Gidawat ang Bisan Unsa nga Pinulongan
Anaa ka ba sa usa ka branch o ward kinsa nga ang mga miyembro dili makasulti og sama nga pinulongan? Samtang ang Simbahan nagpadayon sa pagtubo sa tibuok kalibutan, kini nga kasinatian nahimong mas komon. Sulod sa duha ka tuig ang akong bana ug ako mitambong og ingon niini nga branch sa New York. Ang akong kahibalo sa pagtudlo og Iningles ngadto sa mga mosulti og lahi nga mga pinulongan nakatabang gayud, apan bisan pa kon ikaw walay ingon niini nga kasinatian, adunay daghan nimong mahimo nga makasumpay sa gintang sa pagpakig-istorya ngadto sa uban kinsa dili makasulti sa imong lumad nga pinulongan.
Pahiyum ug pakigtimbaya sa uban. Pagbuhat og paningkamot sa pagkat-on kon unsaon sa pagsulti og hello ngadto sa uban sa ilang lumad nga pinulongan. Apan bisan kon ikaw dili makasulti og usa ka pulong sa ilang pinulongan, ikaw makahimo gihapon kanila nga mobati nga giabi-abi. Matag Dominggo, si Marta moabi-abi kanako uban sa mainiton nga gakos ug usa ka timbaya sa Spanish. Bisan ako wala makasabut sa unsay iyang gisulti, akong gibati ang iyang gugma pinaagi sa iyang gakus ug sa tono sa iyang tingog.
Tubag sa sakto nga grammar. Ang katawhan makakat-on sa usa ka pinulongan, og gamay, pinaagi sa pagpaminaw niini. Mas maayo mga makat-unan sa usa ka tawo “Ako wala makadala sa akong manwal” kaysa “Wala manwal.” Bisan kon ang pagsulti sa uban putol-putol, tubaga uban sa sakto nga pinulongan. Kini nagpakita og respeto alang sa uban ug makatabang kanila nga makakat-on sa pinulongan sa sakto nga paagi.
Sulti og hinay, dili kusog. Ang mga pulong sa kanunay magtapot sa usag usa kon kini atong madungog, ilabi na kon ang usa ka tawo nagkat-on og bag-ong pinulongan. Kon kamo mosulti, hinay-hinay lang aron sa pagsiguro nga kamo dali ra nga masabtan. Dili kinahanglan nga mosulti og kusog gawas kon ang uban nga tawo adunay problema sa pandungog. Kon kamo usa ka magtutudlo, iapil ninyo ang dili makasulti og lumad nga pinulongan kon sila adunay kahigayunan sa pagsabut sa usa ka pangutana ug moporma og yano nga tubag. Awhaga ang uban sa pagtabang, sa ingon makahimo og pagbati sa panaghigalaay ug kakomportable sulod sa klasehanan.
Paggamit og mga biswal nga tabang. Ang dili makasulti sa lumad nga pinulongan mahimong dili makasabut sa tanan nga mga pulong sa usa ka leksyon kabahin sa Unang Panan-awon, pananglit. Apan sila makasabut sa usa ka litrato ni Joseph Smith nga nagluhod atubangan sa Dios ug kang Jesukristo. Sila usab makapadaghan sa ilang mga bokabularyo pinaagi sa pagtandi sa mga pulong nga imong gigamit uban sa hitabo sa Pagpahiuli nga ila nang nahibaloan.
Isulat ang mga pakisayran sa kasulatan ug sa leksyon diha sa pisara. Kini makahimong sayon alang sa dili makasulti sa lumad nga pinulongan sa pagtultol sa mga pakisayran. Maayo na lang, ang atong mga manwal ug mga kasulatan anaa sa nagkalain-lain nga mga pinulongan. Samtang ang usa ka tawo mobasa niini og kusog, ang ubang mga miyembro sa klase makasunod uban sa mga materyal sa ilang kaugalingong mga pinulongan. Wala lamang kini motugot sa matag usa sa pag-apil sa klase, kini usab moawhag sa mga miyembro sa klase sa pagdala sa ilang mga kasulatan ug mga manwal.
Himoa nga mahimong mas maayong visiting teacher o home teacher. Pagtanyag og tabang niadtong bag-o sa inyong nasud. Alang sa mga nagsugod pa, kamo mahimong motabang kanila sa pagpamalit, mogamit sa post office, o magpalista sa eskwelahan.
Ang pipila sa akong labing gihandum nga mga higala sa New York mao ang makauban kadtong kinsa ako naglisud sa pagsulti og lima ka mga pulong sa ilang pinulongan. Ako nasayud nga sila nagkinahanglan sa akong tabang, ug kadto igo na alang sa pagsugod og pakighigala.