“Pagkat-on sa Pagpaminaw Kaniya,” Alang sa Kalig-on sa mga Kabatan-onan, Ago. 2023.
Pagkat-on sa Pagpaminaw Kaniya
Ang panaw ni Kavira bahin sa komunikasyon lisod kaayo apan magantihon.
Mga litrato pinaagi ni Christina Smith
Sa bata pa, si Kavira V. dili makaistorya ni bisan kinsa. Apan karon nakakita siya og mga paagi unsaon pagkonektar ngadto sa uban, lakip na sa iyang Langitnong Amahan.
Ang disesayis anyos nga si Kavira V. taga-Florida, USA, nakahibalo sa bili sa komunikasyon. Sa pamilya man, sa mga higala, o sa Dios, si Kavira malipayon nga makahimo sa pagpakig-istorya ngadto nila.
Kabahin sa rason nga gihatagan gayod niya og bili kana nga koneksyon kay siya nahibalo kon unsa ang mahitabo kon wala kini.
Nagdako nga adunay Problema sa Pinulongan
Sa wala pa mobalhin ngadto sa Florida, ang pamilya ni Kavira orihinal nga nagpuyo sa Uganda. Si Kavira bungol ug walay access sa sign language sa bata pa, mao nga dili gayod siya makaistorya sa ubang mga tawo sa iyang palibot.
Kanang problema sa komunikasyon nakaapekto sa daghang aspeto sa iyang kinabuhi. Kalabot sa pag-eskwela, miingon siya, “Lisod ang Matematika alang nako. Dili ko kahibalo mag-Iningles, ug gidaogdaog ko. Daghan kaayo og diskriminasyon.”
Ang Simbahan lisod usab. Nianang higayona ang iyang pamilya nahisakop sa laing tinuohan. “Wala koy akses [access] sa pinulongan, mao nga dili ko makasabot kon unsay nahitabo,” miingon si Kavira. Molingkod lang siya hangtod mahuman ang mga tulomanon ug motuman sa mga ritwal nga wala mahibalo unsay gipasabot niini. “Walay daghang oportunidad alang sa Bungol nga mga tawo,” miingon siya.
Ang problema nakaapekto usab sa iyang koneksyon ngadto sa iyang pamilya. “Ako lamang ang Bungol nga tawo diha sa akong pamilya, mao nga usahay mobati ko nga dili parehas nila.”
Sa dihang si Kavira mga otso anyos o nuybe anyos, ang iyang pamilya namalhin ngadto sa Florida. Kay bata pa man siya ug dili makaistorya nila, wala gayod siya mahibalo nganong mipili sila sa pagbalhin. Apan tingali aron mangita og mas maayong oportunidad alang niya ug sa iyang pamilya.
Pagkuha og Edukasyon
Sa dihang ang pamilya ni Kavira mibalhin ngadto sa Florida, nakakita sila og eskwelahan alang sa mga bungol nga iyang matambongan. “Ang pagbaton niana nga edukasyon maanindot kaayo,” miingon siya. “Nakakat-on na ko og mga butang sama sa matematika, komunikasyon, ug mga kahanas sa kinabuhi sama sa pagpangita og trabaho, ug mga kahanas sa pagtuon.” Karon naggamit na siya og American Sign Language (ASL).
Nalingaw usab siya sa gawas sa akademik nga mga kalihokan. “Ganahan ko og bisan unsa nga mga isport,” miingon siya. “Nagdako kong kanunay nga nagdula og soccer, ug akong nasayran nga anaa usab kini dinhi [sa U.S.].” Nagkat-on usab siya og volleyball, flag football, basketball, ug paglangoy. “Makalingaw kaayo ang pagkat-on niining bag-o nga mga isport.”
Ug sukad sa bata pa si Kavira ganahan kaayo siya og art. Nangandoy siya nga molambo ug gani tingali mopadayon sa pagtuon og art sa kolehiyo. “Gusto ko nga magpadayon sa pagtuon aron makakat-on pa og daghan,” siya miingon. “Malingaw kaayo ko sa pag-eskwela ug pagkat-on.”
Pagkaplag og Koneksyon sa Pamilya
Ang mga ginikanan ni Kavira nagdasig niya sa iyang edukasyon. “Sila miingon nga buhata unsay imong mahimo aron makat-on sa tanan,” siya miingon. Mapasalamaton siya nga ang iyang pamilya nakakita og eskwelahan alang sa mga bungol alang niya.
