Pagbuntog sa Babag sa Pinulongan
Ang mga miyembro sa tibuok kalibutan moduol ngadto sa Ginoo aron sa pagpangita og mga pamaagi sa pagpakig-istorya uban sa ilang mga kaigsoonan sa ebanghelyo.
Sa dihang si Kazue Horikami mibalhin gikan sa iyang lumad nga dapit sa Japan ngadto sa Hawaii isip usa ka young adult, siya nagkinahanglan og gamay nga pagkat-on sa Iningles. Siya mosulti og Japanese sa balay, adto mamalit sa mga dapit diin adunay daghang mosulti og Japanese, ug sa kaulahian mitrabaho isip usa ka tiggiya sa turista nga mga Japanese. Ang lugar lamang diin siya usahay makasugat og babag sa pinulongan mao ang sa simbahan—usa ka kasagarang mahitabo ngadto sa kadaghanan sa mga Santos sa Ulahing mga Adlaw. Apan bisan sa simbahan siya makasabut pinaagi sa pagpakighigala uban sa tulo o upat ka mga sister kinsa makasulti sa iyang lumad nga pinulongan.
Dayon, labaw sa 25 ka tuig nga pagpuyo sa Hawaii, si Sister Horikami gitawag nga mahimong presidente sa Relief Society sa iyang ward, usa ka kahimtang nga siya mibati nga nabug-atan. “Kadaghanan sa mga sister mosulti lamang og Iningles, ug ang uban mosulti lamang og Samoan o Tagalog,” siya mihinumdom. “Niana nga punto ako mahimong makasabut ra og maayo sa lain nga mga pinulongan, apan wala koy salig nga mosulti niini. Bisan og ako makasabut sa kadaghanan nga gipangsulti sa mga sister, ako naghunahuna unsaon nako sa pag-alagad kanila nga ako dili man gani makaistorya kanila.
Si Sister Horikami nasayud nga ang pagkuha og mga klase sa pinulongan dili mahimo—siya wala nay panahon para niana. Siya mipahayag sa iyang problema ngadto sa iyang stake president atol sa interbyu alang sa temple recommend. “Ako misulti kaniya nga ako nahadlok—dili lamang sa mga responsibilidad apan usab nga makamugna og dili pagsinabtanay,” siya miingon. Ang stake president mahunahunaong mihunong sa makadiyot ug dayon miingon kang Sister Horakami nga dili mabalaka kabahin sa pinulongan, bisan man lang dili lamang sa karon dayon. “Himoa ang kutob sa imong mahimo,” siya miingon. Siya misaad nga iyang buhaton.
Mga adlaw ang milabay, sa dihang si Sister Horikami didto sa templo, ang sugilanon ni Pedro nga naglakaw ibabaw sa tubig misulod sa iyang hunahuna (tan-awa sa Mateo 14:22–33). “Akong naamgohan nga kon ako padayon nga mohawid sa akong kahadlok, ako malunod,” siya miingon. “Apan kon akong ibutang ang akong hugot nga pagtuo sa Manluluwas, Siya motabang kanako nga mahimo ang imposible.”
“Ang imposible” nagsugod sa yano, hinoon gamhanang, mga paningkamot. Si Sister Horikami mihinumdum nga naggahin og taas nga panahon sa paglantaw sa listahan sa Relief Society. “Samtang ako nagtuon sa mga pangalan sa indibidwal nga sister, ako miila sa mga panghunahuna nga misulod sa akong hunahuna kabahin niana nga sister, ug ako mibati sa mga pag-aghat kabahin sa mga pamaagi nga ako makaalagad kaniya. Samtang ako misunod niadto nga mga pag-aghat, ako natingala sa pagdiskubre unsa ka piho ug ka personal niini.
“Mao kana ang paagi nga ako misugod,” siya mipadayon. “Sa pipila ka mga bulan kadtong ginagmay nga mga buhat nahimo ngadtong sa usa ka relasyon sa pag-atiman ug pagpakabana, dili lamang sa akong pag-atiman kanila apan usab sa ilang pag-atiman kanako.”
Si Sister Horikami sa katapusan nakakat-on og Iningles, apan siya dali nga mopahayag nga mao kadto ang Espiritu—dili sa kahanas sa bisan unsa nga pinulongan—ang mitabang kaniya sa pag-alagad. “Ako nakakat-on nga ang Espiritu dili mapugngan pinaagi sa pinulongan,” misulat si Sister Horikami. “Siya mosulti kanatong tanan sa mga pamaagi nga kita makasabut.”
