“Juon Iien n̄an Tuuj,” N̄an Kōkajoorļo̧k Jodikdik ro, Jept. 2022.
Juon Iien n̄an Tuuj
Jodikdik rein rekar lo lan̄lōn̄ ilo aer anjo̧ jān mijak ko aer im kwaļo̧k kapeel ko aer ippān ro jet.
Pija ko jān Cristy Powell
Jon̄oul-iiō-drettan Emo’onahe Y. im Jax C. ewōr ippāer juon men rej āinjuon kake: em̧ōj aerro jim̧ōr kōm̧m̧ani tuuj ko ilo juon FSY kweilo̧k in kaloojoj ilo Provo, Utah.
Tuuj make iaer ilo m̧aan mejen taujin jodikdik ro ekar jab juon men epidodo n̄an erro jim̧ōr. Bōtaab ilo aer kar kappukot n̄an kaddōkļo̧k im kwaļo̧k kapeel ko aer, rekar bōk revelesōn im maron̄ n̄an eddōkļo̧k ilo wāween ko me rekar jipan̄ er “erom̧ eļapļo̧k āinwōt Jisōs Kraist, im kōm̧m̧an bwe [er make], ro jet, im em̧ool bar laļin en em̧m̧anļo̧k” (Personal Development: Youth Guidebook [2019], 1).
Tuuj in Hoop ippān Emo’onahe
Emo’onahe (eh-moh-oh-nah) ekar kāālet n̄an kwaļo̧k kapeel eo an kōn tuuj in hoop, eo ej m̧ōttan m̧anit eo aer Riamedka ro m̧oktata. “Juon iaan ro mōtta ekar etal n̄an FSY m̧okta jān n̄a ekar jiron̄ eō bwe rekar kōm̧m̧ane talent show in im bwe ij aikuj ikkure ie,” liin ej ba
“Ikar ikūm̧kūm̧ jidik, kōn menin ikar kajjeon̄ jab mije jarlepju in armej ro.” Ak ekar jaadin pen n̄an jab kōm̧m̧ane! “Ikar ron̄ an aolep elam̧ōjm̧ōj,” liin ej ba. “Rekar kanoojin ļap ainikier ekar dik aō maron̄ ron̄jake al eo, kōn menin ikar baj wōt jab maron̄ ļoor kōjan̄jan̄ eo!”
Emo’onahe ekar buuļ kate bwe en em̧m̧anļo̧k ilo tuuj in hoop. Ekar ba, “Ekar lōn̄ apan̄ ko ilo ekkatak.” Ak ilo an ļap in an kōmālmel, ekar ļapļo̧k an ekkaktak kōn e make.
Kapeel ilo Kwalo̧k Bwebwenato
Tuuj in hoop ej juon jekjek in kwaļo̧k bwebwenato an juon make. “Kwoj ijjinoe kōn juon hoop ej bōk jikin ijjinoe eo am̧, innem kwoj wōnm̧aanļo̧k im kanne hoop ko n̄an kwaļo̧k elōn̄ļo̧k men ko kōn mour eo am̧. Ilo ikkure in aō, kwomaron̄ loe juon babbūb, juon eagle, im juon cowboy,” Emo’onahe ej ba. “N̄e ij ba bwebwenato in aō, ij en̄jake an āinwōt n̄e ij ba bwebwenato in ro ikar ekkatak jān er im en̄jake ko em̧ōj aō iooni.”
Emo’onahe jān Cheyenne im Arapahoe tribe ko ilo Oklahoma, im barāinwōt ilo Peck Sioux im Assiniboine. Liin ej ba, “Ikōn kar m̧okta en̄jake aō oktak jān aolep,” im jet iien “men eo ekar kōm̧m̧an aō jab ko̧ņ.” Ak tuuj in hoop ej nōbar oktak ko ad. Kajjojo rituuj rein rej kōm̧man make aer jekjek in tuuj ko “men eo ej kōm̧m̧an bwe en jenolo̧k im am̧ make,” liin ej ba.