Human sa pagkat-on og daghan, si Kavira wala na mobati nga dili parehas sa iyang pamilya, tungod kay iyang naamgohan nga siya parehas ra nila. Makig-istorya siya sa iyang mga ginikanan ug mga igsoon kanunay. “Nasayod ko nga usahay isip kabatan-onan, dili gyod namo hatagan og bili ang among pamilya—tingali usahay mas hatagan namo og bili ang among mga higala kaysa among pamilya,” miingon si Kavira. “Apan ang akong pamilya mao ang nakapalig-on nako. Ang akong mga ginikanan mitudlo nako sa mga butang nga kinahanglang hatagan og bili. Sila mitabang nako nga mahimong buotan ug mabination nga tawo.”
“Ang akong pamilya mao ang nakapalig-on nako,” miingon si Kavira.
Pagkaplag kang Jesukristo ug sa Iyang Simbahan
Wala madugay human makabalhin ang iyang pamilya ngadto sa Florida, usa ka tawo midapit nila nga motambong sa Ang Simbahan ni Jesukristo sa mga Santos sa Ulahing mga Adlaw. Ang igsoong babaye ni Kavira nagkat-on og pipila ka sign language, mao nga siya ang naghubad alang niya. Si Kavira miingon nga ang pagkat-on mahitungod ni Jesukristo ug sa Iyang ebanghelyo “nakaluwas sa akong kinabuhi.” Sa wala pa kana, iyang gibati nga morag ang iyang kinabuhi daghan kaayo og problema. “Morag nagmasulob-on ko, ug maldita ko ug lain ang tinagdan sa ubang tawo.”
Apan human makakat-on og daghan mahitungod sa Dios, “Gusto ko nga mahimong buotan nga tawo,” miingon siya. “Pinangga nako ang akong pamilya. Dili na ko gusto nga lain og tinagdan sa mga tawo. Gusto ko nga mag-usab sa akong kinabuhi. Dili kadto sayon nga pagpili nga pagahimoon, apan samtang nakat-on ko og daghan mahitungod sa Dios, lahi ang akong gibati. Gusto ko nga mahisama Kaniya.”
Pagpakigsulti uban sa Dios
Si Kavira nalingaw sa pagkat-on og daghan kon sa unsang paagi nga ang Dios makigsulti niya. “Isip usa ka Bungol nga tawo, tingali maghunahuna kamo, ‘Ang Dios makigsulti ba?’ Kita dili makadungog Kaniya nga ‘mosulti,’ mao nga unsaon man nato sa pagkaila Kaniya?”
Mitambong siya sa komperensiya sa kabatan-onan alang sa Bungol nga kabatan-onan, ug sa usa sa ilang mga workshop naghisgot sila kon unsaon nila isip Bungol nga mga tawo sa pagpakigsulti ngadto sa Dios. “Naghisgot kami ilabi na kon sa unsang paagi nga ang Espiritu Santo mosulti nganhi sa atong mga kasingkasing ug sa atong mga hunahuna [tan-awa sa Doktrina ug mga Pakigsaad 8:2]. Dili gayod kini ingon nga madungog sa dunggan.”
Si Kavira nakakat-on sa pag-ila sa Espiritu Santo sa iyang kinabuhi, apan miingon usab siya nga kini “usa ka nagpadayon nga proseso. Kanunay kitang maghunahuna kon sa unsang paagi nga ang Dios makigsulti nato.”
Siya miingon usab nga kinahanglang aktibo kita nga mangita niadtong mga oportunidad nga mabati ang Espiritu. “Kita kinahanglang magtinguha Kaniya ug magmapailobon, maminaw Kaniya samtang kita mag-ampo ug magtuon sa mga kasulatan, mosalig nga kita makaangkon niadto nga mga panghunahuna nga moabot sa atong mga kasingkasing ug mga hunahuna.” Iyang gihulagway ang pagbati sa Espiritu isip “inspirasyon ug kalipay.”
Si Kavira misenyas og “Gihigugma ko ikaw” sa American Sign Language.
Ang pagkahimong makasulti ngadto sa Langitnong Amahan usa ka bililhon nga gasa tungod kay modala kini nato paduol Kaniya. Si Kavira wala mobaliwala niini nga gasa—sama sa iyang paghatag og bili sa edukasyon ug sa iyang koneksyon sa pamilya. Kon kita makakat-on kon sa unsang paagi nga ang Dios makigsulti nato, kita mas makaila Kaniya. Si Kavira nakasinati niana, ug kamo usab!