“Jitōnbōro Ippān Anij,” N̄an Kōkajoorļo̧k Jodikdik ro, Nob. 2023.
Itok, Ļoor Eō
Jitōnbōro Ippān Anij
Ilo karōk in m̧ōņōņō eo an Anij, aolep jiron̄ ro im likao ro ewōr juon aer un ekwojarjar, kajjojo iaami ej jitōnbōro im aikuji.
Pijaikļo̧k ta eo al enkar āinwōt eļan̄n̄e kein kōjan̄jan̄ ko renkar juon wōt ainikier. Ta eo eļan̄n̄e aolep kii ko ilo juon piano ren kar ainikier wōt juon ak eļan̄n̄e aolep ainikien ko ilo juon kuwaer ren kar āin juon? Menin ekar ke kōm̧m̧an bwe al en kanoojin jab kaitoktoklimo!
Mōnōņō, kein kōjan̄jan̄ al ko im ainikien kuwaer ko reoktak ilo ainikien im kōjan̄jan̄. Kii ko ilo aolepen piano eo ej letok melodies ko, im kuwaer ko rej letok harmonies ko reaiboojoj. French horn ko, tuba ko, violin ko, im drum ko kajjojo rej kobaik juon ainikien eo ejenolo̧k n̄an harmony eo an juon orchestra.
Kajoor im Menin Leļo̧k ko
Āinwōt ilo kōjan̄jan̄, Jemedwōj Ilan̄ ej lan̄lōn̄ ilo taļōn ko reoktak, m̧wil ko, im en̄jake ko an kajjojo iaan ajri ro Nejin, kajjojo ej juon leddik ak ļaddik ejitōbōro. Jekdoon ta jekjek ko am̧, jabdewōt jikin kwoj mour ie ilo laļin, bwij ko, im armej ro, Jemedwōj Ilan̄ ej m̧ōņōņō ilo piktokūm̧ indeeo, eo kwomaron̄ erom̧ kōn pokake, tūriam̧o, im iakwe.
Kōn iakwe eļap, E ej karuwaineneik kom̧ n̄an loe piktokūm̧ ekwojarjar im kakūrm̧ool un eo am̧ ekwojarjar. Ej rojan̄ eok n̄an kōļapļo̧k menin letok ko an jetōb eo am̧, m̧wil eo am̧ āinwōt Anij, im men ko jet remaron̄i reļļap. Im E ej letok n̄an eok iien ko rem̧m̧an kajjojo raan n̄an ekkatak n̄an loe im jerbal n̄an ro ipeļaakūm̧ āinwōt an Jisōs Kraist naaj kar kōm̧m̧ane.
Ilo karōk eo ekwojarjar an Anij, jej itok n̄an laļin jān juon jined im jemed. Baam̧le ko rej aikuji jim̧ōr. Ippān doon, āinwōt ro rej leiaia ilo jokkun wōt juon, ro jineer im jemeer rej kōkkaajiririik im kakke n̄an baam̧le ko aer. Ilo m̧oko m̧wōd, ro jemeer im em̧m̧aan ro pāleer rej kōjeikiik kōn mera, etta bōro, im iakwe em̧ool—em̧m̧aan im kōrā ro ewōr ippāer m̧wil ko rejim̧we jej aikuji ilo aolep jemjerā ko ad. Aelōn̄ in lan̄ ej n̄iļaļļaļ, ilo jabdewōt jemjerā ko, ewōr ko̧kkure ie, kautiej er make, ak kōm̧akoko ilo jabdewōt kain wāween, jān em̧m̧aan ro im kōrā ro. Jeļā ņae, meanwōd, jouj, im jeļāļo̧kijeņ erreo rej m̧wil ko m̧wilin Kraist kajjojo iaad ej kappukot.
Em̧ool, ejjeļo̧k juon eweeppān—ejjeļo̧k baam̧le eweeppān. Jekdoon ta jekjek ko am̧, kautiej ro jinōm̧ im jem̧ōm̧ im iakwe baam̧le eo am̧—baam̧le eo eped ippem̧ im baam̧le eo kwonaaj bōk juon raan. Ad Rilo̧mo̧o̧r emaron̄ jipan̄ eok meļeļe, jeorļo̧k bōd, im rojan̄ ro ipeļaakūm̧. Ilo am̧ kōm̧m̧ane ijo koņaam̧ em̧m̧antata, Irooj enaaj jipan̄ im tōl eok. Jouj im keememej ijo jikūm̧ m̧okta jān Irooj im ilo Kabun̄ eo An ej kāālet jān m̧wil eo m̧wilim make im jim̧we eo am̧ ilo kejparok bujen ko am̧ ippen Anij.
Priesthood im Karōk eo an Anij
Anij eļapļo̧k an iakwe kōj im eļapļo̧k an jeļā kōn kōj jān ad iakwe im jeļā kōn kōj make. Maron̄ eo an priesthood em̧ōj letok n̄an kōjeram̧m̧an aolepen ajri ro Nejin. Brother ro rerreo rej kabwijer priesthood eo, ak rej jab priesthood eo. Būreejtōn Russell M. Nelson ej katakin bwe priesthood eo “jetjet in wōt n̄an kom̧ [kōrā ro] ejja āinwōt n̄an jabdewōt em̧m̧aan.” Priesthood eo ej leļo̧k n̄an kōrā ro im em̧m̧aan ro “maron̄ deļo̧n̄e … aolep mennin aorōk ko ilo jetōb ewōr ippān Irooj n̄an ajri ro Nejin.”1
Jerbal in Jipān Doon
Ilo Kabun̄ eo an Irooj, jej kapilōk ilo doulul ko ilo ad jerbal ippān doon. Ilo doulul ko ad, ritōl ro rej kappukot im̧we ko im ļōmņak ko jān aolep, ekoba jiron̄ im likao ro. Ilo kajjojo jekjek, jej tōpar kāālet ko rem̧m̧anļo̧k im bōk eļapļo̧k tōprak ilo jerbal eo an Irooj ilo ad kaurōk ļōmņak ko an kajjojo im jerbal ippān doon, ro jeid im jatid ilo jerbal in An.
