“Aoao e Faalogo ia te Ia,” Mo Le Malosi o le Autalavou, Aok. 2023.
Aoao e Faalogo ia te Ia
O le malaga a Kavira e faatatau i fesootaiga sa faigata ae na tauia.
Ata na pueina e Christina Smith
A o laitiiti, sa le mafai e Kavira V. ona fesootai i se tasi. Ae o lea ua ia mauaina ni auala e fesootai ai ma isi, e aofia ai lona Tama Faalelagi.
O Kavira V. e sefuluono tausaga le matua mai Florida, ISA, e iloa le taua o fesootaiga. Pe faatasi ma aiga, faatasi ma uo, po o le Atua, ua fiafia Kavira i le mafai ona talanoa atu ia i latou.
O se vaega o le mafuaaga na te matuai faatauaina ai lena fesootaiga o le, na te iloa le uiga o le le mafai ona fesootai.
Ola Ae ma se Papupuni o le Gagana
A o lei siitia atu i Florida, sa nonofo muamua le aiga o Kavira i Uganda. O Kavira e logonoa ma sa lei mafai ona maua se gagana faifaailoga a o laitiiti, o lea sa le mafai ai ona ia fesootai atu i tagata na siomia o ia.
O lena papupuni o fesootaiga na aafia ai le tele o vaega o lona olaga. E faatatau i le aoga, na ia fai mai ai, “Sa faigata ia te au le matematika. Ou te lei aoaoina le Igilisi, ma sa sauaina au. Sa tele naua le faailoga tagata.”
Sa faigata foi le Lotu. I lena taimi sa auai lona aiga i se lotu ese. “Ou te lei maua ni aoaoga i le gagana, o lea sa ou le malamalama ai i le mea na tupu,” o le tala lea a Kavira. E saofai o ia i sauniga ma faia sauniga e aunoa ma le iloaina o o latou uiga. “Sa le tele ni avanoa mo tagata Logonoa,” o lana tala lea.
O le papupuni na aafia ai foi lana fesootai i lona aiga. “E na o au lava le tagata Logonoa i lo’u aiga, o nisi taimi ou te lagona ai le le tutusa ma i latou.”
Ina ua pe a ma le valu pe iva tausaga o Kavira, sa siitia atu lona aiga i Florida. Talu ai sa laitiiti o ia ma sa le mafai ona fesootai ma i latou, sa ia le iloa tonu pe aisea na latou filifili ai e siitia ese. Ae masalo ina ia mafai ona maua ni avanoa sili atu mo ia ma le aiga atoa.
Mauaina o Aoaoga
Ina ua siitia atu le aiga o Kavira i Florida, sa latou maua se aoga logonoa e mafai ona ia auai. “O le mafai ona maua lena aoaoga e ofoofogia,” o lana tala lea. “Ua mafai ona ou aoaoina mea e pei o le matematika, fesootaiga, tomai o le olaga e pei o le sailia o se galuega, ma tomai suesue.” Ua ia faaaogaina nei le Gagana Fai Faailoga FaaAmerika (ASL).
E fiafia foi o ia i gaoioiga faaopoopo. “Ou te fiafia i soo se ituaiga o taaloga,” o lana tala lea. “A o tuputupu a’e, ou te taalo soka i taimi uma, ma na ou iloa o loo i ai foi iinei [i le I.S.].” Sa ia aoaoina foi le volipolo, lakapi fu’a, pasiketipolo, ma le aau. “O se mea malie le aoaoina o nei taaloga fou.”
Ma talu ona laitiiti Kavira e fiafia lava o ia i faatufugaga. Ua faamoemoe o ia e faaleleia ma atonu foi e faaauau pea ona suesue i faatufugaga i le kolisi. “Ou te fia suesue pea ia aoao atili,” o lana tala lea. “Ou te fiafia lava i le aoga ma le aoaoina.”
Sailia o Fesootaiga Faaleaiga
Ua uunaia e matua o Kavira o ia i lana aoga. “La te fai mai e fai mea e te mafaia e aoao ai mea uma,” o lana tala lea. E faafetai tele o ia ona sa maua e lona aiga se aoga logonoa mo ia.