Sama ni Sister Horikami, ang mga miyembro sa Simbahan sa tibuok kalibutan nakasinati sa kahigawad ug pag-inusara nga mahimong mouban sa mga babag sa pinulongan. Apan sama usab ni Sister Horikami, sila ug ang ilang mga lider mahimong moduol sa Ginoo alang sa panabang. Ang mosunod nga mga ideya sa pagbuntog sa babag sa pinulongan nagagagikan sa mga miyembro ug mga lider sa tibuok kalibutan.
Hunahunaa Nga ang Pinulongan Ikaduha Lamang
Ang pagbuntog sa mga babag sa pinulongan usa ka pamilyar nga hagit sa Stake sa Frankfurt Germany, diin ang mga miyembro nagagikan sa labaw sa 80 ka mga nasud. Apan ang pinulongan, miingon ang stake president nga si Axel Leimer, mao ang ikaduha lamang nga mahinungdanon.
Si Presidente Leimer, kansa ang iyang pamilya mismo dili makasulti og German sa ilang unang pagbalhin sa Frankfurt, miila nga ang iyang mga anak ug ang anak sa lain pang pamilya mao tingali ang labing maayo nga mga ehemplo niini. “Wala sila mawagtangi og gana bisan sa kamatuoran nga sila dili magkasinabtanay sa usag usa,” siya miingon “Sila nakigduwa gihapon uban sa lain nga mga bata. Alang kanila, ang panaglahi sa pinulongan dili igsapayan. Sila wala pa makasulay nga gisaway o nahadlok.”
Si Presidente Leimer mipahibalo nga daghan sa mga magtiayon nga mga misyonaryo mosulti og Iningles kinsa mialagad sa mga calling sa ward dinhi sa stake nga wala mabalda bisan sa mga panaglahi sa pinulongan. “Daghanan niining mga magtiayon dili makasulti og German, apan sila nagdala og daghang mga kasinatian ngadto sa ilang mga buluhaton ug naghimo og mahinungdanon nga mga kontribusyon,” siya miingon. “Ang mga sister mialagad sa nursery, sa mga klase sa Primary, ug isip mga librarian, lakip na ang pagtukod og usa ka librarya nga wala pa gayud nahimo sa una. Ang pipila sa mga kalalakin-an mialagad isip mga lider sa grupo sa high priest, mga finance clerk, ug mga home teacher. Sila moapil sa mga klase (uban sa usa ka tawo nga mohubad sa ilang gipangsulti) ug gani usahay motudlo.
“Ang komon nga pundasyon sa ebanghelyo sa kanunay mao lamang ang gikinahanglan sa mga katawhan,” mipadayon si Presidente Leimer. “Ako nakabantay sa mga panagsultihanay sa mga lawak tigumanan diin ang bisan usa sa mga nagsultihanay dili mosulti sa ilang pinulongan, apan sila mora og nagkasinabtanay sa usag usa. Ikaw makasulti sa importante nga mga butang bisan unsa pa man ang pinulongan: ‘Ako nahigugma sa Ginoo. Ako nagpakabana kabahin sa akong mga kaigsoonan. Anaa ko dinhi aron motabang.’”
Tabangi ang mga Tawo nga Mobati nga Komportable sa Panimalay
Sa daghang mga hitabo sa mga ward ug mga branch makahimo sa pagpahiluna sa mga tawo sa mga paagi nga motabang kanila nga mobati nga komportable sa panimalay. Sa McCully Ward sa Honolulu Hawaii Stake, sama pananglit, ang Sunday School gitudlo sa walo ka mga pinulongan (Chuukese, English, Japanese, Korean, Marshallese, Pohnpeian, Spanish, ug Tagalog) aron ang kadaghanan sa mga miyembro makadungog sa ebanghelyo nga gitudlo sa ilang kaugalingong pinulongan. Dugang pa niana, ang mga miyembro kinsa gitawag sa pag-ampo sa miting sa sakrament o sa mga klase mohimo niini sa ilang lumad nga pinulongan kon sila dili andam nga moampo sa pinulongan sa kadaghanan sa mga miyembro.
Samtang ang lain-lain nga mga klase sa Sunday School naghatag og importante nga bahin, ang McCully Ward usab naghimo og mga paningkamot sa pagplano og mga kalihokan nga mopundok sa tanan. Ang kanunay nga mga kalihokan sama sa tinuig nga internasyonal nga pista sa pagkaon, mga pasundayag sa kultura sa Mutual, usa ka Micronesian choir (dugang sa choir sa ward), ug matag tulo ka bulan nga “ohana night” (gabii sa pamilya) uban sa tibuok nga mga miyembro sa ward mosaulog sa talagsaon nga mga kabilin sa kultura ug hatagan og gibug-aton ang ilang magkapareho nga espirituhanong kabilin.
