Mensahe sa Unang Kapangulohan

Pag-ampo ug ang Asul nga Kapunawpunawan

Ni Presidente Dieter F. Uchtdorf

Ikaduhang Magtatambag sa Unang Kapangulohan

Usa sa mga butang nga akong ganahan kaayo kabahin sa pagpalupad mao ang pagpalupad gikan sa mangitngit ug nag-ulan nga tugpahanan sa eroplano, saka ngadto sa baga ug mahulgaong panganod sa tingtugnaw, ug dayon sa kalit lamang, mosungasong ngadto sa ibabaw sa itom nga panganod ug sa kalit molapus ngadto sa kahayag nga adlaw ug ngadto sa walay katapusan nga asul nga kapunawpunawan.

Ako sa kanunay natingala kon giunsa niini nga pisikal nga buhat masusama sa atong personal nga mga kinabuhi. Kapila sa kanunay atong makita ang atong kaugalingon nga gipalibutan sa mga mahulgaong mga panganod ug dautan nga panahon, uban sa hunahuna kon ang kangitngit may katapusan ba kaha? Kon aduna lamay usa ka paagi alang kanato nga ibayaw ang atong mga kaugalingon gikan sa kagubot sa kinabuhi ug molahos ngadto sa usa ka pagbati sa kalinaw ug kakalma.

Ang mga miyembro sa Ang Simbahan ni Jesukristo sa mga Santos sa Ulahing mga Adlaw nasayud nga kini nga butang posible; adunay usa ka paagi nga makabuntog sa mga kahasol sa matag adlaw nga kinabuhi. Ang kahibalo, panabut, ug paggiya nga atong nadawat gikan sa pulong sa Dios ug sa paggiya gikan sa propeta sa atong panahon karon nagpakita kanato unsaon nga tukma kitang makahimo niana.

Pagkabayaw

Aron ang eroplano malayo sa yuta, kinahanglan nga imo kining pasakaon. Sa aerodynamics, ang pagsaka mahitabo kon ang hangin moagi sa pako sa eroplano sa paagi nga ang gikusgon niini ubos sa pako mas kusog kaysa gikusgon ibabaw sa pako. Kon ang pagpasaka sa ibabaw mas kusog kaysa gibug-aton nga mobitad paubos [gravity], ang eroplano mosaka gikan sa yuta ug molupad.

Sa sama nga paagi, kita makahimo sa pagbayaw sa atong espirituhanong kinabuhi. Kon ang pwersa nga motulod kanato padulong sa langit mas kusog kaysa mga pagtintal ug kasahol nga mobira kanato paubos, kita makasaka ug makaadto sa gingharian sa Espiritu.

Ang mga diksyonaryo mihulagway sa pagsaka nga nagdala o nagdirekta gikan sa ubos ngadto sa mas taas nga posisyon; ang gahum o kusog nga anaa sa pag-alsa ngadto sa bag-ong lebel o gitas-on; usa ka kusog nga naglihok paingon sa taas, tugbang batok sa pwersa sa kabug-aton.¹

Ang Salmista mihimo og mga tumong nga mas labaw. “Kanimo, O Ginoo, bayawon ko ang akong kalag” (Salmo 25:1) ug “Ipunting ko ang akong mga mata ngadto sa kabungturan, hain nagagikan ang akong tabang. Ang akong tabang nagagikan sa Ginoo” (Salmo 121:1–2).

Atong ipunting ang atong mga panan-aw ngadto sa Dios sa langit pinaagi sa pagpalambo sa atong kaugalingong espiritwalidad. Ato kining buhaton pinaagi sa pagpuyo nga uyon sa Amahan, sa Anak, atong Manluluwas, ug sa Espiritu Santo. Ato kining buhaton pinaagi sa timud-anay nga pagka “manunuton, kaaghup, kamapainubsanon, kamapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang nganhi [kanato], bisan ingon sa usa ka bata nga motugyan sa iyang kaugalingon ngadto sa iyang amahan” (Mosiah 3:19).

Ang Matinud-anong Pag-ampo sa Matarung og Kasingkasing

Bisan og daghang mga baruganan sa ebanghelyo ang makatabang kanato aron makab-ot ang pagkabayaw, ako gusto nga mopokus og usa ka pino nga butang. Ang pag-ampo mao ang usa sa mga baruganan sa ebanghelyo nga makatabang sa pagpabayaw. Ang pag-ampo adunay gahum sa pagbayaw kanato gikan sa kalibutanong mga tinguha, sa pagpasaka kanato ngadto sa mga panganod sa kaalautan ug kangitngit ngadto sa kahayag ug klaro nga kapunawpunawan.

