“O Le Sailiga Faaleagaga o Lou Olaga Atoa ,” Mo Le Malosi o le Autalavou, Aok. 2023.
O Le Sailiga Faaleagaga o Lou Olaga Atoa
O le aoao ia iloa ma alofa i le Alii o Iesu Keriso e faaauau pea i lou olaga atoa.
Ua faafeiloai e Elder Andersen ia talavou nofofua matutua i Aurora, Filipaina, ia Novema 2015.
O le a le mea e oo mai i lou mafaufau pe a e faalogo i le upu sailiga? Pe e te mafaufau i ata tifaga po o tusi ma toa totoa o e malaga i malaga ofoofogia e tumu i mea matautia? Pe atonu foi e te mafaufau i se tasi e tatau ona alu i se misiona faigata e faasaga i mea uma e le mafai ona ausia?
E mafai ona maua sailiga i tala mai le salafa o le lalolagi. Ae pe na i ai se taimi na e mafaufau ai pe o i ai sau sailiga—o se mea telē ma iloga e mafai ona e faia lea o le a suia ai e faavavau lou olaga ma olaga o isi mo le lelei sili atu?
Ioe, e i ai sau sailiga faaleagaga taua tele! Ae e le pei o sailiga e te faitau i ai i tusi pe vaai i ai i ata tifaga, o lau sailiga e amata i se valaaulia suia-olaga mai le Faaola ma le Togiola o le lalolagi: “O mai ia te au” (Mataio 11:28).
O le Valaaulia a le Faaola
Ua Ia valaaulia tagata uma ia talitonu ma faalagolago ia te Ia, ia opogi Lona suafa, Ana aoaoga, ma Ana poloaiga.
Po o fea lava e te nofo ai po o taleni, uiga auaumama, ma aafiaga tulaga ese o le olaga o ia te oe, o le faamuamua o Iesu Keriso i lou olaga o le sailiga lea o lou olaga atoa . Ua outou ola i lenei lalolagi ua tumu i luitau ma mea faalavefau. Ina ia tumau lou taulai ia Iesu Keriso ma ia ola i se olaga o le faatuatua ia te Ia i lou olaga atoa, o le a manaomia ai le lototele ma le fesoasoani mai le lagi.
Maua le Malosi i Sauniga ma Feagaiga
O se fesoasoani tele mai le lagi o sauniga ma feagaiga o le malumalu lea e tausia i tatou ia “faavaeina, mauaa, faatuina, ma faamautuina”1 i la tatou sailiga ia o mai i le Faaola.
E te osia feagaiga pe a e papatiso. A o e alualu i luma i le talalelei, o le a e osia nisi feagaiga i le malumalu. Na aoao mai Peresitene Russell M. Nelson, “O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso.”2
I lenei lalolagi ua faatumulia i le le talitonu ma le faalavelaveina o leo ma le faateleina o le vāvāō ma faaosoosoga, o le saogalemu ma faamanatu e faapea o sauniga ma feagaiga e tuuina mai o le a faatumauina ai lou agai i luma i le mea na ta’ua ma le manatunatu loloto e Peresitene Nelson o le ala o feagaiga.
Ola agavaa mo le Agaga Paia
Toeitiiti atoa le 2,000 tausaga talu ai, na fai mai ai le Aposetolo o Paulo e faapea, o mea a le Atua e na o le Agaga Paia e mafai ona iloa ai (tagai 1 Korinito 2:11–14). O Ana upu o loo matua moni lava i aso nei.
A o e mauaina le meaalofa o le Agaga Paia i le papatisoga, e tatau ona e taumafai e ola agavaa mo lana faatosinaga faifai pea e ala i mea e te faia, mea e te fai atu ai, ma po o ai foi e te faasoa atu i ai lou taimi. O le faia o lena mea, o le a oo mai ai le malamalama faaleagaga ma le mautinoa atili i lou agaga.
