Ang 20-Mark nga Kwartang Papel
Gikan sa usa ka pakigpulong sa debosyonal nga gihatag didto sa Brigham Young University–Idaho niadtong Marso 12, 2002. Alang sa kompleto nga teksto niini nga pamulong sa Iningles, bisitaha ang www.byui.edu/Presentations/Transcripts/Devotionals/2002_03_12_Packer.htm.
Kapin sa 30 ka tuig ang milabay ako natahasan uban ni Elder Thomas S. Monson sa pag-organisar og usa stake nga naglangkub sa mga tawo nga nag-alagad sa military sa Europe. Kami nagkita sa Berchtesgaden, Germany, ibabaw sa Bavarian Alps. Sa sinugdanan kini mao ang mga headquarter nga gitukod ni Adolf Hitler sa dili makomparar nga matahum nga lugar. Adunay pipila niining kalibutan nga adunay susama nga dautang personalidad ug katuyoan sama kang Adolf Hitler. Ako naghunahuna nga among gipahiuli ang kanindot nga kahimtang niadtong lugara, ug karon anaa kami didto nagpundok aron sa pag-organisar og usa ka stake sa Zion.
Pagkahuman namo og set apart ug pagkompleto niadto nga organisasyon, kami gitahasan sa pag-adto sa Berlin alang sa usa ka stake conference. Kami kinahangalan nga moadto sa Berchtesgaden high sa Alps paubos ngadto sa Munich ngadto dayon sa airport.
Kami miabot sa airport nga may igong panahon para makasakay sa among eroplano, nga naka-eskedyul sa paglarga mga 10:00 sa buntag, apan baga ang gabon nga dili makatugpa ang eroplano. Kami nanglingkod didto nga nagpaminaw sa mga pahibalo sulod sa hapit 12 na ka oras. Kanunay nilang gipahibalo nga sila nagtuo nga ang gabon mawala ra. Kini wala mawala.
Nianang gabhiona sa hapit na mag alas 10:00, duha ka mga elder nga misyonaryo miabut sa airport. Dayon nasayud kami nga ang mga eroplano dili molarga. Sila miingon kanamo nga adunay usa ka tren nga mobiya gikan sa Munich padulong sa Berlin inig tungang gabii. Ang mga elder midala kanamo sa estasyonan sa tren, mitabang kanamo sa pagpalit og mga ticket, ug mitan-aw kanamo nga misakay sa tren, nga modagan gikan sa mga tungang gabii hangtud sa alas 10:00 sa sunod buntag nga moabut sa Berlin.
Sa dihang molarga na ang tren, ang usa ka batan-ong elder miingon, “Aduna ba kamoy kwartang German?”
Ako milingolingo sa akong ulo.
Siya miingon, “Kinahanglan nga aduna kamoy pipila,” ug, nagdagan sa kilid, mikuha gikan sa iyang bulsa og 20-mark nga kwartang papel. Iya kining gihatag kanako.
Nianang panahona ang Iron Curtain “gibantayan” sa hugot nga pagbantay. Ang tren mihunong sa Hof tunga-tunga sa utlanan sa West Germany ug East Germany, ug ang mga crew pang-ilisan. Ang tanang sakop sa West German crew nanganaog sa tren, ug ang East German crew misakay sa tren. Dayon ang tren milahos sa East Germany padulong sa Berlin.
Ang gobyerno sa U.S. bag-ohay lang nga nagsugod sa paghatag og lima ka tuig nga mga pasaporte. Ako adunay bag-o nga pasaporte, lima ka tuig nga pasaporte. Sa wala pa kami mobyahe, kami miadto aron sa pagbag-o sa pasaporte sa akong asawa, apan ila kining gibalik nga nagsulti nga ang tulo ka tuig nga pasaporte pagadawaton gihapon sama sa lima ka tuig nga pasaporte. Siya aduna pay sobra sa duha ka tuig nga nabilin sa iyang pasaporte.
Mga alas dos sa kadlawon, usa ka konduktor, usa ka sundalo sa military, miabut ug nangayo sa among mga ticket, ug dayon, nakabantay nga kami dili German, iyang gipangayo ang among mga pasaporte. Ako dili ganahan nga ihatag ang akong pasaporte, ilabi na sa mga lugar nga dili kaayo mahigalaon. Apan iya kining gikuha. Ako kanunay gayud ganahan sa tanan, apan ako mihimo og eksepsyon para kaniya! Siya dili mahigalaon, walay tahud, bati nga tawo.
