“Rikanaan ro Rej Ļoor Rikanaan ro,” N̄an Kōkajoorļo̧k Jodikdik ro, Jept. 2022.
Kōppopo n̄ān Kweilo̧k eo Eļap
Rikanaan ro Rej Ļoor Rikanaan ro
Jabdewōt armej remaron̄ lo kōjeram̧m̧an ko jān aer ļoore rikanaan eo—em̧ool bar Rijilōk ro.
Ej wōnm̧aanļo̧k wōt kajjitōk eo n̄an kōj n̄an ļoor rikanaan eo. Ak jet remaron̄ ļōmņak etke ainikien rikanaan eo eļap an aurōk n̄an ļoore.
Ilo Eprōļ 2017 kweilo̧k eo eļap, Būreejtōn Thomas S. Monson, rikanaan eo ilo iien eo wōt, ekar kajjitōk ippān ro uwaan Kabun̄ in n̄an ekkatak, ejjab baj riit wōt, Bok in Mormon aolep raan. Būreejtōn Russell M. Nelson im Būreejtōn Henry B. Eyring erro jim̧ōr ekar ļoor kapilōk eo an rikanaan eo im ekōnono kōn ta eo ekar waļo̧k.
Juon Rijilōk Epokake
Būreejtōn Nelson ekar ba: “Ikar kajjieon̄ ļoor kapilōk in an [Būreejtōn Monson]. Ibwilijn men ko jet, Iaar kōm̧m̧an laajrak ko kōn ta Bok in Mormon eo, ta eo ej kapene, ta eo ej kariabe, ta eo ej kakūrm̧oole, ta eo ej kalikkare, im ta eo ej kwaļo̧ke Kalimjek Bok in Mormon eo kōn māj in riit kein ekar juon kamminene eo em̧m̧an im eim̧we!”1
Būreejtōn Nelson ekar wōnm̧aanļo̧k im kōmeļeļeik bwe e ekar kajjitōk ippān ro jet ejja kajjitōk ko wōt im lo bwe elōn̄ iaan mour ko aer rekar im̧we jān aer ļoor kapilōk eo an Būreejtōn Monson. Irooj ej tōl kōj aolep kōn rikanaan ro ad, jeje ko rekwojarjar, im maden̄ļo̧k ko ad make.
Juon Rijilōk Etiljek
Būreejtōn Eyring ekar ba: “Iaar riiti Bok in Mormon eo aolep raan elōn̄ļo̧k jān 50 iiō ko. Kōnke em̧ōj aō kōm̧m̧ane menin imaron̄ kar ļōmņak bwe naan ko an Būreejtōn Monson rej n̄an bar jet. Aaet, āinwōt elōn̄ iaami, iaar en̄jake naan in rōjan̄ eo an rikanaan eo im an kallim̧ur n̄an kūr eō n̄an kōm̧m̧ane juon kijejeto eļapļo̧k.”
Būreejtōn Eyring ekar wōnm̧aanļo̧k wōt: “Ron̄jake kapilōk an Būreejtōn Monson ebar wōr ruo kijejeto ko raiboojoj ilo n̄a: Juon, Jetōb eo eaar kallim̧ur kake eaar kwaļo̧k kōļmenļo̧kjeņ in kōjatdikdik kōn ta ko repād im̧aan, men̄e lōkapokpok eo ilo laļ in ej āinwōt eļapļo̧k. Im, ruo, Irooj eaar letok n̄an eō—im kwe—juon en̄jake eļapļo̧k kōn iawke eo An n̄an ro me rej pād ilo en̄taan.”2
Aolep Armej!
Aolep armej remaron̄ im rej aikuj ļoor kapilōk ko an rikanaan eo ilo kweilo̧k eo eļap. Jekdoon ia eo kwoj ped ie ilo iaļ in jibadōk in am̧ ilo jetōb, aolep iien kwomaron̄ em̧m̧anļo̧k, men̄e kwoj juon Rijilōk, juon rioktak tok eo ekāāl, ak jabdewōt jikin ilo kōtaan kein. Ejjab kadiklōk aikuj eo ad n̄an revelesōn ko ad make; ej bar juon wāween me Anij emaron̄ kōjeram̧m̧ān kōj Em̧ool bar Rijilōk ro remaron̄ lo kakkobaba in kōjeram̧m̧an ko ilo jekjek in, aoleped jemaron̄ bar ilo m̧ool.