Direkta sa Punto

Unsa ang tahas sa lohika ug pangatarongan diha sa ebanghelyo?

pagbalanse sa mga bato

Ingon nga ang Ginoo nagdasig og pisikal nga kahimsog (tan-awa sa Doktrina ug mga Pakigsaad 89), Siya usab nagdasig kanato sa paggamit ug pagpalig-on sa atong panghunahuna ug pangatarongan (tan-awa sa Doktrina ug mga Pakigsaad 130:18–19). Kita kinahanglang mogamit og lohika, sentido komon, ug pangatarongan aron sa pagkat-on, paghimo og mga desisyon, ug paggamit sa kamatuoran matag adlaw.

Apan sama sa giingon ni Presidente Henry B. Eyring sa Unang Kapangulohan: “Ang paghukom ug lohikal nga hunahuna lang sa tawo dili igo aron matubag ang importante nga mga pangutana sa kinabuhi. Nagkinahanglan kita og pagpadayag gikan sa Dios” (“Padayon nga Pagpadayag,” Okt. 2014 nga kinatibuk-ang komperensiya [ o Liahona, Nob. 2014, 70]).

Ang atong kinaiyanhong pangatarongan dili motukma sa pag-ila sa espirituhanon nga mga butang. Kita kinahanglang mosalig sa pagpadayag pinaagi sa Espiritu alang niana (tan-awa sa 1 Mga Taga-Corinto 2:14). “Ang Espiritu … namulong sa mga butang ingon nga sila gayod” (Jacob 4:13). Ang Espiritu namulong bahin sa mas taas ug mas kompleto nga kamatuoran kaysa kamatuoran nga atong makab-ot gamit ang atong mga pamalatian [senses] ug atong pangatarongan (tan-awa sa Isaias 55:8–9). Ug kon ang Espiritu moaghat kaninyo sa pagbuhat og usa ka butang nga morag wala lang sa sinugdanan, magmainampoon ug hinumdomi nga kamo sa kanunay mapanalanginan kon magtinguha kamo sa pagsunod sa Espiritu.