“Liua Faifai Pea,” Mo Le Malosi o le Autalavou, Aok. 2023.
Liua Faifai Pea
O le taumafai mo le liua faifai pea e le faigata. E mafai ona e faia.
O le liua e le o se taui e tuuina atu ia te oe i le papatisoga ma e te tafitafia ese pefu i Aso Sa uma i le lotu. O le talitonuga e tatau ona fafagaina. O lou liua e tatau ona faifai pea. E le mafai ona e faalagolago i se mea telē na tupu e faaosofia ai ma faamoemoe e faalolotoina e pei o le sosolo ma le leai o se taumafaiga o le toulu o maa tomino.
Nai lo lena, e te faia ni laasaga fuafuaina i luga o le ala e atinae ai se olaga faitino ma le ola faavavau sili atu ona lelei. O le liua faifai pea e oo mai i mea iti e te faia i aso uma, e pei o le taimi e te faatoese ai mo le faia o se upu le alofa (pe taofi oe lava mai le fai atu i le taimi muamua) po o le taimi e te manatua ai le faitauina o au tusitusiga paia. O le filifili pea lava pea e talitonu pea. O le taumafai pea e fai ma avea ma tagata e sili ona lelei. O le auala lena e mafai ai ona avea oe ma tagata sili ona lelei ma faamalosia lou faatuatua i le Tama Faalelagi ma Iesu Keriso.
Na saunoa mai Elder David A. Bednar o le Korama a Aposetolo e Toasefululua: “O le talalelei a le Faaola … o le mea moni e uiga i le faia ma le avea ma tagata lelei. Ma o le Togiola [a Iesu Keriso] ua tuuina mai ai le fesoasoani mo i tatou e faatoilalo ma aloese ai i mea leaga ae ia faia ma avea ma tagata lelei. E maua le fesoasoani mai le Faaola mo le malaga atoa o le olaga nei—mai le leaga i le lelei i le lelei sili atu ma ia suia ai o tatou lava natura.”1
O nai manatu nei e ono fesoasoani.
Tusifaamaumau Ou Manumalo
Afai e te lagona ua uma lou alualu i luma, taumafai e matau mea lelei e te faia i aso taitasi. Faaalu sina taimi e tusi ai i lalo mea uma na lelei ona e faia i le asō.
O le auai i le lotu, suesueina o tusitusiga paia, tausia o feagaiga, agalelei, tatalo—o nei manumalo laiti o taimi ia o le lelei e tutupu i lou olaga i aso taitasi. O le alualu i luma lea; o oe lea e laa atu i lou taunuuga e faavavau!
Tauivi mo le Malamalama Sili Atu
E tauia e le Atua au faatinoga laiti o le faatuatua i taimi taitasi e te filifilia ai se mea lelei. Na te faia au taumafaiga ia aoga e ala i le tuuina atu ia te oe o le malosi, lototele, ma le malamalama e faaauau ai pea ona agai atu i le ola e faavavau.
Na saunoa mai Elder Neil L. Andersen o le Korama a Aposetolo e Toasefululua: “I le aluga o tausaga tatou te uia ai pea lava pea nei laasaga taua faaleagaga. Tatou te amata ona vaai faapea ‘o ia o le e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai’ [Mataupu Faavae ma Feagaiga 50:24]. E taliina a tatou fesili ma masalosaloga pe tuuitiitia foi le faapopoleina ia i tatou. E oo ina faigofie ma mama a’ia’i lo tatou faatuatua.”2
A oo ina e liua atili i le talalelei, e sili atu lou lelei nai lo le mea sa masani ona e i ai. Ua e aoao e uiga i le avea ma se tagata lelei ma mea e mafai ona e faia. E aoao oe e le Agaga Paia a o e saili e faaleleia atili. A o e mauaina le malamalama sili atu, o le a avea atili oe e faapei o le Atua ma Iesu Keriso, o e onosai, agaalofa, alofa, atamai, agalelei, ma loto faamagalo. I se faapuupuuga, ua e latalata atili i le atoatoa (tagai 3 Nifae 12:48).
Fatu ni Mausa Lelei
Mafaufau pe faapefea ona e faia se mausa. E te faia pea lava pea se mea seia oo ina otometi. O le mea lava lea e tasi e mafai ona tupu i mafaufauga lelei. Pe a e taumafai ma le loto i ai ia i ai ni mafaufauga ina ia agalelei atili, alofa atili, auauna atu i isi, pe lotofaafetai atili, o le a tele atu taimi e maua ai e lou faiai na mafaufauga. Ma a o e faatinoina na mafaufauga, o le a e fausia se mausa lelei.
Ina ia sili atu ona faamoemoe e uiga i le avea ma tagata sili atu, e mafai ona e mafaufau e faatutu ni sini e taulai atu i le atiina a’e o uiga patino faaKeriso.
Mo se faataitaiga:
-
O le a ou faamalo atu i ni tagata se toatolu i aso taitasi ina ia mafai ona ou aoao e vaai atili i le agalelei i tagata.
-
O le a ou le faalogo i musika leaga ina ia mafai ai e le Agaga ona faatasi pea ma au.
-
O le a ou tatalo pe a ou ita ina ia ou agalelei atili.
O mausa faapenei e mafai ona faafaigofie ai ona agai atu pea i le atoatoa ma ola fiafia atili ai i le taimi nei. E faigofie atu ona lelei pe a i ai sau mausa e “fai mea lelei e le aunoa” (tagai Alema 63:2).
Manatua le Tala Fiafia
A o e galue e ausia le sini o aso taitasi o le ola i se olaga fiafia sili atu, ma sili atu ona faapei o Keriso i le taimi nei, ua e agai foi i luma i le atoatoa. E le o se mea matagofie ea lena? O loo e tuputupu ae i le tagata e tatau ona avea ai oe. Ma i le taimi lava lea e tasi, o le a e faaleleia ai lou olaga faaletino. I na mea uma, e te fiafia ai i le taimi nei ma i le faavavau.
O le ala lena na fuafuaina ai e le Atua. O le filifili e avea ma “oe” sili e ala i le mulimuli ia Iesu Keriso e fesoasoani ia te oe ma i latou o siomia oe. Ma na te aumaia oe i Ona aao alofa mo le faavavau.
O le tala fiafia o le talalelei a Iesu Keriso ua tuuina atu ai ia te oe le avanoa ofoofogia e malamalama ai i le faamoemoega o le olaga ma faataunuuina. Ae e pule lava oe. E te filifili pe faaaoga pe leai foi lena avanoa. Ona o lou faitalia, o au “faaiuga e fuafua ai [lou] taunuuga.” b3 E taua au filifiliga ona latou te fausia le tagata ua avea ai nei oe i le tagata o le a avea ai oe. Ma o le tagata o le a avea ai oe o lou taunuuga lea.
E faatuatuaina e le Atua oe. E finagalo o Ia ia e toe foi atu ia te Ia ma avea e faapei o Ia, ma sa Ia foafoaina le fuafuaga atoatoa e fesoasoani ia te oe e faia ai. Pau lava le mea e tatau ona e faia—o mea Na te silafia e mafai ona e faia—o le taumafai i le mea sili e te mafaia e mulimuli ai.