“E Fesoasoani o Ia ia te A’u e Fai Mea Faigata,” Mo Le Malosi o le Autalavou, Aok. 2023.

Ou Te Mafaia Mea Uma ia Keriso

Ua faasoa mai e le autalavou le ala na faamalosia ai e Keriso i latou e faia mea faigata (tagai i le Filipi 4:13).

E Fesoasoani o Ia ia te A’u e Fai Mea Faigata

Sa ou fanau mai ma se faama’i e ta’ua o le tino samasama. Sa i ai se mea na sese i le taimi o le togafitiga o lenei faama’i, o lea sa le atoatoa ai la’u faalogo ma maua ai se ituaiga o Supa lea e faigata ai ona ou faia ni gaoioiga patino o le tino ma maua le paleni.

Sa faigata le aoga ona o isi tamaiti. Sa latou tulei, tatu’i, fai mai ni tala faatiga, fai ni tala pepelo, ma sioa mai. Sa le mafai ona ou finau atu, o lea na pau lava le mea na ou faia o le tatalo. O nisi taimi sa tali mai ai a’u tatalo i le taimi lava lena, ma o isi taimi sa umi se taimi mo tali. Ae sa ou faatuatuaina le Tama Faalelagi, o lea sa ou tatalo ai pea.

Ina ua 15 ou tausaga, sa avea au ma se peresitene o le vasega a Tamaitai Talavou ma se faufautua o talafaasolopito o aiga a le uarota. Sa ou fefe ne’i le mafai ona ou faia mea uma. Sa le tele so’u iloa e uiga i talafaasolopito o aiga. Sa ou tatalo mo se fesoasoani, maua mai faatonuga mai le Alii ma taitai musuia, ma amata ona galue. Ou te matua faafetai mo le faatuatuaga ua tuuina mai e le Tama Faalelagi ia te au. O igoa uma e auina atu i le malumalu ou te matua fiafia ai lava. Na fesoasoani mai ma faamalosiina au e le Tama Faalelagi ma Iesu Keriso.

Ua ou aoaoina e le tuuina mai e le Tama Faalelagi ma le Faaola ni tapulaa ia i tatou ona o tulaga faaletino. La te alolofa ma onosai, ua saunia ma aao mafola e aoao, faamalosia, ma fesoasoani mai ia i tatou.

E lei faatapulaaina a’u e o’u tulaga faaletino, aua a oo mai so o se faafitauli, o loo i ai iina le Atua ma se aao faaloaloa. E manaomia ona ou liliu atu ia te Ia ma ole atu mo se fesoasoani.

Jordana S., Goiás, Pasila