Modagan ug Dili Maluya
Usa sa labing nindot nga panalangin nga atong nadawat sa dihang kita mianhi sa yuta mao ang pisikal nga lawas. Ang Pulong sa Kaalam, nga makita sa Doktrina ug mga Pakigsaad seksyon 89, nagtudlo kanato “sa han-ay ug kabubut-on sa Dios diha sa temporal nga kaluwasan sa tanan nga mga santos sa katapusan nga mga adlaw” (b. 2). Ang mosunod mao ang mga pagpamatuod kabahin sa Pulong sa Kaalam gikan sa mga Santos sa Ulahing mga Adlaw sa tibuok kalibutan.
Dili Na Bata
Ako 13 ang panuigon, ug ako nasayud nga kon kita moamping sa atong mga lawas, kita makadawat sa mga panalangin nga gisaad sa Pulong sa Kaalam nga kita mahimong “modagan ug dili maluya” (D&P 89:20). Kon ako magdula og i-sport, mokaon og makapahimsog nga mga pagkaon, ug makatulog og eksakto, ako mas kusgan. Kon ako mosunod niini nga sugo, ako luwas sa mga butang nga makapaadik, ug dili ako makontrolar niini.
Ako nasayud nga ang Langitnong Amahan mihatag kanato sa Pulong sa Kaalam dili sa pag-limit sa atong mga kaugalingon apan sa pagtabang kanato nga mopuyo nga himsog ug malipayon nga mga kinabuhi. Si Satanas mosulay sa pagtintal kanato ngadto sa pagtuo nga ang pagpanigarilyo ug pag-inom makahimo kanatong sikat, gawasnon, ug malipayon. Apan kana dili tinuod. Usahay lisud ang paghupot og taas nga sumbanan, ilabi na sa eskwelahan, apan kon ako maningkamot nga mahimong maayo nga ehemplo, gitabangn nako ang akong mga higala nga makasabut sa kaimportante sa pagpili sa husto.
Ang labing dako nga panalangin nga akong nadawat sa pagsunod sa Pulong sa Kaalam mao ang oportunidad nga makabaton sa kanunay nga giya sa Espiritu. Ang akong tumong mao nga sa umaabut ako mahimong takus nga moadto sa templo.
Sevil V., Plovdiv, Bulgaria
Tabang alang sa Diabetes
Ako usa ka 57-anyos nga lola kinsa nahibaloan nga adunay diabetes niadtong Hunyo 2006. Dugang sa pag-inom og tambal, ako midangup sa Pulong sa Kaalam alang sa tabang. Ako nakakat-on sa bili sa ehersisyo kanunay ug sa himsug nga diyeta. Ako mius-us og 88 ka libra (40 kg) ug namentenar nako ang akong gibug-aton. Ako mibati nga napanalanginan pag-ayo sa akong pagkamasulundon ngadto sa Pulong sa Kaalam sa adlaw nga ang akong doktor mipahunong sa akong pag-inom og tambal sa diabetes ug sa taas nga presyon sa dugo. Ako adunay pagpamatuod sa Pulong sa Kaalam tungod kay ang mga espiritwal ug pisikal nga panalangin nga akong nadawat pinaagi sa pagsunod niini nga padayon nga mipanalangin sa akong kinabuhi.
Beverly Rutherford, Washington, USA
Modagan sa Marathon sa edad nga 73
Ako natawo sa Brazil nga adunay rickets—usa ka sakit nga gihulagway nga may hiwi sa mga bukog. Sa pag-edad nako og 19 ang akong timbang 50 ka kilos (111 ka libra) ug 1.64 ka metros ang gitas-on. Ang resulta, ako wala madawat sa military, busa ako misugod sa pagpangita og mga pamaagi sa pagpalambo sa akong pisikal nga kondisyon. Ako misugod og sunod-sunod nga mga ehersisyo ug mikaon og usa ka balanse nga diyeta.
