Unsa ang Mahimo sa Usa ka Tawo

Ni Richard M. Romney

Mga Magasin sa Simbahan

Kining batan-ong lalaki gikan sa Suriname wala magbuhat og talagsaon nga mga butang. Apan ang yano nga mga butang nga iyang gibuhat nakahimo og talagsaong kalainan.

Si Yves Verwey hilumon lang, siguro maulawon og gamay. Apan kana wala mopugong kaniya sa paglantaw sa mga butang nga kinahanglang buhaton ug sa pagbuhat niini.

Musikero

Pananglitan, si Yves, 18-ang panuigon gikan sa Tamenga Branch, Paramaribo Suriname District, nakakita nga kon siya motugtog sa keyboard sa mga miting ug mga kalihokan sa Simbahan, daghan ang mga tawo nga interesado nga makakat-on unsaon sa pagtugtug. Busa siya misugod sa pagtudlo og libre nga mga klase alang sa mga bata, mga kabatan-onan, ug mga hamtong.

Ang mga klase gipangtudlo sa daghang mga branch ug abli para sa tanan si kinsa nga gustong motambong. Kadaghanan sa mga gabii nga si Yves motudlo, adunay dili mominus tunga sa dosena nga mga estudyante ang anaa, mga Santos sa Ulahing mga Adlaw ug uban pa kinsa nakadungog kabahin sa klase gikan sa mga miyembro sa branch. Siya usab motudlo og flute kon adunay interesado. Siya ang midala sa branch choir, ug siya ang midumala sa usa ka espesyal nga pasundayag sa district choir. Siya miingon ang iyang pag-apil sa musika usa ka paagi sa iyang pagpakita og pasalamat ngadto sa mga magtiayon nga misyonaryo kinsa mitudlo kaniya unsaon sa pagbasa og mga nota ug paghimo og musika.

Mga Tigbasa sa mga Kasulatan

Si Yves usab nakakita og pamaagi sa pagtabang sa pipila sa iyang mga higala kinsa ganahan nga mopakigbahin sa usag usa kon unsa ang ilang nakat-unan sa mga kasulatan. Sila manambong sa simbahan ug seminary ug institute, mamulong kon gisangunan ug moapil sa mga leksyon. Apan sila usab ganahan nga makig-istorya sa usag usa, batan-on sa batan-on. Busa kausa sa usa ka semana sila misugod sa dungan nga pagbasa sa Basahon ni Mormon mga tunga sa oras, ug sila misugod sa pagdapit sa uban, ilabi na sa mga kabatan-onan nga dili kaayo aktibo, sa pag-apil kanila. Karon sila nagbasa og dungan sulod sa pipila ka mga buwan, usahay sa balay sa usa ka tawo, usahay ngadto sa lain.

“Kini nagsugod uban sa akong mga higala nga sila si Larry Roseval, kinsa anaa sa Wanica Branch, ug Saffira Zeegelaar gikan sa akong branch. Apan karon kami walo na kabuok,” miingon si Yves. “Kami mobasa og usa ka kapitulo, maghisgut kabahin niini, mopamatuod kami kabahin niini, ug mopakigbahin sa unsay among nakat-unan sulod sa semana.”

Dugang pa, kining mga tigbasa sa mga kasulatan nagsuporta usab sa matag usa. Pananglitan, ilang hagiton ang ilang mga kaugalingon sa paghimo sa mga Dominggo sa pagpuasa nga mas makahuluganon pinaagi sa pagpuasa nga may katuyoan. “Sa miaging Dominggo sa pagpuasa kami naghunahuna kabahin sa piho nga mga tawo kinsa dili kaayo aktibo ug nagpuasa ug nag-ampo nga sila unta mobalik sa pagka-aktibo sa Simbahan,” si Yves mipasabut.

Mga Higala sa mga Misyonaryo

Ang full-time nga mga misyonaryo nagkinahanglan og suporta gikan sa mga miyembro, ug si Yves aduna nay gibuhat nga usa ka butang kabahin niana. Siya kanunay nga mokuyog kanila sa mga sabut sa pagtudlo kutob sa iyang mahimo. “Ako ganahan kaayo nga mouban sa mga misyonaryo,” siya miingon. “Kini mopabati kanako nga positibo ug malipayon.”

Ang misyonaryo adunay sama nga pagbati kon makauban siya. Si Yves adunay makapadasig nga kinaiya nga enerhiya nga makabayaw sa tanan, ug sila usab nasayud nga siya andam nga mopakigbahin sa iyang pagpamatuod sa kamatuoran. Si Yves hapit na mag-19, ug siya mismo ganahan na kaayo nga moalagad og full-time nga misyon.

“Sukad pa nga ako anaa sa Primary,” si Yves misulti, “Ako makabalik-balik og memorya sa 1 Nephi 3:7, ug ako makakanta sa awit kabahin sa sama nga butang: ‘Ako moadto; Ako mobuhat sa butang nga gisugo sa Ginoo,’ busa wala nay pangutana kon ako bang dawaton ang call o dili.”¹

Mga Tig-ihap sa Panalangin

Si Yves una nga nakahibalo sa Simbahan sa dihang miapil ang iyang mama. Siya siyete ang panuigon niadtong panahona ug nabunyagan ug nakumpirmahan usa ka tuig ang milabay. Siya nagpabiling aktibo, bisan pa sa lisud nga mga panahon sama sa pagdiborsyo sa iyang mga ginikanan ug nakakita nga gibaligya ang ilang balay aron sa ibayad sa mga utang. Siya nakalahutay sa mga pagbiay-biay sa mga katawhan samtang siya maglakaw padulong sa Simbahan matag Dominggo nga magsul-ob og suit ug tie. “Ako nasayud ngano nga ako mosul-ob niining paagiha ngadto sa simbahan, busa kini wala makahasol kanako,” siya miingon. Siya mobalibad kon ang uban mosulay sa pagpasigarilyo o pagpainom kaniya. “Ako walay problema sa pagsulti og dili. Ang pagsunod sa Pulong sa Kaalam nakahatag kanako og kahimsog sa pisikal ug espirituhanong kalig-on. Sila ba makahatag kanako og usa ka butang nga mas maayo pa niana?

