“O Auala e 4 e Mafai Ai Ona Avea Atili Oe e faapei o Iesu Keriso,” Mo Le Malosi o le Autalavou, Aok. 2023.
O Auala e4 e Mafai Ai Ona Avea Atili Oe e faapei o Keriso
E manaomia ni manatu mo le auai i le polokalama a Tamaiti ma le Autalavou? O nisi nei o mea o loo faia e le autalavou i Filipaina!
1. Auauna Atu e pei o Ia (Auaunaga ma Gaoioiga)
E avea atili oe e pei o le Faaola e ala i le auauna atu i isi e pei o le a Ia faia. Ma e le tatau ona faigata! O auaunaga e mafai ona faigofie e pei o le auai i gaoioiga a Alii Talavou po o Tamaitai Talavou, faia o papatisoga mo e ua maliliu, po o le auina atu o se savali agalelei i se uo. E mafai faapefea ona e auauna atu i isi?
“I le avea ai ma se tamaitai talavou, ou te fiafia e tautua i o’u uso a tamaitai talavou ma auauna atu ia i latou. Ou te iloa o loo ou fesoasoani e faapotopoto Isaraelu, e oo lava i la’u uarota.
Jana, 17
“Pe a ou mafaufau e uiga i le auauna atu, ou te mafaufau i lo’u tiute ma le tiutetauave o se tiakono e fesoasoani e tufa le falaoa ma le vai o le faamanatuga i Aso Sa uma. Ou te iloa o Iesu Keriso o le faataitaiga sili o le auauna atu.”
Josh, 13
2. Tuputupu Ae e pei o Ia (Atinaega Faaletagata Lava Ia)
E mafai ona e faatutuina ni sini ia tuputupu a’e atili e pei o le Faaola faaleagaga, faaletino, faaleagafesootai, ma faaleatamai (tagai Luka 2:52). Ole atu i le Tama Faalelagi pe faapefea ona Ia finagalo ia e tuputupu a’e, ona fai lea o se fuafuaga ma faatino! E mafai faapefea ona e avea atili e pei o le Faaola?
“Ona o le alofa o le Tama Faalelagi mo i tatou, ua Ia faamanuiaina ai i tatou i meaalofa ma taleni. Mo au, ou te lagona le olioli i taimi uma ou te siva ai aemaise lava pe a ou faasoa atu e ala i le aoaoina o isi. O se auala sili e faamalosia ai lo’u faatuatua i lo’u Faaola, fausia lo’u talitonuga mautinoa, ma e oo lava i le feiloai atu i uo fou. Ae o se tasi o mea sili ona lelei e uiga i ai o le, ou te faia o’u matua, tei, ma uo ia fiafia. Ou te iloa ua tuuina mai ia i tatou meaalofa ma taleni mo le manuia o isi, ma o le mea lena e faafiafiaina ai a’u pe a ou siva.”
Leigh, 16
3. Aoao ia te Ia (Aoaoina o le Talalelei)
E avea atili oe e pei o le Faaola a o e suesue i le talalelei ona faatino lea o mea e te aoaoina. E te aoao e uiga ia te Ia i au suesuega faaletagata lava ia ma a o e auai i le lotu ma le seminare, mo se faataitaiga. E mafai faapefea ona e aoao atili i le Faaola?
“O le auai i la’u vasega a Tamaitai Talavou ma faalogologo i failauga i le taimi o sauniga o le Aso Sa ua ou maua ai le malamalama. O afioga a le Atua, pe a faatatau i o tatou olaga, e avea ma poto.”
Mia, 12
“O le faamuamuaina o le seminare e faigofie lava le ta’u nai lo le faia. Ae a o e tatalo ma mafaufau pe aisea e taua ai le aoaoina faaleagaga, o le a le faigata le faaiuga. E fesoasoani ou te iloa ai lo’u Faaola, faalatalata atili atu ai ia te Ia, ma tuputupu a’e faatasi ma Ia.
Dzuliah, 19
4. Liliu atu ia te Ia.
A o e taumafai ia avea atili e faapei o Keriso, ia mautinoa o lou taulaiga ua ia te Ia! O Ia “o le ala, ma le upu moni, ma le ola” (Ioane 14:6). O nisi taimi e mafai ona lagona le faigata ona fai o mea uma e te manaomia, ae a o e taulai atu i le Faaola ma mea o le a Ia faia, e mafai ona e iloa le mea e sili ona taua.
“O lo’u alofa mo Iesu Keriso e tosina ai a’u i le faia o faaiuga taua aua ou te taumafai e vaai faalemafaufau i mea o le a Ia faia. Ua ou faia ni faaiuga le lelei i le taimi ua tuanai ona o le le i ai o lo’u alofa mo lo’u Faaola e fai ma au taulaiga. Ou te iloa tatou te le atoatoa, ae e ala i le mulimuli ia Iesu Keriso ma tausia Ana poloaiga, e mafai ai ona tatou faaali atu lo tatou alolofa mo Ia ma avea atili e faapei o Ia.
Justine, 15