“Ang Espirituhanon nga Pagpangaplag sa Tibuok Ninyong Kinabuhi,” Alang sa Kalig-on sa mga Kabatan-onan, Ago. 2023.
Ang Espirituhanon nga Pagpangaplag sa Tibuok Ninyong Kinabuhi
Ang pagkat-on nga makaila ug mahigugma ni Ginoong Jesukristo nagpadayon sa tibuok ninyong kinabuhi.
Si Elder Andersen mitimbaya sa mga young single adult sa Aurora, Philippines, niadtong Nobyembre 2015.
Unsa ang mosantop sa inyong hunahuna kon madungog ninyo ang pulong nga pangaplag? Naghunahuna ba kamo sa mga salida o mga libro nga adunay maisogon nga mga bayani nga nalambigit sa panimpalad nga mga panaw nga puno sa kakuyaw? O tingali naghunahuna kamo bahin sa usa ka tawo nga misungasong sa usa ka mapangahason nga misyon nga nakigbatok sa tanang kalisdanan aron matuman ang imposible?
Ang mga pangaplag mahimong makita diha sa mga istorya sa tibuok kalibotan. Apan naghunahuna ba kamo kon kamo aduna bay pangaplag—usa ka butang nga dako ug mahinungdanon nga inyong mahimo nga makapausab sa kahangtoran sa inyong kinabuhi ug sa kinabuhi sa uban alang sa mas maayo?
Oo, kamo gayod adunay importante kaayo nga espirituhanong pangaplag! Apan dili sama sa mga pangaplag nga inyong mabasa diha sa mga libro o makita sa mga salida, ang inyong pangaplag nagsugod sa makapausab nga pagdapit sa Manluluwas ug Manunubos sa kalibotan: “Duol kamo kanako” (Mateo 11:28).
Ang Pagdapit sa Manluluwas
Siya nagdapit sa tanan nga motuo ug mosalig Kaniya, nga mohangop sa Iyang ngalan, sa Iyang mga pagtulon-an, ug sa Iyang mga sugo.
Bisan kon asa pa kamo nagpuyo o ang mga talento, mga kinaiya, ug talagsaong mga kasinatian sa kinabuhi nga anaa kaninyo, ang pag-una ni Jesukristo sa inyong kinabuhi mao ang pangaplag sa tibuok ninyong kinabuhi. Nagpuyo kamo niining kalibotan nga puno sa mga hagit ug mga makabalda. Aron magpadayon ang inyong pagtutok diha ni Jesukristo ug magpuyo og kinabuhi nga adunay hugot nga pagtuo diha Kaniya sa tibuok ninyong kinabuhi magkinahanglan kini og kaisog ug tabang gikan sa langit.
Pagkaplag og Kalig-on diha sa mga Ordinansa ug mga Pakigsaad
Usa ka dakong tabang gikan sa langit mao ang mga ordinansa ug mga pakigsaad sa templo nga mopabilin kanato nga “nakatisok, nakagamot, natukod, ug nahimutang”1 diha sa atong pangaplag nga moduol ngadto ni Kristo.
Kamo naghimo og mga pakigsaad sa dihang kamo gibunyagan. Samtang nag-uswag kamo diha sa ebanghelyo, kamo mohimo og daghan pa nga mga pakigsaad diha sa templo. Si Presidente Russell M. Nelson nagtudlo, “Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo.”2
Niining kalibotan nga puno sa makapawala sa pagtuo ug makabalda nga mga tingog ug nagkadaghan nga kasamok ug tintasyon, ang seguridad ug mga pahinumdom nga mahatag sa mga ordinansa ug mga pakigsaad mao ang motabang ninyo sa pagpadayon sa unahan sa unsay mahunahunaong gitawag ni Presidente Nelson og dalan sa pakigsaad.
Magpuyo nga Takos sa Espiritu Santo
Dul-an sa 2,000 ka tuig na ang milabay, si Apostol Pablo miingon nga ang mga butang sa Dios mahibaloan ug masabtan lamang pinaagi sa Espiritu Santo (tan-awa sa 1 Mga Taga-Corinto 2:11–14). Ang iyang mga pulong tinuod gayod gihapon karon.
Ingon nga kamo nakadawat sa gasa sa Espiritu Santo atol sa bunyag, kamo kinahanglang maningkamot sa pagpuyo nga takos sa makanunayong impluwensya niini pinaagi sa unsay inyong buhaton, unsay inyong isulti, ug kang kinsa kamo mopakigbahin sa inyong oras. Sa pagbuhat niini, ang espirituhanong kahayag mas seguradong moabot sa inyong kalag.
