Pagkaayo sa Pagkaadik Pagkaayo sa Usa ka Lakang Matag Higayon
Sa programa sa Simbahan nga pagkaayo gikan sa pagkaadik, kadtong kinsa nag-antus sa pagkaadik makat-on pinaagi sa Pag-ula ni Jesukristo unsaon pagsinati ang milagro sa pagpuyo sa pagkaayo.
Mga usa katuig ang milabay, ako nakamata sa usa ka dapit sa Illinois, lango sa drugas ug alkohol, ug ako wala makahinumdom og bisan unsa nga butang nga akong gibuhat. Ang akong nahinumduman lang mao nga sa akong pag-adto og business trip, sa dihang ang eroplano mitugpa na, mga 10 minutos lamang sa dihang ako nahilayo sa akong mga kauban sa trabaho, mideretso sa usa ka bar, ug ako nawala sulod sa tulo ka adlaw. Sa ikaduha nga adlaw—ang adlaw nga ako unta kinahanglan nga mosakay og eroplano pabalik sa panimalay—mao ang adlawng natawhan sa akong anak nga babaye. Sa miagi lamang nga tuig.
Sa miaging tuig si Mark (ang pangalan giusab) wala masayud unsaon niya sa pagbuntog ang iyang pagkaadik sa drugas ug alkohol. Siya misulay na sa paghunong. Siya mibisita uban sa iyang bishop, miadto na og mga propesyonal nga mga magtatambag, miagi na sa mga rehabilitation center, ug naningkamot pag-ayo sa tanan niyang mahimo, apan walay nahimo nga permanenteng kausaban. Sa wala madugay pagkahuman niadtong makuyaw nga panghitabo sa Illinois, siya nakakita sa programa sa Simbahan pinaagi sa 12 ka lakang sa pagkaayo gikan sa pagkaadik, gipasiugdahan sa LDS Family Services. Sa programa, iyang nakita ang mga baruganan ug direksyon nga mousab sa iyang kinabuhi.
Ang kausaban nahitabo samtang siya nagtuon ug mibuhat sa mga baruganan nga gitudlo sa program workbook ug matag semana nga mga miting sa pagkaayo. Ang workbook moggiya sa mga mambabasa padulong sa pagkaayo gamit ang 12 ka mga lakang, ang matag usa mopunting og usa ka importante nga baruganan sa pagkaayo sama sa pagkamatinuoron, paglaum, o pagsalig ngadto sa Dios. Sa miting matag semana, ang mga sumasalmot makaangkon og kalig-on gikan sa uban ug mopakigbahin sa ilang kaugalingong mga kasinatian sa pagbuhat sa mga baruganan.
Si Mark nakakat-on nga ang panaw gikan sa pagkaadik ngadto sa pagkaayo malisud, apan ang pagkaila sa mga tawo kinsa nagmalampuson niana nga panaw makahatag og paglaum niadtong kinsa nanglimbasog. Sa matag miting usa ka facilitator—usa ka tawo kinsa nakasinati na sa pagkaayo—moawhag sa uban pinaagi sa pagpakigbahin og mga kaalam basi sa iyang kaugalingong pagkaayo. Si Mark karon usa na ka facilitator. Matag semana siya mopakigbahin sa iyang mga kasinatian (nga gilakip niini nga artikulo nga naka-italics) aron sa pagtabang sa uban sa pagpasabut nga sila wala mag-inusara ug ang pagkaadik mahimo rang mabuntog.
Ang Laang sa Pagkaadik
Human sa matag higayon nga ako natintal, ako moingon, “Kining panahona mahimong lahi na. Palihug, Ginoo, tabangi ako. Ako dili na gusto nga kini mahimong kabahin pa sa akong kinabuhi.” Apan kini nagpadayon.
Si Mark usa ka aktibo nga miyembro sa Simbahan. Siya wala gayud magtuo nga siya masulod sa laang sa pagkaadik. Ang pagpuyo sa mga sumbanan sa Simbahan, sama sa Pulong sa Kaalam, mopahilayo sa mga miyembro sa daghang makapaadik nga mga linihokan, apan sa kalibutan nga ang makadaut nga mga impluwensiya hilabihan nga mikuyanap, ang pagkaadik usa ka nagtubo nga problema, bisan sa mga Santos sa Ulahing mga Adlaw. Hinoon si Mark nanlimbasog batok sa alkohol ug drugas, ang pagkaadik dili lamang limitado ngadto sa pag-abuso sa butang. Kini mahimong maglakip og sugal, pornograpiya, dili tarung nga pagkaon, dili angayang batasan sa pagpakighilawas, ug hilabihan nga magsalig ngadto sa lain nga tawo.