Ilo ward ko im branch ko ad, jiron̄ ro im likao ro rej tōl kūlaaj ko im douluul ko. Ilo ko̧o̧njeļ eo an jodikdik ilo ward, ritōl an jodikdik ippān doon rej jipan̄ kajjojo jodikdik ro ekkeijel ippān aelōn̄ in lan̄, ritōl ro ad ilo Kabun̄ in, im ritōl ro jet an jodikdik. Āinwōt kampānien in jerbal in karejar ro n̄an ro rerūtto, likao ro im jiron̄ ro ad rej tōparļo̧k im kōjeram̧man elōn̄ armej. Ilo jerbal in jipan̄ eo ad, jej aolep jutak ippān doon.
Ej juon kōjeram̧m̧an me likao ro im jiron̄ ro rej jerbal āinwōt rikam̧ool ro an kain̄i ko an gospel eo em̧ōj an jepļaaktok. Kwoj rikam̧ool ro an peptaij ko, jim̧ōr n̄an peptaij ko n̄an ro remour im peptaij ko n̄an ro jibwier im jim̧m̧aer etto ilo tampeļ eo. Kwoj jerbal ilo jikin ko jet ilo m̧weo im̧ōn Irooj barāinwōt.
Bujen Kōjeram̧man ko ippān Anij
Kajjojo, juon jiron̄ im juon likao rej kōm̧m̧ani bujen ko rekwojarjar ippān Anij. N̄e jej tiljek ilo kautiej, bujen ko ad ippān Anij rej boktok kōjeram̧m̧an ko An—eļapļo̧k jān ad maron̄ pijaikļo̧k. Bujen ko ad ippān Anij remaron̄ kakwojarjar ikdeelel ko ad im m̧akūtkūt ko ad. Bujen ko ad im Pinmuur eo an Kraist remaron̄ jipan̄ kōj erom̧ āinwōt ajri ro nejin Anij—ettā bōro, kem̧m̧aanwa, obrak kōn iakwe (lale Mosaia 3:19). Ilo aolep men jej kōm̧m̧ane, jej ijjinoe ippān Jisōs Kraist. Jej kāālet E m̧oktata ilubwilijin aolepen kāālet ko ad rellōn̄, im likūt E m̧oktata ilo kāālet ko ad kajjojo jej kōm̧m̧ani.
Reilo̧k n̄an Rilo̧mo̧o̧r eo
Kwoj en̄jake m̧ōņōņō, okmeenen in en̄jake ko ilo būruom̧ ilo am̧ likūt Jisōs Kraist ilo ioļapļap in ekkatak gospel eo am̧, jerbal in jipan̄, m̧akūtkūt ko, im eddōkļo̧k eo am̧ make im ilo am̧ kāālet em̧m̧an. Kijejeto ko am̧ rej ped ioļapļap n̄an Kraist remaron̄ kalimomo im kōjeram̧m̧an ilo am̧ jipan̄ ro jet kōn meanwōd ejjab likjab im iakwe.
Men ko reļļap rej waļo̧k n̄e likao ro im jiron̄ ro rej iakwe Irooj im jerbal ippān doon ilo juon wōt im ilo aenōm̧man. Menin em̧ool ilo jikin jemenere, m̧akūtkūt ko an jodikdik, im FSY.
Kōn iakwe ejjeļo̧k jem̧ļo̧kin, Jemedwōj Ilan̄ ej karuwaineneik aolep jiron̄ im likao ro “n̄an itok Ippāņ im bōk leen em̧m̧an eo An; im E ejjeļo̧k Ej kabbōjrak e jān an itok Ippān” (2 Nipai 26:33).
Jemedwōj Ilan̄ im Jisōs Kraist rej iakwe eok. Renaaj jipan̄ eok im kōjeram̧m̧an eok n̄an likuun m̧oolin m̧ōņōņō. Jouj im kāālet Rilo̧mo̧o̧r eo ad Jisōs Kraist m̧oktata. Lōke Anij im erom̧ juon ilo Jisōs Kraist ippān ro ipeļaakūm̧. Āinwōt juon eo ejitōbōro nejin Anij, kwomaron̄ ekkeijelļo̧k ilo jukjuk in ped in an Armej ro Rekwojarjar ilo Kabun̄ eo An em̧ōj an jepļaaktok—Kabun̄ eo an Jisōs Kraist im Armej ro Rekwōjarjar ilo Raan Kraisto Āliktata Wōn kwe im wōn eo kwoj erom̧ ej aikuji ilo laļin rainin. Juon oktak eļap kwomaron̄ kōm̧m̧ane ilo baam̧le eo am̧, ilo Kabun̄ eo An em̧ōj an jepļaaktok im ilo laļin.
Ilo Jisōs Kraist, aolep men rem̧m̧an renaaj tōprak. Ilo Jisōs Kraist, aolep men ko rem̧ool renaaj itok, ilo iien eo im wāween eo an Anij. Āinwōt juon iaan rikam̧ool ro An rejenolo̧k, ij kam̧ool im kallim̧ūr.