sa edad nga 12
“Sa seminary ang mga tawo mangutana bahin sa patriyarkal nga mga panalangin, ug gibati nako nga ang pagbaton niini makatabang nako sa hayiskol.”
Mason S., Arizona, USA, nakadawat sa panalangin sa edad nga 14