Sa bisan unsang panahon sa miting sa pagkaayo, nagkalain-laing pagkaadik ang napresentar. Si Steve, pananglitan, siya naadik ngadto sa giresita nga mga tambal. Sa sinugdanan siya miinom og tambal alang sa sakit sa iyang likod, apan human sa pagkaayo sa sakit, siya namakak ug sa katapusan nangawat aron lang makakuha og mas daghang giresita nga mga tambal. Si Steve, kinsa mialagad isip counselor sa bishopric, napriso nga nagsul-ob sa iyang sinina nga pangsimba usa ka Dominggo nga unta siya ang mo-conduct sa miting sa sakrament. Mao kadto ang punto nga iyang nasayran nga siya nagkinahanglan og tabang.
Sa pipila ka mga lugar, mga grupo ang gihimo para lamang adunay maduolan sa mga problema sa pornograpiya. Si Garrett, kinsa kanunay motambong niini nga grupo, miingon nga sa sinugdanan siya wala makaamgo nga ang iyang binuhatan usa ka pagkaadik. “Dili gayud ako mopalit og magasin sa pornograpiya, apan sayon lamang kaayo ang pagtan-aw niini sa Internet,” siya miingon. Siya nakaamgo nga siya kinahanglan nga mag-usab sa dihang ang iyang kaminyoon duol na sa pagkabungkag.
Pag-apil sa Programa
Ang akong kulang sa abilidad sa pagtakdo sa akong pagpamatuod uban sa akong batasan, inubanan sa akong kakulang sa abilidad sa pagwagtang sa akong pagkaadik, mibutang kanako sa usa ka dapit diin ang kaulaw ingon og dili gayud maagwanta. Sa katapusan, ako andam na nga mosulay og lahi nga butang.
Ang kanunay nga gibalik-balik nga hugpong sa mga pulong sa mga sumasalmot mao nga ang indibidwal mangita og kaayohan “kon ang kasakit sa problema mas grabe kaysa kasakit sa solusyon.” Sa dihang si Mark miabut niana nga punto, siya misunod sa sugyot sa usa ka higala ug miadto sa miting sa pag-ayo sa pagkaadik. Kadaghanan sa mga tawo mihukom mismo sa ilang kaugalingon nga moadto. Ang uban nadasig nga moapil pinaagi sa ilang mga higala o mga lider sa priesthood. Ang pipila gimandoan sa korte sa balaod sa pag-apil sa mga miting sa 12 ka lakang sa pag-ayo.
Daghan ang nagduhaduha sa pag-apil sa miting tungod kay sila mibati og kaulaw sa ilang panglimbasog. Sa iyang buluhaton isip usa ka Church-service missionary, si Suzanne natingala nga makakita sa kausaban nga miabut sa mga sumasalmot. “Sa bag-o pa silang miapil sa mga miting,” siya miingon, “ang ilang mga ulo kanunay nagduko. Sila naulaw ug napuno uban sala ug kahadlok. Human sa pipila ka mga semana ang ilang mga ulo pinahangad na uban sa bag-ong nakita nga paglaum. Sila nakaamgo nga sila wala nag-inusara sa ilang mga panlimbasog.”
Ang mga Church-service missionary andam sa pag-abi-abi sa mga sumasalmot ug mohalad kanila og paglaum ug pagdasig. Ang mga sumasalmot mopokus sa lahing lakang gikan sa workbook matag semana, ug ang facilitator mopakigbahin sa iyang kaugalingong kasinatian kabahin niana nga lakang. Niadtong kinsa gusto nga mopakigbahin sa ilang mga hunahuna sa pagkaayo ipaila-ila ang ilang mga kaugalingon pinaagi sa ilang unang ngalan lamang. Ang miting kanunay nga maglakip og usa ka pahinumdom sa mga baruganan sa pagkawala hiilhi ug pagkakompidensyal, diin importante kaayo sa pagpalambo og usa ka luwas nga kahimtang.