Niining panahona, akong nahimamat ang mga misyonaryo. Akong nailhan ang Simbahan ug nakakat-on kabahin sa mga sugo, apil na ang Pulong sa Kaalam. Mao kini ang akong gikinahanglan. Kini naghatag kanako og giya sa mga pagkaon nga angay kaonon ug lista sa dili limpyo nga mga butang nga angay likayan, sama sa tabako ug makahubog nga mga ilimnon. Pinaagi sa pagbasa sa Doktrina ug mga Pakigsaad, ako nakakat-on kabahin sa panginahanglan sa pagpahulay ug pagkatulog (tan-awa sa D&P 88:124).
Ako nakaangkon og kusog ug mitimbang og 78 ka kilo (172 ka libra). Ako nahimong usa ka kampeyon isip weight lifter. Nag-judo usab ako ug milangoy. Karon sa edad nga 73 ako usa ka runner sa marathon ug nakahuman na og 30 ka mga marathon. Niadtong 2005 ug 2006, ako ikaduha sa akong kagrupo sa edad didto sa Brazil. Ako hilabihan ka himsog, ug ako malipayon kaayo.
Ako mapasalamaton sa atong Langitnong Amahan sa paghatag kanato og mga balaod nga, kon sundon, makahatag kanato og panalangin sa kahimsug.
Antonio Olívio de Oliveira, São Paulo, Brazil
Usa ka Botelya nga Bino
Samtang ako nanglimpyo sa beauty shop pagkahuman sa klase, ako nakakita og tunga sa botelya nga bino nga nahibilin pagkahuman sa party. Ako nangutana sa akong agalon unsa ang akong buhaton niini. “Iyabo kana, ug ilabay ang botelya,” siya miingon padulong sa iyang paglakaw. Iyang gitrangkahan ang pultahan dayon sa iyang paggawas, ug ako nag-inusara. Ako mipadayon sa akong kasagarang buluhaton sa pagpanglimpyo, apan ang botelya sa bino ang anaa sa akong hunahuna. Ako 14 na ug wala pa gayud makatilaw og bino. Ako gitintal.
Akong gilimpyohan ang kasilyas, mi-sanitize sa mga brush alang sa buhok, ug gitrapohan ang sawog, naghunahuna kanunay sa tibuok panahon niadtong botelya sa bino sa likod sa lawak buhatan. Ako nasayud nga ang usa ka tilaw dili makapahubog kanako. Ako nasayud nga walay bisan usa nga masayud. Uban niana nga panghunahuna ako nakaamgo nga ako mismo nahibalo ug ingon man ang akong Langitnong Amahan mahibalo niini. Ang akong pagpanlimbasug nahuman. Ako nasayud nga ako makalolooy kon ako magpadala niini nga tintasyon, ug ako gusto nga adunay igong kalig-on sa pagbuntog sa tanang mga tintasyon. Ako mibubu sa bino ngadto sa kanal, gihugasan ang botelya, ug gilabay kini didto sa basurahan.
Kini nga kasinatian mora og dili kaayo importante tan-awon gawas niadtong kalainan nga nahimo niini ngari kanako. Ako mihukom nga ako mosunod gayud sa mga sugo bisan kon walay tawo nga nagtan-aw. Ako gustong mobuhat sa husto nga butang alang sa husto nga rason. Ako karon nasayud nga ako adunay kusog sa pagbuntog sa tintasyon, ug ako mibati nga mas may pagsalig nga ako makalakaw sa dalan pabalik ngadto sa akong Langitnong Amahan.
Beth M. Stephenson, Oklahoma, USA
Ang Kalig-on sa Paglahutay
Sa tuig human sa akong bunyag, ako nahimong usa ka boluntaryo nga bombero. Akong gituman ang Pulong sa Kaalam bisan og ang akong mga higala mihatag kanako og tabako, alkohol, tsa, ug kape. Dihang sila mangutana kanako ngano nga ako mobalibad niining mga butanga, ako silang giingnan tungod kay ako usa ka Mormon. Kadaghanan kanila mibiaybiay kanako ug nangatawa.