Bisan pa niining tanan si Yves kanunay gayud nga nag-ihap sa iyang panalangin. Siya usab miawhag sa uban sa pag-ihap sa ilang mga panalangin.

“Samtang kamo nagkat-on kabahin sa ebanghelyo ug kon unsaon ninyo sa pagsunod ang mga kasugoan,” siya miingon, “mas masabtan pa gayud ninyo nga ang Langitnong Amahan gusto nga mopanalangin kanatong tanan. Ang kalipay dili kabahin nga ikaw magustohan sa tanan [cool]; kini kabahin sa pagbaton og mga sumbanan ug pagpuyo niini. Ang kalipay mao ang mahitungod sa pagkamapasalamaton ngadto sa Dios ug ngadto sa uban alang sa tanang mga maayo nga butang sa kinabuhi.”

Ang pagbaton og sama niini nga kinaiya usa usab ka butang nga nakita ni Yves nga kinahanglang buhaton. Ug busa iya kining gibuhat, ug siya nag-awhag sa uban sa pagbuhat sa ingon.

Tabang gikan sa Basahon

Si Yves miingon nga ang Basahon ni Mormon mitabang kaniya sa daghang mga pamaagi. “Kini naghatag kanako og mas maayo nga kahibalo sa mga butang nga mahimong mahitabo,” siya miingon. “Ug ako makakuha og tubag sa mga pangutana sa ebanghelyo kon ako mobasa sa mga butang nga nahitabo sa ubang mga tawo sa dugay nang panahon.”

Siya miingon nga ang Basahon ni Mormon, isip lain nga pagpamatuod ni Jesukristo, motabang kanato nga mas makasabut sa kaimportante ug katuyoan sa Biblia. Siya mikutlo sa ikawalo nga artikulo sa hugot nga pagtuo: “Kami nagtuo sa Biblia nga pulong sa Dios kon kini tukma nga pagkahubad; kami nagtuo usab sa Basahon ni Mormon nga pulong sa Dios.”

“Ang Biblia adunay daghan nga yano ug bililhong mga butang nga gikuha gikan niini,” miingon si Yves, “apan ang Basahon ni Mormon mao ang mipuno niadtong mga kulang. Kamo kinahanglang magtuon niining duha, ingon man usab sa ubang mga kasulatan.”

Pagkat-on nga Magkasinabtanay

Ang Suriname, nga makita sa amihanang bahin sa South America, mao ang usa labing daghan og nagkalain-lain nga mga kaliwatan nga nasud sa kalibutan.

Ang mga grupo nga daghan og populasyon naglangkub sa East Indians (gikan sa India), Creoles (gikan sa Africa), Javanese (gikan sa Indonesia), Maroons (mga kaliwat sa nakaeskapo nga mga ulipon), Native Americans (kadaghanan gikan sa tribo sa Carib), ug Chinese. Ang mga tawo makasulti og Dutch (ang opisyal nga pinulongan), English, Sranan Tongo (usa ka pinulongan sa Creole), Hindustani, Javanese, ug uban pang mga lokal nga pinulongan. Ang Suriname nahimong gawasnon niadtong 1975. Sa wala pa kana mao ang Dutch, ug sa wala pa gayud kadto mao ang British.

“Sa Suriname, ang matag usa nagkat-on nga magkasinabtanay sa usag usa,” mipasabut si Yves. “Kana makatabang kon kamo mopakigbahin sa ebanghelyo, tungod kay ang mga Surinamese anad na sa pagpaminaw kabahin unsay pagtuo sa ubang mga tawo.”

Ang unang mga bunyag nga kinabig sa Suriname nahitabo niadtong 1989. Karon adunay mga 700 ka mga miyembro ang nanambong sa unom ka mga branch: Blauwgrond, Nickerie, Paramaribo, Tamenga, Uitkijk, ug Wanica.

Mga litrato pinaagi ni Richard M. Romney

Imahe

map of South America

SOUTH AMERICA

Kadagatan sa Atlantiko

Venezuela

Guyana

SURINAME

PARAMARIBO

French Guiana

Brazil

Sama sa bitoon nga anaa sa bandila sa Suriname, si Yves mipakigbahin sa iyang kahayag ngadto sa uban. Siya nagtudlo og organ ngadto sa mga Santos sa Ulahing mga Adlaw ug sa mga sakop sa komunidad kinsa interesado. Siya usab nakigkita kanunay uban sa iyang mga higala aron sa pagtuon sa Basahon ni Mormon.

Madasigon kabahin sa misyonaryo nga buhat, si Yves nahinumdum kauban sa iyang mama kabahin sa iyang bunyag ug nangandam alang sa iyang kaugalingon nga full-time nga misyon. Siya ganahan nga makig-istorya uban sa mga miyembro panahon sa mga miting ug mobisita sa makasaysayanong distrito sa kapital sa Suriname, ang Paramaribo.