Fesili ma Tali

“E faapefea ona e aafia patino i le Agaga ma Ana uunaiga?”

E sili atu le taua o manatuaga o le pa’i mai o le Agaga Paia i o tatou loto ma Lona faamautinoaga faifai pea o le upumoni nai lo manatuaga o mea na tutupu. O le tele o taimi, o se lagona o le malamalama ma le faamautinoaga filemu.”

Peresitene Henry B. Eyring o le Au Peresitene Sili, “Maua Lona Agaga e Faatasi ma Outou,” konafesi aoao, Ape. 2018 (Ensign po o le Liahona, Me 2018, 87).

Manatu ma Mafaufauga Faafuasei

“Ou te lagonaina le Agaga ma maua musumusuga e ala i manatu ma mafaufauga faafuasei. E tupu lenei mea pe a tatala atu lo’u mafaufau i le Atua. I le tolauapiga a Tamaitai Talavou, sa ou lagonaina lava le tuuatoatasi. Sa ou savali atu i lo’u fale ma tatalo e uiga i ai. Mulimuli ane, sa ou maua le lagona e toe liliu. Sa ou faia ma feiloai ma o’u taitai. Sa matou maua se taimi maoae i le faasee i maea ma le ’ai o ni ipu kiona! O lenei aafiaga na fesoasoani ou te e aoao ai pe mafai faapefea ona ou lagonaina le Agaga.”

Harper J., 14, Oregon, ISA

Filemu i le Natura

“O le toafilemu o le natura e fesoasoani ou te lagona ai le Agaga. O le natura e aumaia ia te au le filemu pe a ou tauivi ma se mea. E masani ona ou nofonofo pe savalivali i fafo ma mafaufau pe mafai faapefea ona ou faatoilaloina ou tauiviga. Ua ou mauaina le tele o uunaiga a o siomia au e le natura.

Addison P., 14, Karolaina i Matu, ISA

Faatino Uunaiga

“Aua le tafieseina uunaiga e foliga mai e laiti. E oo lava i se manatu o le fai atu o se mea i se tasi e mafai ona avea ma ala a le Agaga e uunaia ai oe. E tusa lava pe foliga mai e laitiiti se uunaiga, ia faatino loa. A o e faaali atu ua e naunau e faatino i le faatuatua, o le a Ia uunaia oe e faia nisi mea se tele.

Rose W., 15, Iuta, ISA

Saunia

“Ou te lagonaina uunaiga a le Agaga pe a ou saunia lelei. Ou te faia lenei mea e ala i le faia o tatalo faamaoni ma taumafai malosi i le mea ou te mafaia e faalogo ai ia te Ia. Pe a ou lagona le saunia, e sili atu lo’u mautinoa ma le maufetuuna’i. Ou te iloa a tatou saunia, e mafai ona tatou maua uunaiga a le Agaga.”

Pauline K., 17, Fiti

O Le Faamafanafana

“E faamafanafana au e le Agaga. I se tasi taimi, sa ou tatalo ai mo se fesoasoani i se mataupu patino. I le taimi o la’u tatalo, sa ou lagona le faamafanafanaina. Sa ou iloaina afai ou te mulimuli pea i Ana fautuaga, o le a fesoasoani mai le Atua ma faamafanafana ia te au. O lenei mea na taitai atu ai au e faitau tusitusiga paia ma faia mea uma ou te mafaia ia lagona soo ai le Agaga.”

Sophie G., 15, Minesota, ISA

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“E le o au o se tagata sili ona lelei i soo se mea ou te taumafai e fai. E mafai faapefea ona ou taumafai pea e aunoa ma le lotovaivai?”

Auina mai lau tali ma lou ata ae le‘i oo i le aso 15 o Setema, 2023.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.