Mga Pahiyom nga Ipaambit
“Busa, paglipay, ug ayaw kahadlok, kay Ako ang Ginoo anaa uban kaninyo” (D&P 68:6).
Unsay inyong nakat-unan sa Primary karon, Sasha?” Si Mama nangutana samtang sila namauli gikan sa simbahan.
“Si Siter Duffy mitudlo kanamo mahitungod sa espesyal nga mga gasa nga gitawag og mga talento,” miingon si Sasha. “Miingon siya nga ang Langitnong Amahan mihatag kanatong tanan og mga talento aron kita makatabang sa uban. Miingon siya sa dihang among gipaambit ang among mga talento, makapalipay kini sa mga tawo.”
“Tinuod kana,” miingon si Mama. “Mitudlo si Jesus nga kinahanglan nga atong gamiton ang atong mga talento sa pagserbisyo sa uban.”
Si Sasha nahilom sa makadiyot, mitan-aw sa bintana. “Apan, Ma, unsaon man si Lauren?” nangutana siya.
“Unsa man diay siya?” Si Mama nangutana.
“Kanang, dili siya makasulti, ug anaa siya sa wheelchair. Unsang matanga sa mga talento ang anaa kaniya nga makatabang sa uban?”
“Unsa ang unang butang nga imong namatikdan ni Lauren sa dihang nakita nimo siya?” Si Mama nangutana.
Naghunahuna si Sasha sa makadiyot ug dayon siya miingon, “Ang iyang pahiyom. Si Lauren pirme nga mopahiyom.’
“Tinuod kana,” miingon si Mama. “Unsa pa?”
“Pirme siyang mokatawa. Ilabi na kon mokanta kita o siya makadungog sa piano. Pirme siyang madasig. Ug ganahan siyang mopalupad og halok sa mga tawo.”
“Unsay imong bation kon ikaw kauban ni Lauren?” Si Mama nangutana.
“Malipayon. Pirme kong malipayon kon kauban nako si Lauren,” miingon si Sasha.
“Ako sad,” miingon si Mama. “Mao kana ang usa sa mga talento ni Lauren. Mopaambit siya sa gugma ug kalipay sa tanan nga naglibut kaniya. Mao kana ang labing espesyal sa tanang mga talento.”
Mga paghulagway pinaagi ni Natalie Malan