Kami dili makasulti og German. Sa lawak sa tren, kami unom ka buok: ang akong asawa ug usa ka German nga naglingkod tapad niya ug lain pang tulo ka mga German nga naglingkod sa among atubangan nga hapit mag-abot ang among mga tuhod. Kami nagkaistoryahanay og gagmay. Sa dihang miabut ang konduktor, ang tanan nangahilum.
Adunay panag-istoryahanay, ug ako nasayud unsa ang iyang gisulti. Dili niya dawaton ang pasaporte sa akong asawa. Siya milakaw ug mibalik kaduha o katulo ka beses.
Sa katapusan, wala masayud unsa ang buhaton, ako mibati og inspirasyon ug mipagawas sa kadtong 20-mark nga kwartang papel. Iya kining gitan-aw, gidawat ang kwartang papel, ug gibalik paghatag kanamo ang among mga pasaporte.
Pagkasunod buntag sa dihang miabut na kami sa Berlin, usa ka miyembro sa Simbahan ang misugat kanamo sa tren. Ako misulti og gamay kabahin sa among nasinati. Siya kalit lamang nga mihilom. Ako miingon, “Unsa man ang nahitabo?”
Siya miingon, “Dili ako makapasabut kon sa unsa nga paagi nga miabut kamo dinhi. Ang East Germany karon mao ang usa ka nasud sa kalibutan nga dili modawat sa tulo ka tuig nga mga pasaporte. Alang kanila, ang pasaporte sa imong asawa dili balido.”
Ako miingon, “Nan, unsa man ang ilang pwedeng buhaton?”
Siya mitubag, “Pakanaugon mo sa tren.”
Ako miingon, “Dili mi nila pwedeng pakanaugon sa tren, buhaton ba gayud nila?”
Siya miingon, “Dili nato. Ang imong asawa!”
Akong nakita ang akong kaugalingon nga adunay usa ka tawo nga misulay sa pagpakanaog sa akong asawa sa tren mga alas dos sa kadlawon sa usa sa mga dapit sa East Germany. Ako dili sigurado unsa ang akong angay nga buhaton. Ako wala masayud hangtud pagkahuman kon unsa kadto ka delikado ug unsa ang mga panghitabo, ilabi na alang sa akong asawa. Mas gipangga nako siya kaysa akong kaugalingon. Kami nahimutang sa seryoso kaayo nga kakuyaw. Kadtong mga pasaporte nga dili nila dawaton pagaarestohon ug pagaprisohon.
Ang Among mga Kinabuhi Gigiyahan
Kini tanan mopadulong niining kamatuoran: ang elder nga mihatag kanako sa 20-mark nga kwartang papel mao si David A. Bednar, usa ka batan-on nga elder nga nangalagad sa South German Mission, kinsa usa ka sakop sa Korum sa Napulog Duha ka mga Apostoles.
Busa ngano man kaha nga kining batan-ong elder gikan sa San Leandro, California, mihatag kanako sa 20-mark nga kwartang papel? Kon inyo kadtong masabtan ug masabtan kon unsa ang kinabuhi, sa tinud-anay inyo gayud nga masabtan ang tanan ninyong kinahanglan nga mahibaloan kabahin sa kinabuhi isip usa ka miyembro sa Simbahan. Inyong masabtan kon sa unsang paagi nga dili kita ang nanag-iya sa atong mga kinabuhi. Kini gidumala—ug kon kita magpuyo sa angay nga paagi sa pagpuyo, dayon kita pagaampingan. Ako wala maghunahuna nga siya nasayud sa mga sangputanan sa iyang gibuhat. Ang 20-mark nga kwartang papel adunay bili nga sayis dolyares, ug ang sayis dolyares alang sa usa ka elder medyo dako na.
Samtang ikaw mopadayon sa kinabuhi, imong makita nga kining mga butanga mahitabo kon ikaw magpuyo sa angay nga paagi sa pagpuyo.