Usa ka adlaw kami kinahanglan nga mokuha og tulo ka oras nga eksamen nga pisikal nga ehersisyo aron sa pagtino si kinsa ang magpabilin nga bombero. Matag usa kanamo nagsul-ob og bug-at nga uniporme ug mga botas ug mibitbit og mga himan para sa pagginhawa. Sa wala pa ang eksamen ako nakakita sa uban nga nanigarilyo ug gikataw-an ako tungod kay ako usa lamang ka batan-on ug sila naghunahuna nga ako dili makapasar sa istrikto kaayo nga eksamin.
Una, kami kinahanglan nga modagan libut sa tibuok field, magdaladala og bug-at kaayo nga mga hose. Pagkahuman sa unang tuyok ang akong mga bitiis ug lawas misakit, ug ang akong mga kaubanan sa trabaho nangatawa kanako. Dayon ako nahinumdom unsa ang gisulti sa Doktrina ug mga Pakigsaad 89: Ang tanan nga mga santos kinsa nakahinumdom sa pagsunod ug sa pagbuhat niini nga mga panultihon, maglakaw nga masulundon sa mga sugo, makadawat og maayo nga panglawas ug uyok sa ilang mga kabukogan; … ug modagan ug dili maluya” (bb. 18, 20).
Ako miluhod ug nag-ampo sa Ginoo, nangayo Kaniya og hugot nga pagtuo aron makita nga natuman ang saad. Pipila ka mga lalaki ang miduol aron tan-awon kon ako OK pa, ug miingon kanila nga ako maayo ra. Dayon kami misugod na usab sa pagdagan. Diha-diha dayon nawala ang kasakit sa akong mga bitiis. Ako midagan ug midagan ug nakabantay nga ang uban namungko na lang sa yuta tungod sa kakapoy, apan ako wala gani mobati nga mohunong. Ako nakapasar sa eksamen, samtang ang akong mga kauban sa trabaho kinahanglang mokuha og usab sa eksamen.
Ako nasayud niana salamat sa akong pagkamasulundon sa Pulong sa Kaalam, ako nakalahutay niadtong pagsulay. Ako nasayud nga ang Dios akong gikauban niadtong adlawa ug kon kita mosunod sa Iyang mga sugo, Siya mopanalangin kanato sa Iyang walay katapusan nga kalooy.
Cristian Castro Marin, Santiago, Chile
Matag Adlaw nga Pasalig
Duha ka adlaw human gihaya ang akong inahan, ako mitan-aw sa samin. Ako wala ganahi sa akong nakita: itom nga mga lingin ubos sa akong mga mata, luspad nga panit, bati ang postura, ug adunay 10 hangtud sa 15 ka libra nga sobra sa timbang. Ang katapusang tulo ka mga tuig sa pag-atiman sa akong mga ginikanan nakahimo og negatibong epekto ngari kanako. Inubanan sa kaluya sa pag-atiman sa akong mga ginikanan kinsa nagkasakit ug namatay sulod sa duha ka tuig ang matag usa kanila, kini dili katingad-an nga ako tan-awon nga mora og walay tarong nga tulog o nakakaon og usa ka balanse nga pagka-on sulod sa mga semana.
Sa edad nga 26 ako naglibog. Ako mahimong mopadayon kon si kinsa ako ug morisgo sa makamatay nga diabets, sakit sa kasingkasing, o kanser, nga amo gayud nga kaliwat, o ako mahimong mokontrol ug himoon nga ang akong panglawas ang unahon. Kini mao ang pasalig nga akong kinahanglang buhaton alang sa kinabuhi—dili lamang sa pipila ka mga semana. Samtang ako mitan-aw sa akong dili himsog nga hulagway sa samin, ako mihimo og saad sa akong kaugalingon. Ako mopuyo sa Pulong sa Kaalam sa paagi nga wala pa gayud nako mabuhat sa una.
Ang akong bana ug ako misugod sa pag-ehersisyo duha o tulo ka beses matag semana. Ako mas nagbantay kon pila na ka mga calory ang akong pagkaon. Ako midugang og daghang prutas ug utanon sa akong pagkaon. Kini nagkinahanglan og paningkamot, ako nakakat-on unsaon sa pagbasa sa mga nakasulat sa label kabahin sa nutrisyon ug mopili sa mas sustansyadong mga pagkaon.
