Mga Ideya sa Family Home Evening

Kining mga sugyot sa pagtudlo mahimong gamiton sa klasehanan ingon man usab sa panimalay. Mahimo ninyong ipahaum kini nga mga ideya sa inyong pamilya o klase.

“Ikaw Nasayud Na,” p. 6: Ipakigbahin ang istorya ni Eddy Huanca. Pagdapit og mga miyembro sa pamilya sa pagbasa sa Moroni 10:3–5. Hisguti ang saad nga gihatag ni Moroni. Ipasulat sa mga miyembro sa pamilya ang ilang mga pagpamatuod sa Basahon ni Mormon ug ni Joseph Smith (ang gagmay nga mga bata mahimong modrowing sa Basahon ni Mormon ug sa Propeta).

“Unsa ang Mahimo sa Usa ka Tawo,” p. 16: Sugdi ang kalihokan pinaagi sa pagkanta sa “Nephi’s Courage” (Children’s Songbook, 120–21). Ipakigbahin ang istorya ni Yves Verwey, ug i-summarize ang mga paagi nga iyang gipangita para sa mga oportunidad sa pagbuhat og maayo sama ni Nephi. Dapita ang mga miyembro sa pamilya sa pagpakigbahin og positibo nga mga kasinatian sa dihang sila miserbisyo sa uban. Isip usa ka pamilya, sa mainampoong paagi paghunahuna og usa ka paagi sa pagserbisyo sa uban (o pagpili og ideya gikan sa artikulo) niana nga semana. Tapusa pinaagi sa pagbasa ug paghisgut sa 1 Nephi 3:7.

“Ang 20-Mark nga Kwartang Papel,” p. 20: Sa dili pa ang leksyon, pagputos og daghang gagmay nga mga butang sa balay. Ipakigbahin ang istorya kabahin sa 20-mark nga kwartang papel. Ipakita ang mga butang nga imong giputos, ug dapita ang mga sakop sa pamilya sa pagtag-an unsa ang matag butang sa dili pa kini ablihan. Ipasabut nga ikaw nakahibalo sa mga butang tungod kay ikaw ang miputos niini. Itandi kini ngadto sa kahibalo sa Langitnong Amahan mahitungod sa atong mga kinabuhi ug ngano nga kita kinahanglang moduol ngadto Kaniya alang sa giya. Basaha ang katapusang upat ka mga paragrap sa artikulo, ug hisguti unsay atong kinahanglan nga buhaton aron mahimong takus nga modawat sa giya sa Ginoo.

“Ang Atong Lunsay nga Panimalay sa Langit,” p. 26: Basaha ang unang duha ka mga paragrap sa artikulo; dayon pagtudlo og mga sakop sa pamilya nga mopresentar og mga ideya gikan sa matag usa sa upat ka mga bahin: pinulongan; literatura; musika; art, panagway; ug kinaiya. Hisguti kon unsaon ninyo sa paghimo nga ang inyong panimalay mas langitnong diha sa matag bahin. Isip usa ka pamilya, paghimo og tumong sa pagtangtang sa medya gikan sa inyong panimalay nga maoy makapugong niini nga mahimong “panimalay sa langit.” Ikonsiderar usab ang paghimo og usa ka tumong sa pagdala og maayo nga mga libro, art, ug musika diha sa inyong panimalay. Sa umaabut nga home evening, hisguti ang kalainan nga mahimo niini nga mga aksyon sa diwa sa inyong panimalay.

“Dagan ug Dili Maluya,” p. 32: Basaha ang pipila ka mga pagpamatuod gikan niini nga artikulo. Ikonsiderar ang pagpasulat sa mga sakop sa pamilya sa ilang kaugalingong mga pagpamatuod mahitungod sa mga panalangin sa pagsunod sa Pulong sa Kaalam. Ang gagmay nga mga bata mahimong magdrowing og mga litrato sa pipila ka mga pagkaon nga gilista diha sa Doktrina ug mga Pakigsaad 89:10–17. Dapita ang mga sakop sa pamilya sa pagpaningkamot kanunay nga masunod ang Pulong sa Kaalam. Mahimong sundan ninyo kini nga leksyon sa masustansya nga snack.

“Kalig-on sa Pagsunod sa Ginoo,” p. H4: Dapita ang mga sakop sa pamilya sa pagpakigbahin og kasinatian diin sila mibiya og usa ka butang aron sa pagsunod sa Manluluwas. Pangutana kon unsay nakapalisud ug nakapasayon niini. Isugilon ang istorya ni Elder Claudio D. Zivic nga giundangan ang pagdagan sa panahon sa adlaw nga Dominggo, ug hisguti ang mga kalisud ug mga panalangin nga iyang nasinati tungod sa iyang desisyon. Tapusa pinaagi sa pagbasa sa katapusang paragrap sa artikulo.