Usa sa dakong mga panalangin ug mga pribilehiyo ug mga oportunidad nga atong naangkon isip mga anak sa atong Langitnong Amahan mao nga kita mahimong makig-istorya Kaniya. Kita mahimong makig-istorya Kaniya sa atong mga kasinatian sa kinabuhi, mga pagsulay, ug mga panalangin. Kita mahimong maminaw ug makadawat og celestial nga giya gikan sa Espiritu Santo. Kita mahimong mohalad sa atong mga pangamuyo ngadto sa langit ug makadawat og kasiguroan nga ang atong mga pag-ampo madungog ug Iya kining tubagon isip usa ka mahigugmaon ug maalamon nga Amahan.

Ang mga pag-ampo nga madungog sa langit mao kadtong mabati sa kinasingkasing ug maglikay sa paggamit og mga pagbalik-balik o mga pulong nga wala gayud hunahunaa. Ang atong mga pag-ampo kinahanglan magagikan sa kinahiladman sa atong tinguha nga mahiusa sa atong Amahan sa Langit.

Ang pag-ampo, kon gihimo pinaagi sa hugot nga pagtuo, sa tanang higayon dawaton sa Dios. Kon mobati kamo nga dili ganahan nga mag-ampo, mao gayud hinoon kana ang panahon nga kamo kinahanglang mag-ampo, magbansay og hugot nga pagtuo. Si Nephi mitudlo uban sa pagkayano: “Kay kon kamo mopatalinghug ngadto sa Espiritu nga magtudlo sa usa ka tawo sa pag-ampo kamo masayud nga kamo kinahanglan gayud nga mag-ampo; kay ang dautan nga espiritu dili motudlo sa usa ka tawo sa pag-ampo, apan motudlo kaniya nga siya dili gayud kinahanglang mag-ampo” (2 Nephi 32:8).

Si Presidente Harold B. Lee (1899–1973) mitudlo: “Ang sinsero nga pag-ampo sa matarung nga kasingkasing moabli ni bisan kinsa nga tawo sa pultahan sa balaan nga kaalam ug kalig-on diha niana diin siya sa matarung nga paagi nangayo.”²

Ang mga pag-ampo ba matubag? Ako mopamatuod nga kini pagatubagon.

Kita makadawat ba og balaanong tabang, kaalam, ug suporta gikan sa langitnong gingharian? Usab, ako mopamatuod uban sa kasiguradoan nga kini mahitabo.

Ang pagkamasulundon makahatag kanato og kasiguroan sa tubag sa atong mga pag-ampo. Atong mabasa sa Bag-ong Tugon nga, “gikan kaniya magadawat kita sa bisan unsa nga atong pangayoon, kay kita nagsunod man sa iyang mga sugo ug nagabuhat sa makapahimuot kaniya” (1 Juan 3:22).

Ang mga tubag sa atong mga pag-ampo moabut sa saktong panahon sa Ginoo. Usahay kita mobati og kasagmuyo nga ang Ginoo dili diha-diha dayon motubag sa atong mga pag-ampo. Sa ingon niini nga mga panahon kita kinahanglan nga mosabot nga Siya nakahibalo unsa ang wala nato mahibaloi. Siya makakita unsa ang wala nato makita. Salig Kaniya. Siya nasayud unsa ang labing maayo alang sa Iyang mga anak, ug isip usa ka hingpit nga Dios, Siya motubag sa atong mga pag-ampo sa hingpit nga paagi ug sa sakto nga panahon.

Sa ubang panahon, ang mga tubag sa atong mga pag-ampo moabut nga wala damha. Si Propeta Joseph Smith nakakat-on gikan sa usa ka pagpadayag nga gihatag ngadto kaniya sa Kirtland niadtong 1831. “Siya nga nangayo pinaagi sa Espiritu nangayo sumala sa kabubut-on sa Dios; busa kini nahimo ingon sa iyang gipangayo” (D&P 46:30; empasis gidugang). Unsa ka talagsaon nga saad!

Usa ka Bag-o nga Talan-awon

Ang pag-ampo usa ka langitnong gasa nga gidesinyo aron mabatonan nato ang espirituhanong pagkabayaw. Kini mopalambo ug moamuma sa atong relasyon sa Dios. Dili ba kini talagsaon nga kita mahimong makig-istorya uban sa pinaka Tinubdan gayud sa kaalam ug pagkamanggiloloy-on sa tibuok kalibutan sa bisan unsang oras nga atong gipili, sa bisan asang dapit?

Matag adlaw nga yano, sinsero, ug gamhanang mga pag-ampo makatabang kanato sa pagbayaw sa atong mga kinabuhi ngadto sa mas taas nga espirituhanong gitas-on. Sa atong mga pag-ampo kita nagdayeg sa Dios, nagpasalamat Kaniya, nagkumpisal sa mga kahuyang, nangamuyo sa mga panginahanglan, ug diha nagpahayag og hilabihan nga debosyon sa atong Langitnong Amahan. Samtang buhaton kini natong espiritwal nga paningkamot sa pangalan ni Jesukristo, nga Manunubos, kita gitugahan og dugang inspirasyon, pagpadayag, ug pagkamatarung, nga modan-ag sa kahayag sa langit sa atong mga kinabuhi.

