Higala ngadto sa Higala
Kalig-on sa Pagsunod sa Ginoo
Gikan sa usa ka interbyu ni Elder Claudio D. Zivic sa Seventy, nagserbisyo karon sa South America South Area Presidency; ni Sarah Cutler
“Kay ako ang Ginoo, … mahimuot sa pagpasidungog niadto kinsa nag-alagad kanako sa pagkamatarung ug diha sa kamatuoran” (D&P 76:5).
Ang pagdagan mao ang usa sa akong paborito nga mga kalihokan sa gamay pa ako. Apil ako sa track and field nga team, ug ang akong kinaham mao ang 800-meter dash. Nagpasabut kana nga ako modagan og duha ka mga tuyok libut sa track.
Ang akong pangandoy mao nga makaapil sa Olympics. Ang akong tigbansay usa ka atleta sa Olympic kaniadto. Nagtuo siya nga ako may igong abilidad aron makaapil sa Olympic kon magpraktis ako og maayo.
Nagpraktis ako og maayo ug midagan og daghang mga lumba. Sa nag-edad ako og 15, ako tsampyon nga nakakuha sa ikaduhang dapit sa akong kategoriya sa tibuok nasud sa Argentina. Naglaum ako nga kon ako magpadayon sa pagpaningkamot, tingali makaapil ako sa Olympic.
Apan adunay problema. Sa kasagaran ang among lumba himoon sa Dominggo. Sa wala madugay nakaamgo ako nga ako dili makapadayon sa pagpakigsangka. Mao nga gipili nako nga moundang sa pagdagan.
Ang pagpili lisud. Kalimtan na lang nako ang akong pangandoy nga makaapil sa Olympic. Ang akong tigbansay wala makasabut nganong miundang ko. Apan nasayud ako nga ako mihimo og maayo nga desisyon. Bisan og ang sports maayo nga butang, ang pagpili sa pagsunod sa Ginoo ug sa Iyang Simbahan mas labing maayo.
Sa wala madugay, samtang nagserbisyo ako sa militar, gipadala ako ngadto sa usa ka rehimen (usa ka yunit sa militar) duol sa Andes Mountains. Sa dihang akong nadawat ang akong assignment, akong gibati nga ang Ginoo adunay espesyal nga butang alang kanako nga pagabuhaton didto. Ako nag-ampo og maayo, nangutana, “Unsay akong katuyoan dinhi?”
Paglabay sa tulo ka bulan nga didto na ako, ang among opisyal miingon, “Gusto ko nga mag-organisar og usa ka club alang sa mga sundalo.” Gusto siya nga adunay lugar alang namo nga makabasa, makapaminaw sa musika, makadula, makasulat, ug makapahulay. Ang Espiritu Santo mitabang kanako nga makahibalo nga kini mao ang gusto sa Ginoo nga akong buhaton. Gihangyo ako nga maoy mahimong presidente sa club. Ang pag-andam sa club daghan kaayo nga buluhaton. Among gipintalan ug gisangkapan ang bilding nga among gamiton.
Sa pangbukas nga seremonya sa club, gihangyo ako nga mamulong sa atubangan sa mga opisyal ug sa mga sundalo. Aduna koy kahigayunan sa pagpakigbahin sa akong pagpamatuod sa ebanghelyo ug sa akong mga pagbati mahitungod sa Simbahan ngadto sa daghang mga sundalo kinsa wala magsunod sa mga sumbanan sa ebanghelyo. Silang tanan nasayud nga ako usa ka “Mormon boy” kinsa nagsunod sa akong mga sumbanan. Wala ako magbuhat sa mga butang nga ilang gibuhat, apan mirespetar sila kanako. Ang mga opisyal mirespetar usab nako. Usa kanila miingon ngari kanako, “Midayeg ako kanimo sa imong mga sumbanan.”
Ayaw gayud kahadlok sa pagsulti sa mga tawo unsay inyong gituohan ug unsa ang inyong mga sumbanan. Dili kinahanglan nga inyong itago si kinsa kamo. Ako nasayud nga ang Ginoo mopanalangin kaninyo kon kamo may igong kaisug sa pagsunod Kaniya.
Ibabaw sa wala: Litrato pinaagi ni Craig Dimond; laing mga litrato sa maayong kabubut-on ni Elder Zivic
Sa edad nga 9.
Tuo: Si Elder Sybrowsky ug ang iyang pamilya niadtong 2007.
Ubos: Sa edad nga 15, mitadlas sa finish line sa 800-meter dash didto sa Buenos Aires, Argentina.