Tuusa‘o i le Mataupu

O le a le matafaioi o le mafaufau ma le mafuaaga i le talalelei?

E pei lava ona uunaia e le Alii le soifua maloloina faaletino (tagai Mataupu Faavae ma Feagaiga 89), Na te uunaia foi i tatou e faaaoga ma faamalosia o tatou mafaufauga ma le mafuaaga (tagai Mataupu Faavae ma Feagaiga 130:18–19). E tatau ona tatou faaaogaina le mafaufau lelei, mafaufauga atamai, ma mafuaaga e aoao ai, faia faaiuga, ma faaaoga upumoni i aso taitasi.

Ae e pei ona saunoa mai Peresitene Henry B. Eyring o le Au Peresitene Sili: “O faamasinoga faaletagata ma mafaufauga talafeagai o le a le lava lea e maua ai tali i fesili e sili ona taua i le olaga. Tatou te manaomia faaaliga mai le Atua” (“Faaaliga Faifai Pea,” konafesi aoao Oke. 2014 [Ensign po o le Liahona, Nov. 2014, 70]).

O la tatou mafuaaga masani e le fetaui ma le iloatino o mea faaleagaga. E tatau ona tatou faalagolago i faaaliga e ala i le Agaga mo lena mea (tagai 1 Korinito 2:14). “O le Agaga … e tautala e uiga i mea e pei ona i ai moni lava” (Iakopo 4:13; faaopoopo le faamamafa). E talanoa mai le Agaga e uiga i se mea moni e maualuga atu ma atoatoa nai lo le mea moni tatou te vaaia i o tatou sane ma a tatou mafuaaga (tagai Isaia 55:8–9). Ma afai e uunaia oe e le Agaga e fai se mea e le fetaui i le taimi muamua, ia lototatalo ma manatua o le a faamanuiaina pea lava oe a o e saili e mulimuli i le Agaga.