“Ang Yawe sa Tinuod nga Kausaban,” Alang sa Kalig-on sa mga Kabatan-onan, Ago. 2023.
Ang Yawe sa Tinuod nga Kausaban
Ang tinuod ug malungtaron nga kausaban posible, apan dili nato kini mahimo nga kita ra.
Pagka-high school misuway kog bugsay. Mura kini og sayon ra—maglingkod sa sakayan ug lihokon ang timon aron modagan og kusog sa tubig. Wala gyod koy ideya unsay akong giapilan.
Sa makadiyot, dili nako mabalanse ang sakayan, ug ang paggamit nako sa timon nakapahunong hinoon imbis maayo kaayo ang paglawig sa tubig.
Ngadto-ngadto, akong giusab ang pagbalanse nako sa sakayan ug pagdala sa timon. Hinayhinay nakong gihimo ang mga kausaban ug milambo—kasagaran nga wala lang damha. Dayon ang pagbugsay nahimong makalingaw! Ganahan kaayo ko sa makahupay nga lihok sa pagbugsay dihang midailos ko og dali ug sa hilom ngadto sa tubig.
Ang paghimo og positibo nga mga kausaban—bisan ang pinakagamay—wala lamang nagtabang sa kalingawan sama sa pagbugsay apan usab ang pagkahimo kon si kinsa gayod kita.
Apan ang kausaban dili sayon kanunay.
Ania Kita aron Mausab
Nakasulay na ba kamo sa usa niining mga hunahuna samtang naninguha sa paghimo og mga kausaban sa inyong kinabuhi:
“Oh pastilan, nakahimo na usab ko og sama nga sayop! Unsa na lang gyod ko kahuyang?”
“Ako walay bili.”
“Daghan na kaayo ko og sala nga dili na mapasaylo.”
Mga hunahuna sama niini makahimo sa kausaban nga daw imposible. Apan nia kita niini nga kinabuhi aron sa pag-usab ug pag-uswag. Ang tinuod ug malungtaron nga kausaban posible gayod, apan dili ta makahimo niini nga mag-inusara.
Si Presidente M. Russell Ballard, Akting nga Presidente sa Korum sa Napulog Duha ka Apostoles, miingon, “May nabantayan ka ba nga usa ka butang sa imong kinabuhi nga dili kaayo nimo gusto? … Kon may nahibaloan ka nga mga butang sa imong kinabuhi nga dili nimo ganahan, hangyoa ang imong Langitnong Amahan alang sa tabang ug imong makaplagan ang sulod nga kalig-on sa pag-usab.”1
Ang kalig-on sa pag-usab moabot pinaagi ni Jesukristo ug sa Iyang Pag-ula.
Paghulagway ni Kristo ni Judith A. Mehr
Kristohanon nga mga Kinaiya: Usa ka Giya alang sa Kausaban
Ang Manluluwas nagpakita kanato sa labing maayo nga paagi sa pagpakabuhi. Siya naghangyo kanato sa pagsunod Kaniya ug mahimong sama nga Siya mao (tan-awa sa 3 Nephi 27:27). Kita makahimo niini pinaagi sa pagtuon sa Iyang kinabuhi ug mga hiyas.
Ang mga kasulatan naghulagway sa mga hiyas nga Kristohanon, lakip ang hugot nga pagtuo, paglaom, gugma nga putli ug pagmahal, hiyas, kahibalo, pasensya, pagpaubos, pagkugi, ug pagkamasulondon.2 Si Elder Dieter F. Uchtdorf sa Korum sa Napulog Duha ka Apostoles mitudlo nga samtang makugihon ug mainampoon kitang mangita sa pagpalambo sa atong Kristohanong mga hiyas, “ang Manluluwas mopanalangin kanato lapas pa sa atong kaugalingong kapasidad sa paghimo sa unsay gusto Niya nga kita mahimo.”3
Hangopa ang Kahigayonan nga Mausab
Kinahanglan kong maghimo og mga kausaban kon gusto nakong makabugsay og maayo. Diha lang niana nga makasinati ko sa hingpit nga kalipay nga gidalit sa pagbugsay.
Alang nato aron makasinati kon unsa ang kinabuhi—bisan mahangturon nga kinabuhi—ang gidalit, ang Manluluwas wala maghangyo kanato sa pagtugyan sa atong pagkatawo para lang sa kausaban. Siya naghangyo nga atong usbon ang unsay kinahanglan nga usbon aron makapaduol ngadto Kaniya.
Mao kini ang paghinulsol. Si Presidente Russell M. Nelson mitudlo: “Kon kita mopili nga maghinulsol, kita mopili nga mag-usab! Atong tugotan ang Manluluwas nga mousab kanato ngadto sa labing maayo nga bersyon sa atong mga kaugalingon. … Kon kita mopili nga maghinulsol, kita mopili nga mas mahisama ni Jesukristo!”4
Ang Manluluwas mihatag sa Iyang kinabuhi aron Siya makatabang kanimo sa paghangop sa talagsaong kahigayonan nga anaa kanimo aron mausab ug mahimong tanan nga gusto Niya ug nasayod nga ikaw mamahimo.