Ua fautuaina i tatou e Peresitene Nelson e filifili e “aloese mai soo se mea e aveesea ai le Agaga”3 ma “ia faia le galuega faaleagaga e manaomia e olioli ai i le meaalofa o le Agaga Paia ma faalogo soo ma sili atu le manino i le siufofoga o le Agaga.”4
Pipiimau i Aafiaga Faaleagaga
Sa liua Paulo i le Alii ina ua “susulu mai le lagi le malamalama tele” ma sa ia faalogoina le siufofoga o le Alii (Galuega 22:6–7). Sa pipii mau i ai Paulo ma isi aafiaga faaleagaga faapitoa i lona olaga atoa. E tatau ona tatou faia foi faapea.
Sa feagai le Perofeta o Iosefa Samita ma tetee ma sauaga faifai pea, ae na te lei faagaloina lava pe faafitia lona aafiaga i le Uluai Faaaliga. Sa ia molimau atu ma le lototoa na faaali mai le Tama ma le Alo ia te ia. “Sa ou mautinoa lena mea,” sa saunoa ai Iosefa, “sa ou mautinoa sa silafia e le Atua lena mea, ma e le mafai ona ou faafitia” (Iosefa Samita—Talafaasolopito 1:25). O le pipiimau ai i aafiaga faaleagaga na faamautinoa atu ai ia Iosefa le alofa o le Atua ma faamalosia o ia i le galuega na tuuina atu e le Alii ia te ia e fai.
E ui ina oo mai faaaliga faalelagi i nisi taimi, ae e oo mai aafiaga faaleagaga ma vavega ia i latou o e saili atu i ai ma le lotomaualalo ma le agaga tatalo. Mafaufau i ou aafiaga i le MMA po o lagona na e lagonaina a o e faitauina muamua le Tusi a Mamona. Pipii mau i nei taimi anoa o lou olaga. O le a latou faamalosia oe i lau sailiga e sau ia Keriso.
Filifili le Faatuatua
I lona soifuaga atoa, sa sasaina ma fetogia ai le Aposetolo o Paulo i maa ma sao mai ai i vaa na malepe e tolu (tagai 2 Korinito 11:24–25). Sa ia fetaia’i ma le toatele o e sa mananao e faatama’ia o ia ma mafatia i le “vaivai ma le tiga,” “fia ai ma le fia inu,” ma le “malulu ma le le lavalava” (2 Korinito 11:26–27).
E toaitiiti lava tagata o le a oo i tofotofoga faigata e pei o Paulo, ae e oo lava i ona puapuaga sili ona loloto, e mafai ona “faanoanoa, ae o taimi uma lava e olioli ai” ma “[ia te ia] se mea, a o lea [ua ia te ia] mea uma” (2 Korinito 6:10) ona sa ia filifilia le faatuatua ia Iesu Keriso.
E le faigata tele ona filifili le faatuatua ia Iesu Keriso pe a tatou lagonaina le malosi faaleagaga, ae e tatau foi ona tatou filifili le faatuatua pe a oo ina faigata le olaga. O le a e iloa ai e le tu le Faaola i le faaiuga o lau sailiga ma faatalitali mo oe e te sau ia te Ia. O loo tu o Ia i ou autafa ma faasinosino le ala. O Ia o le ala (tagai Ioane 14:6).
Ua saunoa mai Peresitene Nelson, “E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa.”5 Ua tautino mai e le taiala Mo Le Malosi o le Autalavou : O Iesu Keriso o “le malosi o le autalavou.”6
O le a Faataunuuina Ana Folafolaga
Ou te faafetai mo lo’u malamalama mautinoa o Iesu o le Keriso. Ou te molimau atu o le iloaina ma le alofa ia te Ia o se tasi lea o avanoa sili o le olaga faaletino.
I se aso i le lumanai, o le a e tootuli ai i Ona vae. I lena aso, afai sa e tausia au folafolaga ia te Ia, o le a olioli lou agaga a o Ia faataunuuina Ana folafolaga uma ia i latou uma o e ua o mai ia te Ia ma le “faamoemoega atoa o le loto” (3 Nifae 18:32), tuputupu ae i lo latou alolofa mo Ia, ma saili e lagona Lona faatasi mai paia i o latou olaga atoa.
O le a avea ma se taimi sili ona paia, ma faapaleina i lau malaga faaleagaga!