“Magtinguha og Pagsabot,” Alang sa Kalig-on sa mga Kabatan-onan, Ago. 2023.
Kataposang Pulong
Magtinguha og Pagsabot
Gipahiangay gikan sa usa ka pakigpulong sa 2019 nga kinatibuk-ang komperensiya.
Mga paghulagway ni Emily Jones
Ang atong katuyoan samtang magtinguha sa pagsabot sa ebanghelyo ni Jesukristo kinahanglan ang pagpalambo sa hugot nga pagtuo diha sa Dios ug sa Iyang balaanong plano sa kalipay ug diha ni Jesukristo ug sa Iyang maulaong sakripisyo ug aron makab-ot ang malungtarong pagkakabig. Ang maong paglambo sa hugot nga pagtuo ug pagkakabig makatabang kanato sa paghimo ug paghupot sa mga pakigsaad uban sa Dios, sa ingon naglig-on sa atong tinguha sa pagsunod ni Jesus ug makahimo og tinuod nga espirituhanong kausaban ngari kanato. Kini nga kausaban magdala kanato og mas malipayon, mabungahon, ug himsog nga kinabuhi ug makatabang kanato nga mapabilin ang mahangtorong panglantaw.
Aron makab-ot kini, kinahanglan kita nga magpabilin diha kang Jesukristo pinaagi sa pagsubsob sa atong mga kaugalingon diha sa mga kasulatan, magmaya diha niini, magkat-on sa Iyang doktrina, ug magpakabuhi sa paagi sa Iyang pagpakabuhi. Niini lamang nga kita makaila Kaniya ug makaila sa Iyang tingog, masayod nga samtang kita moduol ngadto Kaniya ug motuo Kaniya, dili gayod kita gutomon ni uhawon (tan-awa sa Juan 6:35).
Dili kana mahitabo pinaagi sa tsansa lang. Ang pagpahiangay sa atong kaugalingon ngadto sa kinatas-ang mga impluwensya sa pagkadiosnon dili sayon nga butang; nagkinahanglan kini nga motawag sa Dios ug magkat-on kon unsaon pagdala sa ebanghelyo ni Jesukristo diha sa sentro sa atong kinabuhi.
Ako mopamatuod kaninyo nga kon kita tinud-anay, kinasingkasing, lig-on, ug sinsero nga magtinguha nga makakat-on sa ebanghelyo ni Jesukristo ug motudlo niini sa usag usa uban sa tinuod nga katuyoan ug ubos sa impluwensya sa Espiritu, kining mga pagtulun-an mahimong makapausab sa mga kasingkasing ug modasig og tinguha nga magpuyo sumala sa mga kamatuoran sa Dios.