“O Le Ki i le Suiga Moni,” Mo Le Malosi o le Autalavou, Aok. 2023.
O Le Ki i le Suiga Moni
O suiga moni ma tumau e mafai, ae e le mafai ona tatou faia na o i tatou.
I le aoga maualuga sa ou taumafai ai e alo vaa. Sa foliga faigofie lava—saofai i totonu o se vaa ma faaminoi foe ina ia alu saosaoa i luga o le vai. Sa ou le iloa po o le a le mea sa ou i ai.
Mo sina taimi, sa le mafai ona ou faapaleniina le vaa, ma o lo’u faaaogaina o foe na mafua ai ona ou tu nai lo le folau lelei i luga o le vai.
I le aluga o taimi, sa ou suia le auala na ou faapaleniina ai le vaa ma taulimaina ai foe. Sa ou faia lemu isi suiga ma faaleleia—e masani lava e aunoa ma le iloaina. Ona amata lea ona malie le alo vaa! Sa ou fiafia i le alu manaia o le alo a o ou see vave atu ma le filemu i luga o le vai.
O le faia o suiga lelei—e oo lava i vaega aupito laiti—e le gata ina fesoasoani i taaloga e pei o le alo vaa ae faapea foi i le avea ai ma tagata e tatau ona avea ai i tatou.
Ae e le faigofie suiga i taimi uma.
Ua Tatou I Ai Iinei ina ia Sui
Pe na i ai se tasi o nei manatu a o e taumafai e faia ni suiga i lou olaga:
’Oi aue, ua ou toe faiafoi lea lava measese! E mafai faapefea ona ou matua vaivai lava?”
“E matuai ou le aogā lava.”
“Ua tele naua mea ua ou agasala ai ina ia faamagaloina.”
O mafaufauga faapenei e mafai ona avea ai le suia o se mea e le mafaia. Ae ua tatou i ai iinei i lenei olaga ina ia suia ma faaleleia. O suiga moni ma tumau e mafai, ae e le mafai ona tatou faia na o i tatou.
Na saunoa mai Peresitene M. Russell Ballard, o le Sui Peresitene o le Korama a Aposetolo e Toasefululua, “O e vaaia se mea i lou olaga e itiiti ifo nai lo le mea e te manao ia avea ai? … Afai e te iloa ni mea i lou olaga e te le fiafia i ai, ole atu i lou Tama Faalelagi mo se fesoasoani ma o le a e maua le malosiaga i totonu e sui ai.”1
O le malosi e suia ai e oo mai e ala ia Iesu Keriso ma Lana Togiola.
Atatusi o Keriso na saunia e Judith A. Mehr
Uiga FaaKeriso: O Se Taiala mo Suiga
Ua faaali mai e le Faaola ia i tatou le ala sili e ola ai. Ua fetalai mai o Ia ia i tatou, e mulimuli ia te Ia ma avea faapei o Ia (tagai i le 3 Nifae 27:27). E mafai ona tatou faia lenei mea e ala i le suesueina o Lona soifuaga ma uiga auaumama.
Ua faamatala mai e tusitusiga paia ia uiga faaKeriso, e aofia ai le faatuatua, faamoemoe, alofa mama ma le alofa, amiomama, poto, onosai, lotomaualalo, filiga, ma le usiusitai. 2 Na aoao mai Elder Dieter F. Uchtdorf o le Korama a Aposetolo e Toasefululua e faapea, a o tatou saili ma le filiga ma le agaga tatalo e atiina ae uiga faaKeriso, “o le a faamanuiaina i tatou e le Faaola e sili atu i lo tatou lava gafatia e avea ai ma tagata e finagalo o Ia e avea ai i tatou.”3
Opogi le Avanoa e Sui Ai
Sa tatau ona ou faia ni suiga pe afai ou te manao ia lelei atili i le alo vaa. E na o le pau lena o le taimi e mafai ai ona ou lagonaina le olioli e ofo mai e le alo vaa.
Mo i tatou ia iloa po o a mea e ofo mai e le olaga—e oo lava i le ola e faavavau—, e le o fetalai mai le Faaola ia i tatou e lafoai o tatou uiga faaletagata mo le na ona ia suia. Ua Ia talosaga mai ia tatou suia mea e manaomia ona suia e faalatalata atili atu ai ia te Ia.
O le uiga atoa lenei o le salamo. Na aoao mai Peresitene Russell M. Nelson: “A tatou filifili e salamo, ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. … Pe a tatou filifili e salamo, ua tatou filifili ia avea atili e faapei o Iesu Keriso!”4
Na tuuina mai e le Faaola Lona soifua ina ia mafai ona Ia fesoasoani ia te oe e talia le avanoa matagofie e tatau ona e suia ma avea ai ma tagata uma e finagalo ma silafia e Ia e mafai ona avea ai oe.