“4 ka Paagi nga Kamo Mas Mahisama ni Kristo,” Alang sa Kalig-on sa mga Kabatan-onan, Ago. 2023.
4 ka Paagi nga Kamo Mas Mahisama ni Kristo
Nagkinahanglan ba og pipila ka ideya alang sa pag-apil diha sa programa sa Kabataan ug Kabatan-onan? Ania ang pipila ka butang nga gihimo sa kabatan-onan sa Pilipinas!
1. Moserbisyo sama Kaniya (Serbisyo ug mga Kalihokan)
Kamo mas mahisama sa Manluluwas pinaagi sa pagserbisyo sa uban sama sa Iyang gihimo. Ug dili kini kinahanglan nga lisod! Ang pagserbisyo mahimong ingon ka sayon sama sa pag-apil sa mga kalihokan sa Young Men o Young Women, paghimo og mga pagbunyag alang sa mga patay, o pagpadala og mabination nga mensahe ngadto sa usa ka higala. Sa unsang paagi nga makaserbisyo kamo sa uban?
“Isip usa ka batan-ong babaye, ganahan kong moserbisyo sa akong isigka batan-ong babaye ug mangalagad nila. Ako nasayod nga nagtabang ko sa pagpundok sa Israel, bisan diha sa akong kaugalingong ward.”
Jana, 17
“Kon maghunahuna ko bahin sa pagserbisyo, maghunahuna ko bahin sa akong katungdanan ug responsibilidad isip usa ka deacon nga motabang sa pagpaambit sa pan ug tubig sa sakramento matag Dominggo. Ako nasayod nga si Jesukristo mao ang hingpit nga ehemplo sa pagserbisyo.”
Josh, 13
2. Magtubo sama Kaniya (Personal nga Kalamboan)
Kamo makahimo og mga tumong sa pagtubo sama sa Manluluwas sa espirituwal, pisikal, sosyal, ug intelektuwal nga paagi (tan-awa sa Lucas 2:52). Pangutan-a ang Langitnong Amahan kon sa unsang paagi nga Siya gusto nga kamo motubo, ug dayon paghimo og plano ug lihoka! Sa unsang paagi nga kamo mas motubo sama sa Manluluwas?
“Tungod sa gugma sa Langitnong Amahan alang nato, Siya mipanalangin nato og mga gasa ug mga talento. Alang nako, malipay ko matag higayon nga mosayaw ko ug labi na kon ako mopakigbahin niini pinaagi sa pagtudlo sa uban. Usa kini ka maanindot nga paagi sa paglig-on sa akong pagtuo diha sa akong Manluluwas, pag-ugmad sa akong pagsalig, ug gani sa paghimamat og bag-ong mga higala. Apan ang usa sa labing maayo nga mga butang mahitungod niini mao nga akong mapalipay ang akong mga ginikanan, mga igsoon, ug mga higala. Ako nasayod nga gihatagan kita og mga gasa ug mga talento alang sa kaayohan sa uban, ug mao kana ang makapalipay nako kon ako mosayaw.”
Leigh, 16
3. Pagkat-on bahin Kaniya (Pagkat-on sa Ebanghelyo)
Kamo mas mahisama sa Manluluwas kon magtuon kamo sa ebanghelyo ug dayon lihokon ang mga butang nga inyong nakat-onan. Kamo makakat-on mahitungod Kaniya diha sa inyong personal nga pagtuon ug kon kamo pananglitan motambong sa simbahan ug sa seminary. Sa unsang paagi nga kamo makakat-on pa og dugang mahitungod sa Manluluwas?
“Ang pagtambong sa akong klase sa Young Women ug pagpaminaw sa mga mamumulong atol sa mga tulomanon sa Dominggo naghatag nako og kahibalo. Ang mga pulong sa Dios, kon gamiton sa atong mga kinabuhi, mamahimong kaalam.”
Mia, 12
“Ang paghatag og prayoridad sa seminary mas sayon sultihon kaysa buhaton. Apan kon kamo mag-ampo ug maghunahuna kon nganong importante ang espirituwal nga pagkat-on, ang desisyon dili na ingon ka lisod. Nakatabang kini nako nga makaila sa akong Manluluwas, mas maduol Kaniya, ug motubo uban Kaniya.”
Dzuliah, 19
4. Modangop ngadto Kaniya
Kon kamo maningkamot nga mas mahisama ni Kristo, seguroha nga kamo nakatutok Kaniya! Siya mao “ang dalan, ang kamatuoran, ug ang kinabuhi” (Juan 14:6). Usahay morag bation nga lisod ang pagbuhat sa tanang butang nga kinahanglan ninyong buhaton, apan kon kamo nakatutok sa Manluluwas ug sa unsay Iyang buhaton, mahibaloan ninyo kon unsay labing importante.
“Ang akong gugma alang ni Jesukristo nakaimpluwensya nako sa paghimo og importante nga mga desisyon tungod kay naningkamot ko sa paghunahuna sa unsay Iyang buhaton. Nakahimo ko og dili maayo nga mga desisyon kaniadto tungod kay wala nako himoa nga ang gugma alang sa Manluluwas mao ang akong tutokan. Ako nasayod nga kita dili hingpit, apan pinaagi sa pagsunod ni Jesukristo ug pagtuman sa Iyang mga sugo, kita makapakita sa atong gugma alang Kaniya ug mahimong mas mahisama Kaniya.”
Justine, 15