Kon imong makat-onan unsa ang Espiritu, dayon ikaw dili na kinahanglan nga mag-inusara. Sa Doktrina ug mga Pakigsaad 46:2, kini miingon, “Apan bisan pa niadto nga mga butang nga nahisulat, kini kanunay gikahatag ngadto sa mga anciano sa akong simbahan gikan sa sinugdanan, ug sa tanan nga panahon, sa pagdumala sa tanan nga mga tigum ingon nga sila gimandoan ug gigiyahan sa Balaang Espiritu.”
Ang Espiritu sa Imong Lawas
Ang doktrina nga gipasabut sa mga kasulatan, sa mga pinadayag, nagsulti kanato nga kita duha nga binuhat. Kita nasayud nga adunay usa ka espiritu ug usa ka lawas. “Ang espiritu ug ang lawas [kon sila mahangturon nga mag-uban, mao] ang kalag sa tawo” (D&P 88:15). Busa kamo adunay duha ka bahin. Adunay usa ka espiritu sulod sa usa ka lawas.
Kamo adunay espiritu sa lawas; ang inyong salabutan anaa hangtud sa kahangturan (tan-awa sa D&P 93:29). Kana lisud kaayong sabton. Kita mabuhi hangtud sa kahangturan. Kamo motuo ana, dili ba? Panahon sa Pagkabanhaw, kita mabuhi hangtud sa kahangturan. Kana dili mahimo gawas kon ang nangagi tinuod usab, nga kita mipuyo sa kahangturan kaniadto. Kita ania dinhi sa tunga-tunga sa usa ka butang nga mahangturon.
Ako naghunahua kabahin sa adlawng moabut nga ang akong espiritu mobiya na sa akong lawas. Kon ang “panagbulag” mahitabo ug ang inyong lawas ilubong ug karon kita magtan-aw sa imong espiritu, unsa kaha ang inyong hitsura? Unsa kaha ang hitsura sa inyong espiritu?
Ang pipila sa kaninyo mahimong mahulagway isip perpekto nga mga atleta—perpekto ang pagkatakdo, makahimo sa tanan nga butang. Kamo adunay nindot nga pisikal nga mga lawas. Kon atong bulagon ang imong lawas gikan sa espiritu, unsa ang hitsura sa inyong espiritu? Kamo makakat-on, kon kamo magtuon ug mag-ampo ug mobati, nga kamo makaangkon og usa ka nindot nga lawas ug usa ka kuyos, huyang nga espiritu. Sa laing bahin, kamo makaangkon og usa ka lawas nga limitado sa daghang mga butang, apan sa mahangturong matang sa mga butang, kamo makabansay ug makatudlo sa imong espiritu aron kini mahimo nga dili mawagtangan og bili.
Kamo makalantaw nianang adlaw sa “panagbulag” ug ang imong espiritu mabulag gikan sa lawas. Ang imong espiritu batan-on ug mabaskog ug maanindot. Bisan kon ang imong lawas tigulang ug adunay sakit o kimpang o bakol sa bisan unsang paagi, kon ang espiritu ug ang lawas pagausahon sa Pagkabanhaw, dayon ikaw pagahimayaon; dayon ikaw mahimaya.
Usa ka tawo nga akong nailhan—usa sa halangdon nga mga tawo nga akong nailhan—anaa sa usa ka grupo sa mga lalaki nga ganahan mangita og gubot. Sila kanunay anaa asa sila dili angayan mangadto ug dili mangadto asa sila angayan. Sa katapusan, usa ka maalamon, maayong mangita og paagi nga lider nakapasulod kanila sa klase sa Sunday School. Ang magtutudlo mao kining tiguwang nga lalaki—ordinaryo lamang, dili madanihon og hitsura nga tiguwang lalaki. Dugang pa niana, siya usa ka kinabig gikan sa Europe, ug siya dili kaayo makasulti og Iningles. Sila nanagngisi, “Ang atong titser? Siya?” Kini nga mga lalaki, sa akong pagtuo, adunay reputasyon sa kanunay nga magpalagot sa ilang magtutudlo.
Dayon ang akong higala miingon nga adunay usa ka butang nga nahitabo. Ang magtutudlo misugod sa pagtudlo, ug silang tanan nagsugod sa pagpaminaw. Kini nga higala miingon, “Ikaw mahimong mopainit sa imong mga kamot pinaagi sa kayo sa iyang hugot nga pagtuo.” Kana nagpasabut nga diha nianang mas tiguwang, nanguyot nga lawas nga mora og dili makatarung og istorya, adunay usa ka gamhanan nga espiritu.