“Kitang tanan mga anak sa atong Langitnong Amahan,” miingon si Marlo Lopez, bishop sa McCully Ward. “Sa Iyang panan-aw walay kalainan sa kaliwat o pinulongan. Ang gugma sa Dios alang sa tanan, ug kita mga instrumento lamang sa pagtudlo niining kamatuoran.”
Sunda ang Kultura kon Asa Ka Nagpuyo
Samtang daghang mga tawo ang nanghinaut nga ipabilin ang kamaayo sa ilang lumad nga natawhang pinulongan ug sa makapabayaw nga mga elemento sa ilang kultura, ang mga miyembro mahimo usab nga makabenepisyo gikan sa pagkat-on sa pinulongan ug kultura sa dapit kon asa sila karon magpuyo. Si Presidente Eric Malandain sa Paris France East Stake, nga naglakip sa mga miyembro gikan sa tibuok kalibutan, mipasiugda niini. “Ang mga lider sa kinatibuk-an nag-awhag sa mga miyembro nga nagpuyo dinhi nga magkat-on og French,” si Presidente Malandain miingon. “Kini makatabang kanila sa paglambo sa propesyonal, personal, ug espirituhanon nga paagi.”
Ang mga miyembro sa San Francisco California West Stake giawhag usab sa pagpalambo og dugang nga mga kahanas sa pinulongan. Dugang sa mga ward nga manulti og Iningles, ang stake naglakip og tulo ka yunit nga piho ang pinulongan (Chinese, Samoan, ug Tagalog) aron ang mga miyembro nga manulti niining mga pinulongan matudloan sa ebanghelyo sa ilang kaugalingong pinulongan. Apan ang mga lider sa stake ug ward nag-awhag usab sa mga miyembro sa pag-apil sa grupo nga nagkat-on sa pagpakig-istorya. Ang gamay nga “pundok” magkita kaduha sa usa ka semana aron sa pagkat-on sa sukaranan nga inistoryahan nga Iningles. Ang mga leksyon mopukos sa pagkat-on unsaon sa pagsulti sa hugpong sa mga pulong sama sa “Unsaon nako pag-adto sa ospital?” o “Asa ang labing duol nga hununganan sa bus?” Ug tungod kay daghang mga miyembro sa stake mga unang henerasyon usab nga mga Santos sa Ulahing mga Adlaw, ang pipila sa mga leksyon sa Iningles nakapokus usab ngadto sa mga sukaranan sa ebanghelyo, sama sa pag-ampo o paghimo og family home evening.
“Ang isyu sa pinulongan usa ka dakong hagit alang kanamo, apan amo kining gitrabaho, ug kami nag-anam-anam og kamaayo niini,” miingon si Ronald Dillender, stake president. “Kami mopadayon sa pagtrabaho, sa pagtudlo, ug sa paghatag sa mga miyembro og paagi nga makasabut sa matag stake conference, matag pasundayag sa talento, matag miting sa pagbansay, matag buhat. Kami gusto nga ang tanan adunay paagi nga makasabut sa tanan nga ikahatag sa Simbahan ug sa ebanghelyo. Kana hilabihan gayud kaimportante.”
Magtinabangay
Ang mga panaglahi sa pinulongan modala og daghang mga babag, miingon si Presidente Brent Olson sa Philadelphia Pennsylvania Stake, gikan sa pagbuhat sa mga interbyu sa temple recommend ngadto sa pagghubad og mga pakigpulong ug mga pag-ampo diha sa miting sa sakrament. Ang pagbaton og usa ka maabi-abihon, masinabtanon nga kinaiya nakahimo og dakong kalainan alang sa mga miyembro sa stake.
Si Presidente Olson miingon, “Kami adunay usa ka tema nga kanunay namo nga gibalik-balik sa among stake: bisan kinsa nga mosulod sa pultahan sa simbahan pinadala sa Ginoo. Sa dihang among gisunod kining kinaiya sa pagkamadawaton, kami nakaamgo nga ang sobra nga paningkamot nga among gibuhat sa pagtabang sa matag usa nga moapil dili usa ka palas-anon. Kini yano nga pagpuyo sa ebanghelyo.”
Bisan ang Clendon Ward sa Auckland New Zealand Manurewa Stake sa teknikal nga paagi usa ka yunit nga manulti og Iningles, ang mga miyembro usab makasulti og Maori, Niuean, Samoan, Tongan, lokal nga sinultihan, ug daghang mga pinulongan nga gisulti sa Cook Islands. Ang mga lider sa ward naningkamot nga mahimong sama sa Maayong Magbalantay, kinsa nasayud sa matag usa sa Iyang pundok—“bisan unsa pa man ang pinulongan ang ilang isulti,” si Bishop Hans Key miingon.
