“Saili le Malamalama,” Mo Le Malosi o le Autalavou, Aok. 2023.
UpuFaaiu
Saili le Malamalama
Ata na tusia e Emily Jones
O lo tatou faamoemoega a o tatou saili atu i se malamalama o le talalelei a Iesu Keriso o le tatau lea ona faateleina le faatuatua i le Atua ma i Lana fuafuaga paia o le fiafia ma ia Iesu Keriso ma Lana taulaga togiola ma ia ausia ai le liuainatumau. O lena faatuatua faateleina ma le liua o le a fesoasoani ia i tatou e osia ma tausia feagaiga ma le Atua, lea e faamalosia ai lo tatou manao e mulimuli ia Iesu ma faia se suiga moni faaleagaga i totonu o i tatou. O lenei liuga o le a aumaia ia i tatou se fiafia sili, aoga, ma se olaga maloloina ma fesoasoani ai ia i tatou e faatumauina se vaaiga e faavavau.
Ina ia ausia lenei mea, e manaomia ona tatou tumau ia Iesu Keriso e ala i le faatofuina o i tatou lava i tusitusiga paia, olioli i ai, aoaoina o Ana aoaoga faavae, ma taumafai e ola i le ala na Ia soifua ai. Ona faatoa mafai lea ona tatou iloa o Ia ma iloa Lona siufofoga, ma iloa ai a tatou o mai ia te Ia ma talitonu ia te Ia, o le a tatou lē fia aai lava pe fia inu (tagai Ioane 6:35).
E le tupu faafuasei lena mea. O lefaaogatusaina o i tatou ma faatosinaga sili ona maualuluga o le amioatua e le o se mataupu faigofie; e manaomia ai le valaau atu i le Atua, ma aoaoina pe faapefea ona faatotonugalemuina le talalelei a Iesu Keriso i o tatou olaga.
Ou te molimau atu ia te outou a tatou saili e aoao ma le naunautai, loto i ai, mausali, ma le faamaoni le talalelei a Iesu Keriso ma aoao atu i le tasi ma le isi ma se faamoemoega moni ma i lalo o le faatosinaga a le Agaga, e mafai e nei aoaoga ona liua loto ma musuia ai se manao ia ola e tusa ma upumoni a le Atua.