Ang tinud-anay nga yawe sa akong pagkamalampuson mao ang paghimo og makab-ot nga mga tumong. Ako ganahan nga mous-us ang akong timbang, mopasaka sa lebel sa akong kalagsik, ug tan-awon nga mas himsog. Uban sa tabang sa Langitnong Amahan ug sa usa ka bana nga talagsaon ang pagsuporta, akong nakab-ot ang tulo.
Unom ka mga tuig ang milabay ako padayon gihapon sa pag-ehersisyo ug nagmatngon unsa ang akong kaonon. Ako padayon nga naghimo og mga tumong sa pagkahimsog ug dyeta ug motrabaho sa pagkab-ot niini matag adlaw. Kon adunay usa ka tawo nga mosulti kanako sa una nga moabut ang adlaw nga ingon ako niini ka hilig sa pag-ehersisyo, sa tinud-anay ako dili motuo niini. Ako ang buhi nga ebidensya nga inyong mausab ang inyong estilo sa kinabuhi kon inyo gayud nga gustohon. Kon kamo magbaton og hugot nga pagtuo sa Langitnong Amahan, Siya mosuporta kaninyo sa inyong mga paningkamot.
Ako mobati og maayo kabahin sa akong kaugalingon samtang naningkamot sa pagkab-ot sa akong hilabihan nga pagkahimsog. Sukad nga ako mihimo niini nga pasalig, ang akong panghunahuna mas klaro ug mas paspas, ug ang akong lawas mas kusgan ug mas lagsik. Tungod niini, ako nakatagamtam sa talagsaong mga panalangin nga gisaad sa Langitnong Amahan niadtong kinsa mosunod sa Pulong sa Kaalam. Siya miingon nga ang tanan nga masulundon nga mga Santos “makadawat og maayo nga panglawas ug uyok sa ilang mga kabukogan; ug makakita og kaalam ug dako nga mga bahandi sa kahibalo, gani ang mga tinago nga mga bahandi” (D&P 89:18–19).
Meagan Sandor, Ontario, Canada
Paglatid og usa ka Plano
Sa mubong panahon pagkahuman nga ang akong mama ug ako nabunyagan, siya misugod sa pagtrabaho isip usa ka rehistrado nga nurse. Isip usa ka single parent, siya walay panahon sa pagluto, busa kami misugod sa pagkaon og mga luto nang daan ug fast foods. Bisan ako 12 anyos lamang, ang akong panglawas misugod sa pagkaluya. Ako wala nay kalagsik sama sa una. Ako mibati og kakapoy ug kabalaka. Ang akong timbang nadugangan.
Ako nangutana sa akong mama unsaon nako nga mapanindot ang akong lawas. Naglaum nga hatagan og medikal nga tubag, ako nasurprisa sa dihang siya yano nga miingon, “Sunda ang mga baruganan sa Pulong sa Kaalam.” Ako nagtuo nga siya mohatag kanako og mga pahimangno kabahin sa mga calory ug mga carbohydrate ug mga tambok, apan ang iyang tubag mao gayud ang akong gikinahanglan.
Alang sa family home evening pagkasunod Lunes, among girebyu ang Doktrina ug mga Pakigsaad 89 ug milatid og plano sa pagkaon ug kalihokan. Ang kausaban sa among estilo sa kinabuhi mahinuklogon. Kaming duha misugod sa pagbati og mas himsug ug mas malipayon. Akong nabantayan ang dugang nga kalinaw sa akong kinabuhi ug mas hilum nga mga pagdasig gikan sa Espiritu Santo.
Ako mapasalamaton ngadto sa usa ka mahigugmaong Langitnong Amahan, kinsa gusto nga makig-istorya kanato. Ako karon nasayud nga kita kinahanglang andam sa pisikal ug espiritwal nga paagi sa pagdawat og sagrado, personal nga mga pagpadayag.
Eric D. Richards, Utah, USA
Mga paghulagway sa litrato pinaagi ni John Luke.