Ina ua uma ona aoao atili, sa le toe lagona e Kavira le le tutusa i lona aiga, aua ua ia iloaina e tutusa lava o ia ma i latou. E talanoa soo o ia i ona matua ma nai ona tei. “Ou te iloa i nisi taimi o ni talavou, tatou te le faatauaina moni lo tatou aiga—atonu o nisi taimi tatou te faatauaina ai a tatou uo e sili atu nai lo o tatou aiga,” o le tala lea a Kavira. “Ae o lo’u aiga lea ua ou malosi ai. Ua aoaoina a’u e o’u matua i mea e tatau ona ou faatauaina. Ua la fesoasoani ia te a’u ia avea ma se tagata lelei ma agalelei.
“O lo’u aiga lea ua ou malosi ai,” o le tala lea a Kavira.
Mauaina o Iesu Keriso ma Lana Ekalesia
E lei leva ona siitia atu lona aiga i Florida, ae valaaulia i latou e se tasi e auai i le O Le Ekalesia a Iesu Keriso o le Au Paia o Aso e Gata Ai. Sa aoaoina e le uso o Kavira se gagana faifaailoga, o lea sa ia faaliliu upu ia. Fai mai Kavira o le aoao e uiga ia Iesu Keriso ma Lana talalelei “na faasaoina ai lo’u ola.” A o lei oo mai lena taimi, sa ia lagonaina e pei o lona olaga sa tele ni faafitauli. “Sa fai si ou faanoanoa, ma sa ou le fiafia ma agaleaga i isi tagata.”
Ae ina ua aoao atili e uiga i le Atua, “sa ou manao e avea ma se tagata lelei,” o lana tala lea. “Sa ou popole mo lo’u aiga. Ou te lei toe fia agaleaga i tagata. Sa ou manao e suia lo’u olaga. Sa le o se filifiliga na faigofie ona faia, ae a o o’u aoao atili e uiga i le Atua, sa ou lagona le ese. Ou te fia faapei o Ia.”
Fesootaiga ma le Atua
Ua fiafia Kavira e aoao atili e uiga i le ala e fetalai mai ai le Atua ia te ia. “I le avea ai ma se tagata Logonoa, atonu e te manatu, ‘O fetalai mai ea le Atua?’ Tatou te le faalogo ia te Ia o ‘fetalai,’ e faapefea la ona tatou iloa o Ia?”
Sa auai o ia i se konafesi a le autalavou mo le autalavou Logonoa, ma i se tasi o a latou mafutaga faaleaoaoga sa latou talanoa ai e uiga i le ala e mafai ai e i latou o ni tagata logonoa ona fesootai ma le Atua. “Sa matou talanoa patino lava e uiga i le ala e talanoa mai ai le Agaga Paia i o matou loto ma mafaufau [tagai Mataupu Faavae ma Feagaiga 8:2]. E le faapea o se mea a le suetusi.”
Ua aoao Kavira ia iloa le Agaga Paia i lona olaga, ae ua ia fai mai foi o “se faagasologa faifai pea. O le a tatou fuafuaina pea i taimi uma le ala e fetalai mai ai le Atua ia i tatou.”
Fai mai foi o ia e tatau ona tatou saili ma le mataalia na avanoa e lagona ai le Agaga. “E tatau ona tatou saili atu ia te Ia ma ia onosai, faalogo ia te Ia a o tatou tatalo ma suesue i tusitusiga paia, ma talitonu o le a oo mai na mafaufauga i o tatou loto ma mafaufau.” Ua ia faamatalaina le lagona o le Agaga o se “musumusuga ma le olioli.”
Ua tuuina atu e Kavira le faailoga mo le “Ou te alofa ia te oe” i le Gagana Fai Faailoga faaAmerika.
O le mafai ona fesootai ma le Tama Faalelagi o se meaalofa e le mafaatauina aua e aumaia faalatalata atili ai i tatou ia te Ia. E le manatu mama Kavira i lenei meaalofa—e pei lava ona ia faatauaina aoaoga ma lona sootaga i le aiga. A tatou aoao pe faapefea ona fetalai mai le Atua ia i tatou, o le a tatou iloa atili o Ia. Ua oo Kavira i lena mea, ma e mafai foi ona e faia!