Ang importante nga aspeto sa mga miting mao nga ang sumasalmot mahimutang diin sila makabati sa Espiritu pag-usab. Sila makaampo ug makapamatuod, bisan kon ang ilang mga pagpili midala kanila sa pagka-disfellowship ug pagka-excommunicate. Kini nga espirituhanong kahimtang usa ka tinubdan sa dakong kalig-on ngadto sa mga sumasalmot samtang sila nagpokus sa 12 ka mga lakang.
Mga Lakang sa Pag-ayo
Ang pagbuhat sa mga lakang niini nga programa mipayano sa ebanghelyo sa usa ka paagi nga akong magamit ang pagpamatuod nga anaa kanako sa kanunay.
Sama sa nadiskobrehan ni Mark, ang mga lakang sa programa sa pagkaayo sa pagkaadik usa ka nakahan-ay nga mga paagi sa pagpatuman sa mga baruganan sa ebanghelyo. Ang 12 ka mga lakang gikuha gikan sa orihinal nga Twelve Steps of Alcoholic Anonymous, apan ang programa sa Simbahan walay sama tungod kay kini naghan-ay sa mga lakang ngadto sa “usa ka gilatid nga mga doktrina ug mga pagtuo sa Simbahan.”1 Sa programa sa pagkaayo sa pagkaadik , ang 12 ka mga lakang sa tinuoray mga lakang aron makatagamtan sa gahum sa Pag-ula.
Ang workbook nga, Addiction Recovery Program: A Guide to Addiction Recovery and Healing (aytem nu. 36764), milatid sa 12 ka mga lakang ug mga baruganan nga may kalabutan niini. Ang matag lakang adunay usa ka seksyon sa pagtuon sa kasulatan uban sa mga pangutana nga hinuklugan ug luna nga kasulatan. Usa ka sumasalmot miingon nga ang direkta nga pamaagi sa 12 ka mga lakang naghatag kaniya og paglaum. Sa dihang si Clifford nahigmata na gikan sa pagka-coma tungod sa sobrang paggamit og drugas, ang iyang kaminyoon ug panginabuhi nawala na. Siya naghunahuna unsaon niya sa paghiusa pag-usab ang iyang kinabuhi. “Sa paghimo niini sa ebanghelyo ngadto sa gagmay nga mga lakang, kining 12—ako makahimo niana,” siya miingon.
Daghan ang miingon nga ang ikaupat ug ang ikalima nga lakang, nga nagpokus sa personal nga pag-eksamin ug pangumpisal, mao ang labing lisud sa tanan. Apan kini mag-agad sa indibidwal. Si Paula, kinsa namlimbasug sa lisud pugngan nga pagkaon ug nagsalig kaayo sa iyang pakigrelasyon, naglisud gayud sa ikawalo nga lakang —pagpasaylo ug pagpahiuli sa mga relasyon —samtang siya naningkamot nga mopasaylo sa iyang abusado nga amahan. Siya misulti karon, “Ako dili makasulti kanimo unsa ako kamapasalamaton tungod niining milagro sa akong kinabuhi: sa paghigugma ug pagpasaylo.”
Paglaum pinaagi sa Pag-ula
Ang kausaban nga nahitabo ngari kanako mao nga ako dili miserable sa tanang panahon. Usahay kini dili sayon. Siguro ang Ginoo wala pa makakita nga kining tanan angayan nga kuhaon gikan kanako karon, apan Siya naglig-on kanako aron ako makaagwanta niini sa mapainubsanong paagi ug sa malipayong paagi, ug ako mahimong molambo. Siya mipagaan niini igo lamang nga ako makakat-on kutob sa akong mahimo.
Ang ebanghelyo nagtudlo kanato nga ang grasya moabut pinaagi sa Pag-ula ni Jesukristo (tan-awa sa Ether 12:27). Ang grasya usa ka gahum nga makahimo sa pagkaayo posible. Kini usa ka “balaanong pamaagi sa pagtabang o paglig-on” nga motabang kanato sa pagbuhat og maayong buluhaton nga dili nato mahimo o mapadayon sa atong mga kaugalingon.2
Si Suzanne, kinsa miagi sa programa mismo sa iyang kaugalingon sa wala pa nahimong usa ka Church-service missionary miingon, “Ako nasayud nga ang Ginoo mosulti kanako unsa ang angayan buhaton, apan ako wala masayud nga Siya adunay gahum sa pagtabang kanako sa pagbuhat niini. Karon ako nakasabut nga ang grasya moabut pinaagi sa Pag-ula ni Jesukristo.”
