“Tauivi ia Iloa le Agaga Paia?,” Mo Le Malosi o le Autalavou, Aok. 2023.

Tauivi ia Iloa le Agaga Paia?

Saunia e Jessica Zoey Strong

Mekasini a le Ekalesia

Sa faapena foi a’u. Ae e le faapea e tatau ona fenumia’i e pei ona tatou faia ai i nisi taimi.

Ata

tamaitai talavou

Ata na tusia e Albert Espí

A o ou talavou, sa ou fefe e faapea, afai ou te malamalama sese i se uunaiga mai le Agaga Paia, o le a ou faaleagaina se fuafuaga tele a le Atua mo au. Ma o nisi taimi o lenei mea ou te fefe ai e faia ni faaiuga! Ae o nisi o aafiaga na fesoasoani ia te a’u e aoao ai e le faapea e tatau ona matuai fenumia’i lava.

1. E Faatuatuaina Oe e le Tama Faalelagi

I le aoga maualuga, sa ou maua ai le avanoa e sui ai i se aoga fou. Sa ou matuai manao lava e sui, ae sa ou le mautinoa pe finagalo le Tama Faalelagi ou te faia. Ina ua ou le mauaina se faamaoniga manino, sa amata ona ou soona mafaufau i ai. I se tasi aso, sa ou tatalaina ai se lole sukalati, ma na fai mai le pito i totonu o le pepa na afifi ai, “Ua e i ai tonu lava i le mea e tatau ona e i ai.” Pe o la’u tali lea? Pe na fetalai mai le Tama Faalelagi ia te a’u e ala i se pepa o le sukalati? Sa ou manatu ailoga.

Ina ua ou le mauaina lava se tali manino, sa iu lava ina ou faia le mea sa ou manatu o le filifiliga sili lea ona lelei ma sui [la’u] aoga. Ae o nisi taimi ou te popole pea atonu o le pepa afifi sukalati sa o se uunaiga na ou le amanaiaina. Ona oo lea i se tasi aso, a o ou ta’u atu ou popolega i se uo, sa ou lagonaina le filemu. O lena filemu o la’u tali lea—ae faatoa oo mai ina ua uma ona ou faia se filifiliga ma faatinoina.

E faatuatuaina oe e le Tama Faalelagi a o e taumafai e tausi Ana poloaiga ma mulimuli ia Iesu Keriso. E tatau ona e sailia Lana taitaiga i faaiuga tetele, ae afai e te le o iloaina se tali manino, fai se faaiuga ma agai i luma! E pei ona saunoa mai Elder Dieter F. Uchtdorf o le Korama a Aposetolo e Toasefululua: “E seāseā oo mai le malamalama faaleagaga ia i latou o e na o le nonofo i le pogisa ma faatalitali mo se tasi e euina se ki. E manaomia se faatinoga o le faatuatua e pupula ai o tatou mata i le Malamalama o Keriso.”¹

2. O Loo Taialaina Oe

I le avea ai ma se faifeautalai i le Nofoaga Autu e Aoao ai Faifeautalai, sa ou matamata ai i se vitio lea na saunoa ai Elder David A. Bednar o le Korama a Aposetolo e Toasefululua. Sa ia faasoa mai le ala a o avea o ia ma se faifeautalai i Siamani, sa ia fesoasoani ai ia Peresitene Boyd K. Packer (a o avea i lena taimi ma se tasi o le Korama a Aposetolo e Toasefululua) a o ia asiasi atu iina. A o lei malaga ese Peresitene Packer, sa tuuina atu e Elder Bednar ia te ia ni tupe Siamani mo lana malaga. Mulimuli ane, sa manaomia e Peresitene Packer le tupe e sopoia ai se eria e le saogalemu.

Sa lei iloaina e Elder Bednar sa taialaina o ia e le Agaga ina ua ia tuuina atu le tupe ia Peresitene Packer. Sa na ona ia mafaufau lava atonu o le a fiaai Peresitene Packer! ² Ma e pei foi o Elder Bednar, atonu e taialaina e le Agaga au faatinoga e aunoa ma lou iloaina. Ia talitonu a o e taumafai e ola i luga o le ala o feagaiga, o le a sili atu ona taialaina oe nai lo le mea e te iloa.

3. O Loo Faatasi le Agaga Paia ma Oe

I se tasi aso i la’u misiona, sa ma tatalo ai ma la’u soa ia iloa atili le Agaga Paia i lo ma aso atoa. A o ma mafaufau loloto, sa ma mafaufau i le auala ua folafola mai ia i ma’ua ia maua pea le Agaga e faatasi ma i ma’ua. Sa ma iloaina o le faatosinaga a le Agaga sa i ai ia i ma’ua i taimi uma. Ae sa ma masani soo i le lagonaina, o lea o nisi taimi ma te lei iloa ai.

Atonu e masani ona e lagonaina le Agaga Paia o lea e te le maitauina ai. Pe atonu foi e te manatu e te le lagonaina lava! Fesili ifo ia te oe lava pe o e sailia ni faailoga lapopoa, ma loloto nai lo le i ai o le mālū o le Agaga. Suesue i tusitusiga paia ma upu a perofeta e aoao atili ai e uiga i le uunaiga a le Agaga Paia. Afai e te tatalo ia iloa le Agaga Paia, e mafai ona e amata matauina auala laiti uma o loo Ia taialaina, aoao atu, ma faamafanafana ai oe.

Faaiuga

E tatau ona e faia le mea sili e te mafaia ina ia agavaa ai e iloa ma mulimuli i faaaliga faaletagata lava ia. Ae o loo e soona mafaufau i ai, taofi! I se talanoaga Faafesagai a le autalavou, na saunoa ai Elder Bednar, “[O le Agaga Paia] o le a taialaina o tatou laasaga, musuia mea tatou te fai atu ai ma faia, ma i le taimi lava tatou te le iloa ai.”³

A o e faia faaiuga, ia iloa e faatuatuaina oe e le Alii ma o loo fesoasoani ia te oe. A o e taumafai e tausia au feagaiga, o le a taialaina oe i lalo o se ala lea e iu lava ina taitai atu ai oe i le aiga i lou Tama Faalelagi.