Pagpasiugda og mga Panaghisgutan sa Klase
Si Brother Johnson nangutana og usa ka pangutana sa klase sa Doktrina sa Ebanghelyo. Adunay taas nga kahilum nga mora og naghimo kaniya ug sa mga miyembro sa klase nga dili komportable. Isip usa ka stake Sunday School president nga nag-obserbar sa klase, ako nakabantay nga sa dihang ang pipila sa mga miyembro sa klase mokomento na unta, si Brother Johnson mitubag sa pangutana ug mipadayon sa lain nga bahin sa leksyon.
Kini mahitabo sa mga klase sa Simbahan ingon man sa pagtudlo sa atong mga panimalay. Akong nakat-unan nga duha ka mga butang ang kinahanglan aron sa pag-awhag og mga panaghisgutan sa klase: (1) pangutana og mga pangutana nga adunay labaw pa sa usa ka posible nga tubag ug (2) hatagi ang mga miyembro sa klase og igong panahon sa pagpangita o paghunahuna sa tubag.
Pangutana og mga Pangutana nga Dili Limitado ang Tubag
Ang pagpangutana og sakto nga mga pangutana modala ngadto sa maayo nga mga panaghisgutan sa klase. Ang mga manwal sa Simbahan puno sa mabinantayon nga pagkahimo nga mga pangutana nga gidesinyo aron sa pag-awhag sa mga miyembro sa klase aron sa pagsiksik sa mga pagtulun-an alang sa mga tubag o sa pagpamalandong ug sa pagbuhat unsay ilang nakat-unan.
Ikaw mahimong mangutana nga magkinahanglan sa mga estudyante sa pagsiksik sa mga kasulatan o sa mga pulong sa mga apostoles ug mga propeta sa ulahing mga adlaw alang sa impormasyon. Aniay duha ka mga ehemplo sa mga pangutana nga makapasiksik nga gibase sa mga sugyot sa pagtudlo sa Mga Pagtulun-an sa mga Presidente sa Simbahan: Joseph Smith: “Tun-i ang seksyon nga nagsugod sa pahina 61. Unsa ang gibuhat sa Manluluwas aron kita mamahimong isig ka mga manununod uban Kaniya?” ug “Tun-i pag-usab ang seksyon nga nagsugod sa pahina 252. Unsa man ang gitudlo ni Joseph Smith kabahin sa kaimportante sa pag-angkon og pisikal nga lawas?”
Ang ubang mga pangutana ipangutana sa mga miyembro sa klase sa paghunahuna kabahin sa kahulugan sa unsay ilang nabasahan o sa paggamit sa ilang mga kinabuhi sa unsay ilang nakat-unan. Kini nga mga pangutana sa kasagaran ipangutana human nga ang mga miyembro sa klase nahimong pamilyar sa mga materyal sa leksyon. Pananglitan, human og pangutana sa mga pangutana nga makapasiksik nga anaa sa ibabaw, ikaw mahimong mangutana sa mosunod nga mga pangutana aron sa pagtabang sa mga miyembro sa klase sa paghunahuna ug paggamit sa unsay ilang nabasahan: “Unsa ang mga pamaagi nga atong mapakita sa Ginoo ang atong pagkamapasalamaton alang sa Iyang maulaong sakripisyo?” o “Sa unsang paagi nga ang pagsabut sa kaimportante sa pag-angkon og pisikal nga lawas makaapekto sa pamaagi sa atong pag-amping sa atong lawas?”
Paabuta ang mga Tubag sa Estudyante
Bisan og unsa ang mga pangutana nga imong gipangutana, hatagi ang mga miyembro sa klase og igong panahon sa pagpangita o paghunahuna kabahin sa tubag. Ang mga estudyante makakat-on sa pagtubag sa mga pangutana kon sila makahibalo nga dili nimo tubagon ang pangutana para nila.
Human sa akong kasinatian sa klase ni Brother Johnson, ako nakahukom sa pagbantay kon unsa ka dugay ang mga magtudtudlo mag-paabut og tubag human sila mangutana. Akong nakita nga kadaghanan sa mga magtutudlo magpaabut lamang og duha o tulo ka mga segundo, bisan kon ako silang pangutan-on, sila naghunahuna nga dugay na silang nagpaabut. Ang mga estudyante, sa laing bahin, miingon kanako nga sila nagkinahanglan og mas daghang panahon aron sa paghunahuna sa ilang mga tubag.
Aron sa pagsulay sa pagtabang sa mga magtudtudlo nga makakuha og mas daghang pagsalmot sa klase, ako miawhag kanila nga hilum nga mag-ihap ngadto sa 20 human og pangutana, paghatag sa klase og panahon sa pagpamalandong. Sila nakakat-on sa pagsulti sama sa “Hatagan ko kamo og panahon sa paghunahuna” o “Palihug buhata ang pagpamalandong niini nga pangutana, ug dayon ako mangayo og mga tubag.” Samtang ang mga magtutudlo sa akong stake nagsugod sa pagbuhat niini, ang mga pagsalmot sa klase mitaas ug ang mga miyembro sa klase mibati sa Espiritu samtang sila nagsugod sa “pagtudlo sa usag usa” (D&P 88:77).
Ako nakatambong og usa ka klase diin ang magtutudlo mihatag sa mga miyembro sa klase og sobra sa duha ka minuto aron sa pagpamalandong sa pangutana kabahin sa paggamit sa doktrina sa ebanghelyo. Alang kanako usa kadto ka panahon sa hilum nga pagpamalandong. Ako mibati sa Espiritu ug nakaangkon og mga panabut kabahin sa doktrina nga dili gayud nako unta makat-onan kon wala pa kadto nga panahon sa akong kaugalingon. Kini nga piho nga kasinatian mitabang kanako sa pagsabut nga ang paghatag og panahon alang sa mga miyembro sa klase aron sa pagpamalandong sa pangutana mohatag kanila og panahon sa paghunahuna og mas lawom ug sa pagpaminaw sa Espiritu. (Tan-awa sa 3 Nephi 17:1–3.)
Ang inyong klase o pamilya makatagamtam niining susama nga mga espirituhanong mga kasinatian panahon sa diskusyon kon kamo mogamit og mga pangutana nga dili limitado ang tubag ug dayon hatagan ang matag usa og panahon sa pagpamalandong sa dili pa motubag.
Mga litrato pinaagi ni Welden C. Andersen
Kon ikaw magtudlo, sulayi kining mga tabang sa pagtudlo aron sa pagpanindot sa pagsalmot sa klase.