“Nanlimbasog sa Pag-ila sa Espiritu Santo?,” Alang sa Kalig-on sa mga Kabatan-onan, Ago. 2023.
Nanlimbasog sa Pag-ila sa Espiritu Santo?
Ako usab. Apan dili kinahanglan nga ingon ka libog sa atong gibuhat usahay.
Mga Paghulagway ni Albert Espi
Isip usa ka batan-on, nahadlok ko nga kon wala nako masabti ang pag-aghat sa Espiritu Santo, tingali malibog ko sa dakong plano nga ang Dios aduna para nako. Ug usahay maoy hinungdan nga mahadlok ko mohimo og mga desisyon! Apan ang ubang kasinatian nakatabang nako sa pagkat-on nga dili kinahanglan kini nga ikalibog.
1. Ang Langitnong Amahan Nagsalig Kanimo
Sa high school, naka higayon ko og balhin og bag-ong eskwelahan. Ako gusto gyod kaayong mobalhin, apan dili ko segurado kon gusto ba sa Langitnong Amahan. Sa dihang wala gyod ko nakakuha og klaro nga kompirmasyon, nagsugod kog hunahuna og maayo. Usa ka adlaw, miabli kog tsokoleyt nga kendi, ug ang sulod niini nag-ingon, “Ikaw anaa gayod kon hain ka.” Mao ba kini ang akong tubag? Ang Langitnong Amahan namulong ba ngari kanako pinaagi sa usa ka panit sa tsokoleyt? Ako wala nagtuo niini.
Sa dihang wala pa gihapon ko nakadawat og tubag, sa kataposan mihimo ko sa unsay akong gihunahuna nga maoy labing maayo nga pagpili ug mibalhin og eskwelahan. Apan usahay nabalaka gihapon ko nga basin ang panit sa tsokoleyt adunay pag-aghat nga akong gibale wala. Dayon usa ka adlaw, sa dihang akong giistorya ang akong kabalaka sa usa ka higala, mibati kog kalinaw. Kadto nga kalinaw maoy akong tubag—apan miabot lamang kini human ko mihimo og pagpili ug gibuhat kini.
Ang Langitnong Amahan nagsalig kanimo samtang naningkamot ka sa paghupot sa Iyang mga sugo ug mosunod ni Jesukristo. Kinahanglan kang mangita sa Iyang paggiya sa dagkong mga desisyon, apan kon wala ka moila og klaro nga tubag, paghimo og desisyon ug padayon sa unahan! Sama sa giingon ni Elder Dieter F. Uchtdorf sa Korum sa Napulog Duha ka Apostoles: “Ang espirituwal nga kahayag dili sagad moabot niadtong naglingkod lang sa kangitngit nga naghulat og tawo nga mopasiga sa suga. Nagkinahanglan kini og buhat sa pagtuo aron maablihan ang atong mga mata ngadto sa Kahayag ni Kristo.”1
2. Ikaw Gigiyahan Gayod
Isip usa ka misyonaryo sa Missionary Training Center, mitan-aw ko og bidyo diin si Elder David A. Bednar sa Korum sa Napulog Duha ka Apostoles namulong. Mipakigbahin siya kon sa unsang paagi niadtong misyonaryo pa siya sa Germany, mitabang siya ni Presidente Boyd K. Packer (niadto sakop sa Korum sa Napulog Duha ka Apostoles) samtang mibisita siya didto. Sa wala pa mibiya si Presidente Packer, si Elder Bednar mihatag kaniya og kwarta nga German alang sa iyang pagpanaw. Pagkahuman niadto, si Presidente Packer nagkinahanglan og kwarta sa paglabang og dili luwas nga dapit.
Si Elder Bednar wala makahibalo nga gigiyahan siya sa Espiritu sa dihang iyang gitagaan og kwarta si Presidente Packer. Naghunahuna lang siya nga basin gutomon si Presidente Packer!2 Ug sama kang Elder Bednar, ang Espritu tingali naggiya sa imong mga aksiyon bisan wala nimo hibaloi. Salig nga samtang naningkamot ka nga magpuyo diha sa dalan sa pakigsaad, gigiyahan ka sobra pa sa imong nahibaloan.
3. Ang Espiritu Santo Nag-uban Kanimo
Usa ka adlaw sa akong misyon, ang akong kompanyon ug ako nag-ampo aron mas makaila sa Espiritu Santo sa among tibuok adlaw. Sa among pagpamalandong, naghunahuna kami mahitungod kon giunsa kami pagsaad nga makabaton sa Espiritu nga magauban kanamo kanunay. Nakaamgo kami nga ang impluwensya sa Espiritu diha kanamo kanunay. Apan naanad na kaayo kami sa pagbati niini, kami usahay wala na makabantay sa pag-ila niini.
Tingali naanad na kaayo kita niini nga pagbati sa Espiritu Santo nga dili na kita makabantay niini. O mahimo kang maghunahuna nga wala gayod nimo nabati kini! Pangutan-a ang imong kaugalingon kon nangita ka ba sa dako, lawom nga mga timailhan kaysa malumo nga presensya sa Espiritu. Tun-i ang mga kasulatan ug ang mga pulong sa mga propeta aron makat-on og dugang mahitungod sa impluwensya sa Espiritu Santo. Kon mag-ampo ka aron sa pag-ila sa Espiritu Santo, mahimo kang magsugod sa pag-ila sa tanang gagmay nga mga paagi nga Siya naggiya, nagtudlo, ug naghupay kanimo.
Panapos
Kinahanglan kang mobuhat sa imong labing maayo aron mahimong takos ug sa pag-ila ug pagsunod sa personal nga pagpadayag. Apan kon ikaw nagpasulabi og hunahuna niini, hunong! Sa usa ka kalihokan sa Face to Face, si Elder Bednar miingon, “[Ang Espiritu Santo] mogiya sa atong mga lakang, modasig kon unsay atong isulti o buhaton, ug sa higayon nga dili gani nato mahibaloan.”3
Sa imong paghimo og mga desisyon, hibaloi nga ang Ginoo nagsalig kanimo ug nagtabang kanimo. Sa imong pagpaningkamot sa paghupot sa imong mga pakigsaad, magiyahan ka sa dalan nga sa kataposan modala kanimo sa panimalay sa imong Langitnong Amahan.