“Faatuatua, Galuega, Alofa Tunoa … ma le Tietie Uila?!,” Mo Le Malosi o le Autalavou, Aok. 2023.

Sau, Mulimuli Mai ia te A’u

Galuega

Faatuatua, Galuega, Alofa Tunoa … ma le Tietie Uila?!

Saunia e Marissa Widdison

Mekasini a le Ekalesia

Aoao e uiga i mea e fesoasoani ia te oe e agai ai pea i luma.

Sa ou tilotilo i le faata i le pa’u ua mafoefoe i lalo o lo’u isu ma luga o lo’u auvae. Ma le faaeteete, sa ou soloiesea ni fasi iliili ninii. Ioe, sa foliga uma lava o se avaaluga ma se ava. O se ava maosiosia!

I ni nai minute na muamua atu, sa ou aoaoina ai se lesona taua tele e uiga i le tietie i se uila vilivae: o le tumau o le nofo sa’o e matuai faigata lava sei vagana ua e alu agai i luma! Nai lo le viliina, sa ou tuai tele lava, tu faafuasei i taofi, ma palasi ese ai.

O le a le faatatauga o lenei mea i le talalelei? O se tasi lenei o fesootaiga e mafaufau i ai. E talitutusa ma le auala tatou te manaomia uma ai le paleni ma le faaosofia e nofo sa’o i luga o se uila, o lo tatou alualu i luma e faavavau e faalagolago uma i le faatuatua ma galuega lelei. Ma o le tietiega atoa ua mafai ona o le alofa tunoa o Iesu Keriso.

Mafaufau i ai faapenei: Na avatu e Iesu Keriso ia te oe le uila. O ia lea e fesoasoani ia te oe e aoao pe faapefea ona tietie. E mafai ona Ia talanoa atu ia te oe e ala i faatonuga, tuu atu ia te oe ni fautuaga, ma taofiofi mau lou nofoa a o e oso i luga. Ae o oe lea e tatau ona filifili e alu i luma.

Sa faasoa mai talu ai nei e Elder Dieter F. Uchtdorf ni manatu talitutusa e uiga i uila vilivae e uunaia ai i tatou e agai pea i luma ma le faatuatua.

“Ia taulai atu ou mata i le auala i ou luma. Taulai atu i lou taunuuga,” o lana tala lea. “Ma vili pea le uila. O le tumau o le paleni e faatatau uma lava i le agai i luma.”¹

I lau faitauga o le Feagaiga Fou i le taimi nei, atonu e te matauina na aoao atu e uluai Aposetolo le tele o mea e uiga i le tietie i se uila vilivae. O lau tala ula lava! Ae sa latou aoao atu e uiga i le faatuatua, alofa tunoa, ma galuega i le tele o taimi.

Mo se faataitaiga, na aoao mai Peteru e faapea “e faaolaina i tatou e ala i le alofa tunoa o le Alii o Iesu Keriso” (Galuega 15:11).

Ma vaai i le mea o loo faaali mai ai ana aoaoga e uiga i le alofa tunoa—i le tusi o Galuega, lea na tusifaamaumau ai faatinoga a le au soo! O le tele o le Feagaiga Fou o loo faamatala mai ai le ala na faimalaga ai alii ma tamaitai faamaoni ma aoao atu e uiga ia Iesu Keriso. O lenei mea ua aofia ai le tuufaatasiga o le i ai o le faatuatua, galue malosi, ma le taliaina o le fesoasoani lagolago a le Faaola.

O a isi mau e mafai ona e maua e talanoa ai e uiga i le faatuatua, galuega, ma le alofa tunoa? E faapefea ona e matauina na mea e tolu o galulue faatasi i lou lava olaga? O ni nai fuaiupu nei e te amata ai: Iakopo 2:14–17; Efeso 2:8–10; ma Moronae 10:32–33.

O le taimi nei, o le talafaatusa o le uila e le atoatoa, o lea aua le popole tele i mea e faatusa i ai mea uma. Sei o tatou faaaogaina o se mea e fesoasoani tatou te manatua ai e le mafai ona tatou faaolaina i tatou lava, ma o le a le faamalosia i tatou e le Faaola ina ia faaolaina, foi. O le taimi tatou te galulue faatasi ai ma Ia, taumafai e mulimuli i Ana aoaoga ma faaali atu le alofa mo isi, e tupu le maneta. E manao Satani ia tatou fiu, nofo i lalo, ma magoto i le agasala ma le faanoanoa. Ae e alolofa le Tama Faalelagi ma Iesu Keriso ia i tatou ma o loo faamalosiau mai ia i tatou i laasaga uma—po o vili uma o le uila—o le ala!

O lea la o le oso i luga o lena nofoa, tulei i luma, amata ona vili, ma lagona le savili i ou foliga. O le agai i luma e mautinoa e manaia le lagona, a ea?!