Si Presidente Nelson nagtambag kanato nga mopili sa “paglikay gikan sa bisan unsa nga makapabugaw sa Espiritu”3 ug “paghimo sa espirituwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.”4
Hupti ang Espirituhanong mga Kasinatian
Si Pablo nakabig sa Ginoo sa dihang “[midan-ag ang] usa ka masanag nga kahayag gikan sa langit” ug nadungog niya ang tingog sa Ginoo (Mga Buhat 22:6–7). Gihuptan kini ni Pablo ug ang ubang espesyal nga espirituhanong mga kasinatian sa tibuok niyang kinabuhi. Kita usab kinahanglang mohimo sa ingon.
Si Propeta Joseph Smith nag-atubang kanunay og oposisyon ug pagpanglutos, apan wala gayod siya malimot o molimod sa iyang kasinatian sa Unang Panan-awon. Siya lig-ong mipamatuod nga ang Amahan ug ang Anak mipakita kaniya. “Ako nasayod niini,” si Joseph miingon, “ug ako nasayod nga ang Dios nasayod niini, ug ako dili makalimod niini” (Joseph Smith—Kasaysayan 1:25). Ang paghupot sa espirituhanong mga kasinatian nakahatag og kasegurohan ni Joseph bahin sa gugma sa Dios ug nakapalig-on niya diha sa buhat nga gihatag sa Ginoo nga iyang buhaton.
Samtang ang langitnong mga panan-awon moabot panagsa, ang espirituhanong mga kasinatian ug mga milagro moabot niadtong mapaubsanon ug mainampoon nga nagtinguha niini. Hunahunaa ang inyong mga kasinatian sa FSY o ang inyong mga gibati samtang nagbasa kamo sa Basahon ni Mormon sa unang higayon. Hupti gayod kining makahuloganon nga mga gutlo sa inyong kinabuhi. Kini molig-on ninyo diha sa inyong pangaplag nga moduol ngadto ni Kristo.
Pilia ang Hugot nga Pagtuo
Sa iyang tibuok nga kinabuhi, si Apostol Pablo gilatigo ug gibato ug nakasugakod sa tulo ka higayon nga nalunod ang barko (tan-awa sa 2 Mga Taga-Corinto 11:24–25). Iyang giatubang ang daghan nga gustong mopasipala kaniya ug nag-antos sa “kalapoy ug sa pagpangabudlay,” “kagutom ug kauhaw,” ug “katugnaw ug kahubo” (2 Mga Taga-Corinto 11:26–27).
Pipila lamang ka tawo ang adunay mga pagsulay nga sama ka grabe sa kang Pablo, apan bisan sa iyang hilabihan nga mga kasakit, si Pablo tingali “may kaguol, apan malipayon gihapon” ug “[bisan] mga kabos, apan [aduna] sa tanang butang” (2 Mga Taga-Corinto 6:10) tungod kay siya mipili sa hugot nga pagtuo diha ni Jesukristo.
Dili kaayo lisod ang pagpili sa hugot nga pagtuo diha ni Jesukristo kon kita mobati og espirituhanong kadasig, apan kinahanglan usab kita nga mopili sa hugot nga pagtuo kon magkalisod ang kinabuhi. Inyong mahibaloan nga ang Manluluwas wala magbarog diha sa kataposan sa inyong pagpangaplag ug maghulat kaninyo nga moduol Kaniya. Siya nagbarog tupad kaninyo ug nagtudlo sa dalan. Siya mao ang dalan (tan-awa sa Juan 14:6).
Si Presidente Nelson nag-ingon, “Ang Manluluwas motabang nato sa pagbuntog sa mga tintasyon niini nga kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.”5 Ang Alang sa Kalig-on sa mga Kabatan-onan nga giya namahayag: Si Jesukristo mao “ang kalig-on sa mga kabatan-onan.”6
Ang Iyang mga Saad Matuman
Ako mapasalamaton alang sa akong segurado nga kahibalo nga si Jesus mao ang Kristo. Ako mopamatuod nga ang pagkaila ug paghigugma Kaniya mao ang usa sa mahinungdanong mga oportunidad sa mortalidad.
Sa umaabot nga adlaw, kamo moluhod sa Iyang tiilan. Nianang adlawa, kon kamo nagtuman sa inyong mga saad ngadto Kaniya, ang inyong kalag magmaya kay Siya motuman sa tanan Niya nga mga saad sa tanan niadtong miduol Kaniya uban sa “hingpit nga katuyoan sa kasingkasing” (3 Nephi 18:32), mitubo diha sa ilang gugma alang Kaniya, ug nagtinguha nga mobati sa Iyang balaanong presensya sa tibuok nilang kinabuhi.
Kini mao ang labing balaan, malamposon nga gutlo sa inyong espirituhanong panaw!