Ako naghunahuna sa mga adlaw isip usa ka piloto ug niadtong mga panahon nga ang baga nga mga panganod ug mahulgaong mga unos mohimo sa tanan nga mangitngit ug mangiub. Bisan unsa ka ngiub ang mga butang tan-awon gikan sa akong kalibutanong panan-aw, ako nasayud nga anaa sa ibabaw sa mga panganod ang adlaw hayag nga midan-ag sama sa usa ka masulawon nga alahas sa kadagatan sa asul nga kalangitan. Ako walay pagtuo nga mao kadto ang hitabo—ako nasayud gyud niini. Ako nasayud niini tungod kay ako nakasinati niini sa akong kaugalingon. Ako wala na magkinahanglan nga mag-agad mga teyoriya o sa mga gituhoan sa ubang mga tawo. Ako nasayud.

Sa susamang paagi ang aerodynamic nga pagsaka makadala kanato ibabaw sa gawas nga mga unos sa kalibutan, ako nasayud nga ang mga baruganan sa espirituhanon nga pagkabayaw makadala kanato ibabaw sa kinaladmang mga unos sa kinabuhi.

Ug ako nasayud og lain pa nga butang. Bisan og kadto usa ka kulbahinam nga kasinatian nga molahus sa mga panganod ug molupad ngadto sa hayag nga asul nga kapunawpunawan, kadto dili makomparar ngadto sa katalagsaon sa unsay masinati natong tanan kon atong ibayaw ang atong mga kasingkasing diha sa mapainubsanon ug matinguhaon nga pag-ampo.

Ang pag-ampo motabang kanato nga mopaibabaw sa unuson nga mga panahon. Kini maghatag kanato og daklit nga pagtan-aw nianang asul nga langit nga dili nato makita sa atong kalibutanong panan-aw, ug kini mopadayag kanato og lain nga talan-awon—usa ka mahimayaon nga espirituhanon nga kapunawpunawan nga puno sa paglaum ug kasiguroan sa mahayag nga mga panalangin nga gisaad sa Ginoo niadtong kinsa nahigugma ug mosunod Kaniya.

Mga Ideya alang sa mga Home Teacher

Human sa mainampoong pagtuon niini nga mensahe, ipakigbahin kini ginamit ang paagi nga makapaawhag nga moapil kadtong inyong gitudloan. Ang mosunod mao ang pipila ka mga ehemplo:

Ipakita ang usa ka litrato sa eroplano, ug ipasabut ang konsepto sa pagkabayaw. Basaha ang unang duha ka mga paragrap sa seksyon sa “Usa ka Bag-ong Talan-awon.” Pagpakigbahin og mga kasinatian nga ang pag-ampo nakapabayaw kanimo sa lisud nga mga panahon, ug dapita ang mga miyembro sa pamilya sa pagpakigbahin usab og mga kasinatian.
Basaha ang ikaduha nga paragrap sa seksyon sa “Usa ka Bag-ong Talan-awon.” Alang sa pamilya nga may bata, isulat sa usa ka piraso nga papel ang “Dugang inspirasyon,” “Pagpadayag,” ug “Pagkamatarung,” ug ibutang kini sa ibabaw sa usa ka estante nga dili makita sa mga bata (o paggamit og mga litrato nga nagpresentar niining mga konsepto). Himoa nga ang usa ka ginikanan o ang mas maguwang moalsa sa usa ka gagmay nga mga bata aron siya makakita sa papel. Ipasabut sa mga bata unsa ang kahulugan niini nga konsepto. Hisguti kon sa unsang paagi nga ang mga pag-ampo “makapabayaw sa atong mga kinabuhi ngadto sa mas taas nga espirituhanong gitas-on” aron kita makadawat niining mga panalangin.
Kupti pataas ang usa ka piraso nga papel, ug pasagdi nga matagak kini sa sawog. Dayon pil-a nga mahimo kining usa ka eroplanong hinimo sa papel, ug i-itsa kini og hinay-hinay aron molupad. Basaha ang katapusang tulo ka paragrap niining artikulo. Ipasabut kon sa unsang paagi nga ang pag-ampo makapabayaw kanato ibabaw sa atong mga pagsulay. Ipakigbahin ang inyong pagpamatuod mahitungod sa pag-ampo.

Ang pag-ampo usa ka langitnong gasa nga gide-sinyo aron mabatonan nato ang espirituhanong pagkabayaw. Kini mopalambo ug moamuma sa atong relasyon sa Dios.