“Ou Te Iloa o le a Ou Toe Vaai i Lo’u Tina,” Mo Le Malosi o le Autalavou, Aok. 2023.
Ou Te Mafaia Mea Uma ia Keriso
Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).
Ou Te Iloa o le a Ou Toe Vaai i Lo’u Tina
Ou te fiafia i fuaiupu i le Tusi a Mamona o loo talanoa mai e uiga i le ala na tausia ai e tina o le autau talavou i latou i le Alii (tagai Alema 56:47–48; 57:21). Ou te faafesootaia na fuaiupu i lo’u tina. Ou te manatu o ia o se tagata e sili ona maoae. Ou te fia faapei o ia.
Sa tauivi lo’u tina ma le kanesa mo le tusa ma le tolu tausaga. Sa toeitiiti atoa lo’u 12 ina ua maliu o ia. Ina ua maliu o ia, sa ou lagonaina sina le mautonu. O le mea e sili ona ou misia e uiga ia te ia o lona i ai lea iina mo i matou.
I lo’u aso fanau lona 12, i le 13 o aso talu ona maliu lo’u tina, na sau ai la’u uo o Iosefa i le pati o lo’u aso fanau. Sa ia tuuina mai ia te au se meaalofa, fusi mai ia te au, ma musumusu mai i lou taliga, “Ou te faamalie atu e uiga i lou tina.” Na taua naua lena mea ia te au. Sa ia faaali mai ia te a’u sa alofaina a’u ma sa popole tagata mo a’u.
Pe a feagai ma lo matou faanoanoa, e masani lava ona maua e lo’u tama le taimi mo i matou e faia faatasi ai mea faaleaiga. O le auauna atu i isi sa fesoasoani tele foi ia te au. E ui lava sa ou faanoanoa, ae sa i ai foi faafitauli o isi tagata. Sa ou fesoasoani ia i latou, ma o lena mea na ou maua ai se lagona lelei.
Sa i ai taimi i le po sa ou tagi ai. I na taimi, sa ou lagonaina le mafanafana ina ua ou liliu atu i le Alii ma tatalo ina ia toe fiafia. Ou te manatua lo’u mafaufau sa ou iloaina o le a ou toe vaai i lo’u tina.
O loo ou faanoanoa pea e le o iinei lo’u tina. Ae o lona maliu e lei lagonaina o le iuga lea e pei ona ou manatu i ai, aua ou te iloa o le a ou toe vaai ia te ia. Ou te tulimata’i atu i ai. E le gata i lea, sa lelei tele lo’u tina fai, ma ua ia faatumuina moni lava le matafaioi o se tina.
Na maliu le Faaola mo i tatou ma tauave i Ona lava luga a tatou agasala uma. Ou te iloa Na te silafia o tatou popolega taitoatasi ma faafitauli. Ona o Lana taulaga, ua mafai ai ona tatou toetutu ma maua ni aiga e faavavau. O lena malamalama ua fesoasoani tele ia te a’u.
Ethan J., Virginia, ISA