Unya sa pagkabanhaw—ang abog sa kalibutan, ang kalibutanhong bahin kanato—mahimong mabag-o ug mahimong gamhanan maingon nga kini motupong sa espiritu.
Ang Espiritu Santo Moggiya Kanimo
Kon ikaw makasabut unsaon sa paglihok sa Espiritu, ikaw walay problema. Walay igong gahum sa yawa nga hiusahon—kon kining tanan hinimo gikan sa usa ka itom, bati nga laser beam ug nakapokus nganha kanimo, kini dili makabuntog kanimo, gawas kon sa bisan unsang paagi ikaw mitugot niini.
Sa inyong padayon nga pagkat-on, “ang kaalam maoy labaw nga butang; busa batoni ang kaalam: uban sa tanan mo nga pagatinguhaon batoni ang pagsabut” (Proverbio 4:7).
Siguradoa nga kamo makakat-on sa mga butang nga wala gitudlo sa dayag nga paagi diha kaninyo. Kon ang tanan ninyong nahibaloan mao lamang ang inyong nabasa o unsa ang inyong nadungog, ikaw dili makahibalo og daghan. Ang mga higayon sa paghatag og balaan nga pagtahud labing nindot kaayo kon ikaw maghunahuna ug mobati. Mao nga ang mga templo importante kaayo. Kamo mahimong moadto sa templo ug mahimong mogawas sa kalibutan.
Ang saad gikan sa Ginoo mao nga kon kamo modawat sa Espiritu Santo, “siya mao ang magtudlo kaninyo sa tanang butang, ug magpahinumdom kaninyo sa tanan, nga akong gisulti kaninyo” (Juan 14:26).
Ikaw mohimo og pipila ka mga butang nga diha-diha dayon, hapit dili na hunahunaon. Sa walay paghunahuna, imong makita nga ikaw nadasig ug nagiyahan pinaagi sa Balaang Epiritu. Mao kana ang hinungdan ngano nga kining batan-ong elder, wala masayud nganong, mikuha og 20-mark nga kwartang papel gikan sa iyang bulsa samtang siya nagdagan kilid sa tren ug gihatag kini kanako samtang nagdagan ang tren. Siya miluwas kanamo gikan sa hilabihan nga peligro.
Ingon niana ang pagbuhat ninyo og mga butang ug unya sa kaulahian molantaw pagbalik ug masayud mga kamo nagiyahan. Ug usab ingon niana ang paagi nga kamo mapasidan-an. Ikaw mapasidan-an, “Ayaw og adto didto! Ayaw kana og buhata!” Ikaw mapasidan-an, “Ayaw og kuyog ana nga lalaki! Ayaw og kuyog ana nga babaye! Ayaw og kuyog ana nila!” Ug dayon, “Apil niining grupoha!” Kamo magiyahan, ug ang Ginoo magbantay kaninyo.
Ako nasayud nga ang ebanghelyo tinuod, nga si Jesus mao si Kristo, nga Siya buhi, nga kini Iyang Simbahan. Pangita og lugar sa kalibutan diin ikaw sa walay kaulaw, walay pagduha-duha , makadeklarar sa imong kaugalingon: una, nga imong gidawat ang ebanghelyo ni Jesukristo ug, ikaduha, kon unsa ka mas importante kay sa unsa ang imong gibuhat. Kon unsa ang imong gibuhat, kon kini giniyahan, mohimo kanimo nga unsa ka ug unsa ka unya sa umaabut.
Paghulagway pinaagi ni Gregg Thorkelson
Ngano man kaha nga kining batan-ong elder mihatag man kanako sa 20-mark nga kwartang papel? Kon inyo kadtong masabtan, inyong masabtan kon sa unsang paagi nga dili kita ang nanag-iya sa atong mga kinabuhi. Kini gidumala. Ang elder nga mihatag kanako sa 20-mark nga kwartang papel mao si David A. Bednar, usa ka batan-ong elder nga nagserbisyo sa South German Mission, kinsa usa ka sakop karon sa korum sa Napulog Duha ka mga Apostoles.
Paghulagway sa litrato pinaagi ni Matthew Reier
Litrato sa Templo sa Hong Kong China pinaagi ni Craig Dimond; paghulagway sa litrato pinaagi ni John Luke