Pinaagi sa grasya, ang mga sumasalmot makaangkon pagbalik og paglaum nga nawala kanila. Usa ka sumasalmot, si Edward, nagtubo sa Simbahan, apan ang iyang kahuyang mipabilin kaniya og pagbati nga siya dili sama ka maayo sa ubang mga tawo. Siya miingon, “Ako wala makasabut sa Pag-ula, ug ako dili ganahan sa akong kaugalingon, busa wala ray problema.” Sa dihang siya anaa sa iyang mga ika-20, nga edad siya misugod sa pag-inom ug paggamit og drugas sa tinguha nga mawala ang iyang negatibong mga pagbati—usa ka sumbanan nga nagpadayon sulod sa 20 ka tuig.
Sa dihang siya giaresto sa ikaduha nga higayon sa pagmaneho nga hubog, siya gimandoan sa pagpatambal. Sa programa sa Simbahan, siya nakakat-on nga ang pagdawat og kapasayloan ug pag-angkon og balik og usa ka balatian nga may bili ang kaugalingon posible diay. Mosimba siya matag Dominggo, mituon sa 12 ka mga lakang, ug mibuhat niini nga mga baruganan ug mga buhat sa ebanghelyo ngadto sa iyang kinabuhi. Siya nahimong andam nga motugyan sa iyang kaugalingon ngadto sa Langitnong Amahan ug, sa proseso, nakakat-on unsaon sa paghigugma ang iyang kaugalingon ug unsaon sa Pag-ula nga moepekto sa iyang kaugalingon. “Ako dili makabuntog niining tanang butang sa akong kaugalingon lamang,” siya miingon. “Ang Manluluwas makahimo para kanako unsa kadtong dili nako mabuhat sa akong kaugalingon.”
Kinsa kadtong nanlimbasog batok sa pagkaadik dili lamang mao ang makasinati og dakong kausaban: ang ilang mga hinigugma nakakita nga samtang sila mibuhat sa 12 ka mga lakang sa ilang mga kaugalingong kinabuhi ug mitambong og mga miting sa pagkaayo, sila makasinati og mga panalangin sa Pag-ula kabahin usab sa ilang kaugalingong kasub-anan. Sa pipila ka mga lugar nga ang programa sa pagkaayo sa pagkaadik mosangkap og mga grupo nga mosuporta alang sa pamilya ug mga higala, kinsa nakadiskobre nga ang Manluluwas makaayo kanila sa ilang kasakit, kasuko, ug sala nga usahay mabati sa mga hinigugma.
Sa dihang si Deborah nasayud kabahin sa pagkaadik sa iyang anak nga lalaki, siya gihugpaan sa pagbati nga nakasala samtang siya naghunahuna nga unta siya nahimong mas maayo nga inahan. Dayon siya nakadiskobre nga iyang magamit ang mga lakang alang sa iyang kaugalingon. Siya miingon, “Unsa ang akong nakat-onan sa programa mao nga bisan maunsa pa man akong anak nga lalaki, ako mahimo gihapong malipayon ug maanaa ang Langitnong Amahan sa akong kinabuhi. Siya midugang, “Nga kon tan-awon sa gawas ako mao lang gihapon, apan ang akong kinabuhi hingpit nga nausab sa sulod.”
Si Shannon, kinsang bana nag-antus sa pagkaadik sa pornograpiya, mitambong sa grupo nga mosuporta sa mga asawa. Samtang siya miapil, siya nakabantay og usa ka kausaban sa iyang kinabuhi usab. Sa sinugdanan siya nagpokus sa kasakit nga iyang gibati sa pagkaadik sa iyang bana. Apan, sa dihang siya misugod sa pagkat-on ug pagbuhat sa mga lakang, usa ka milagrosong kausaban ang nahitabo. Siya miingon, “ako misugod sa pag-istorya og mas gamay mahitungod sa akong bana ug mas daghan kabahin sa unsa ang akong nakat-unan gikan sa matag lakang. Ako misugod sa pagkakita kon giunsa sa Ginoo sa pag-usab sa akong kinabuhi.”