Sama pananglit, samtang ang mga buluhaton sa home ug visiting teaching mainampuong gikonsiderar, ang mga magka-uban mahimong mugnaon aron malakip ang usa ka igsoon nga lalaki kinsa makasulti sa iyang lumad nga pinulongan ug usa ka igsoon nga lalaki kinsa makasulti sa sama nga pinulongan ingon man usab sa Iningles. Samtang ang duha magtinabangay sa home teaching, ang una nga igsoon nga lalaki makaangkon og pagsalig sa Iningles. Sa kadugayan, siya tingali modawat na og buluhaton nga mamulong diha sa miting sa sakrament.
Hibaloi Nga ang Ginoo Mopasarang Kanato alang sa Iyang Buluhaton
Si Francisco Ayres Hermenegildo miapil sa Simbahan sa iyang lumad nga Rio de Janeiro, Brazil, sa edad nga 21 ug sa kaulahian mialagad og misyon sa São Paulo. Human siya ug ang iyang asawa, nga si Kallya, naminyo, sila mibalhin sa Sydney, Australia, pagka 2002. Pagka 2006 si Francisco gitawag nga mamahimong presidente sa Hyde Park young single adult branch. Si Presidente Hermenegildo mibati nga nabug-atan tungod kay dili lamang nga siya nagkat-on pa og Iningles apan usab ang mga miyembro sa branch mga lumad sa labaw sa 10 ka mga nasud, ug kadaghanan kanila nagkat-on pa usab og Iningles.
“Ako moangkon nga kami mibati nga dili sarang sa dihang kami gitawag sa pag-amuma sa Hyde Park Branch,” si Presidente Hermenegildo miingon. “Ang babag sa pinulongan hilabihan kadaghan, ug kami nag-ampo ngadto sa Ginoo alang sa Iyang panabang. Apan ako nakat-on nga ang Ginoo modasig, mopasarang, ug molig-on niadtong kinsa moapil sa pagtukod sa Iyang gingharian.”
Agi og dugang sa paggiya sa Ginoo sa iyang kaugalingong kinabuhi, si Presidente Hermenegildo nakakita niini sa mga kinabuhi sa mga miyembro sa branch—kadaghanan kanila, sama kaniya, mga unang henerasyon nga mga miyembro.
“Matag usa kanato gipadala dinhi niining panahon sa atong mga kinabuhi tungod sa usa ka rason,” siya miingon. Siya nagpasabut nga ang matag miyembro adunay kahigayunan sa pagpatubo sa pagpamatuod, pag-alagad og mga calling, ug pagpakigbahin sa mensahe sa ebanghelyo uban sa mga higala ug mga hinigugma.
“Kami nagtuo nga ang mga pagpadayag nga may kalabutan sa pagpuno sa kalibutan sa ebanghelyo nangahitabo,” miingon si Presidente Hermenegildo. “Ang mga miyembro sa branch mga lider ug mahimo nga lider bisan asa sila moadto sa kalibutan. Usa ka dako nga kahigayunan sa pagtabang sa pag-andam niadto nga mga lider, diin among gibuhat sa matag panahon nga kami motudlo ug moamuma sa mga miyembro sa branch.
Himoa nga Magkahiusa sa Kasingkasing ug sa Hunahuna
“Ako nagtuo nga kini usa ka panalangin kaysa usa ka hagit nga moalagad ug motrabaho sa usa ka ward nga daghan kaayong nagkalain-lain nga kultura ug pinulongan niini,” miingon si Bishop Hans Key sa Clendon Ward. “Ang Dios milibog sa pinulongan sa mga katawhan panahon sa pagtukod sa Tore sa Babel, apan kita naningkamot sa pagbuhat unsa ang nakab-ot sa katawhan sa Siyudad ni Enoch: nga mamahimong usa sa kasingkasing ug usa sa hunahuna ug nagpuyo diha sa pagkamatarung.” (Tan-awa sa Genesis 11:1–9; Moises 7:18.)
Kana nga pagkahiusa usab gihatagan og gibug-aton ni Presidente Gordon B. Hinckley (1910–2008): “Nahimo na kitang usa ka dakong Simbahan sa tibuok kalibutan, ug posible na karon alang sa kadaghanan sa atong mga miyembro sa pag-apil … isip usa ka dakong pamilya, nagsulti og daghang mga pinulongan, makita sa daghang kayutaan, apan ang tanan anaa sa usa ka pagtuo ug usa ka doktrina ug usa ka bunyag.”1
Bisan kon ang mga miyembro sa ward ug mga branch dili makasulti sa susama nga pinulongan, sila makabuntog sa babag ug makab-ot ang panaghiusa.
Paghulagway pinaagi ni Cary Henrie