Ang Katapusang Tumong
Sa nangagi ako nakahimo sa paglikay niini sulod sa mas taas nga higayon. Akong nadala og balik ang maayo nako nga dungog sa Simbahan ug mialagad og mga calling, ug ang tanan moingon kanako unsa ako ka maayo. Apan ako wala gayud mibati og kamaayo sulod kanako. Ug mao kana nga ang paglikay mao ang usa ka bahin niini. Ang tinud-anay nga pagkaayo mao ang dili pagbuhat niini ug dili na gusto nga mobuhat niini tungod ang atong kinaiya nausab na.
Si Mark nakakat-on nga pinaagi sa Pag-ula, ang mga indibidwal dili lamang makahunong sa ilang mga makaadik nga kinaiya apan usab makaayo sa pinaka hinungdan sa ilang pagkaadik. Ug uban sa tabang sa mga lider sa priesthood, sila makahinulsol ug makadala og mga panalangin sa ebanghelyo balik sa ilang mga kinabuhi. Si Doug LeCheminant sa LDS Family Services miklaro sa tumong sa programa: “Ang among katapusang tumong niadtong naa sa programa mao nga sila makahimo ug makasunod sa mga pakigsaad sa templo—dili lamang kay magpabiling malinawon.” Ang labing tam-is nga bunga mao ang pagkaaktibo og usab, pagbunyag o pagbunyag og usab, pagpadayon sa priesthood, mga ordinansa sa templo, ug pagpahiuli sa mga panalangin.
Si Steve, nga nakakita sa iyang kaugalingon sa prisohan nga nagsul-ob sa iyang sinina para simba, miingon, “Karon ako limpyo ug malinawon tungod sa akong Langitnong Amahan ug sa 12 ka mga lakang.” Ang iyang pagkaaktibo sa Simbahan may espesyal nga kahulugan ngadto kaniya. “Ako usa ka amahan. Ako usa ka tigtambag sa korum sa priest. Ako usa usab ka facilitator tungod kay ako gustong makabawi ngadto sa usa ka programa nga naghatag og kagawasan kanako.”
Pagpadayon sa Pagkaayo Matag Adlaw
Matag adlaw ako mangita sa akong Langitnong Amahan pinaagi sa pag-ampo ug pinaagi sa mga kasulatan. Sa buntag ako mobasa sa libro kabahin sa pagkaayo, ug ako mosulat sa akong mga pagbati ug sa akong mga hunahuna. Ako motawag og usa ka tawo nga nagsuporta sa programa aron sa pagtabang kanako nga maklaro ang akong gihunahuna. Ako motambong sa mga miting. Ako misulay sa pagpangalagad. Ug ako dili na gayud mobalik niadtong adlaw nga ako mibuhat adtong mga butang.
Kadtong mga inadlaw nga buluhaton padayon nga nakatabang ni Mark nga mamaayo sa espirituhanong paagi. Ang uban kinsa nakaagi sa programa nakadiskubre sa sama nga kamatuoran: ang pagpabilin sa espirituhanong kalig-on nagkinahanglan og mapadayunong paningkamot. Walay usa nga hingpit na nga luwas sa dili na paghimo og usab niini, apan pinaagi sa pagpuyo sa ebanghelyo matag adlaw, kinsa kadtong nanglimbasog batok sa pagkaadik makabalik kang Kristo ug makadawat og kalig-on ug paglaum.
“Ako nagkat-on sa ginagmay, lagda human sa usa ka lagda,” miingon si Mark. “Ang akong kinaiya nausab, ug kini ang pinakaunang higayon sukad ako nagsugod sa pag-ingon nga ako aduna diay paglaum. Ako tinud-anay nga nagtuo nga ako dili na gayud mousab pa niini.”
Ang grasya, nga usa ka gahum nga moabut pinaagi sa Pag-ula ni Jesukristo, mohimo sa posible nga pagkaayo.” Pinaagi sa grasya, ang mga sumasalmot sa programa sa pagkaayo makaangkon pagbalik og paglaum nga nawala kanila.
The Ascent, ni David Edward Linn, sa maayong kabubut-on sa Church History
Si Kristo sa Getsemani, ni Heinrich Hofmann, sa maayong kabubut-on as C. Harrison Conroy Co.; gilitratohan sa Busath Photography
Mga paghulagway sa litrato pinaagi ni Craig Dimond ug David Stoker, gibarugan sa mga modelo; The Ascent, ni David Edward Linn, sa maayong kabubut-on sa Avampato Museum of Art