Kapeel ko Remaron̄ Kōkajoor
Emo’onahe ej en̄jake an epaakeļo̧k Anij ilo an jar, riiti jeje ko rekwojarjar, im kate n̄an ļoor Jisōs Kraist. Ej barāinwōt en̄jake an epaakeļo̧k Anij ilo an kate kōkm̧anm̧anļo̧k kapeel ko an. “N̄e ij kotak hoop ko aō im tuuj, imaron̄ en̄jake lan̄lōn̄.” Ej rojan̄: “Kappukot men ko kwoj iakwi im kappukot armej ro rem̧m̧an ro renaaj jipan̄ eok bwe kwon maron̄ kōjerbal kapeel ko am̧ n̄an kōkajoor eok make im ro jet. Jerbal n̄an ro jet emaron̄ jipan̄ eok kōkajoorļo̧k naan in kam̧ool eo am̧ kōn Jisōs Kraist barāinwōt.”
Tuuj in Irish Ippān Jax
Jax ekar ļap an ikūm̧kūm̧ in kwaļo̧k kapeel eo an, tuuj in Irish, ilo FSY kweilo̧k in kaloojoj eo. “Ikar lukkuun, lukkuun mijak. Āinwōt n̄aij-ped-ilo-juon-ro̧n̄-in-m̧aj kamijak,” ej ba. “Ikar ba juon jar ekadu m̧okta jān aō etal n̄an ijo m̧aan. Ikar mijak wōt, ak al eo ekar jinoe jan̄. Ikar arin wōt n̄e ekar ejjeļo̧k armej ijo. Im ikar jinoe tuuj.”
Jax kar ekāke im kōm̧akūtkūt neen ilo jekjek in Irish kōm̧m̧ane. Ak loe mej eo ekam̧ōņōņō mejen Jax, elōn̄ iaan armej ro rekar jab maron̄ jeļā bwe ekar juon iaļ aitok n̄an tōpar ijo lōn̄.
Ejaake juon Kapeel n̄an Jipan̄ Kōkm̧anm̧anļo̧k Inepata
“Ilo 2020 eo ikar lukkuun inepata im em̧ool bar ļōmņak in kar bōk mour e aō make,” Jax ej ba. “Juon allōn̄ in aō kar ped ilo juon hospital in nan̄inmej ilo kōļmenļo̧kjeņ. Ikar ekkatak bwe ekar wōr ippa pediatric brain inflammation im ekkatak bwe ikar autistic. Ekar lukkuun, lukkuun pen.”
Ke ej m̧ōj an Jax bōk jet uno ko n̄an nan̄inmej ilo kōļmenļo̧kjeņ eo an, jinen ekar rojan̄ e n̄an kappukot juon waween ilo ānbwin n̄an jipan̄ e kōjebwebweik inepata eo an. E ekar kāālet n̄an kappukot revelesōn an make kōn ta eo aikuj kōm̧m̧ane.
“Ikar jar kake im kajjitōk jipan̄,” ej ba. “Im ikar keememej bwe kōrā eo nej jinō ekar katakin tuuj in Irish. Kōn mein ikar jinoe kūlaaj eo m̧okta jān iien kaloojoj eo amim ilo Kūrijim̧ōj. Ikar aikuj ekkatak ļalem tuuj ko ilo ruo wiik ko, men eo ekar kalimomo,” Jax ekar kōm̧m̧an kōjak. Ejjab to, tuuj in Irish ekar jinoe an juon kōjeram̧m̧an eļap ilo mour eo an. “Ekar kanoojin jipan̄ kōn jon̄an inepata ko an im en̄jake ko an remarok,” ej ba.
Kwaļok Kapeel eo An
Ilo FSY, ro m̧ōttan Jax rekar kajjitōk ippen eļan̄n̄e wōr juon an kapeel emaron̄ kwaļo̧k ilo jikin kaloojoj eo. Kōn mein ekar tuuj n̄an er ilo iaļ in etetal eo. Ke rekar jiron̄ e bwe ej aikuj ikkure, ļōmņak eo jinountata an Jax ekar, “O, ejjab.” Ak ekar kāālet n̄an kwaļok kapeel eo an men̄e ekar mijak.
Kiio ke em̧ōj an Jax loe pijaan alooj ko in an make tuuj ilo FSY eo, ejjab maron̄ dābiji an ettōn̄. “Ekar jab em̧akūtkūt meja ilo m̧ōttan eo jinountata,” he says. “Ak tokālik armej rekar jione kapokpok im m̧ōņōņō, im ikar jinoe ettōn̄dikdik.”
N̄an jodikdik ro rej apan̄, Jax ej lewaj naan in kapilōk in: “Em̧m̧anļo̧k n̄an ekōnono kake ippān juon armej jān nooje enoot aō kar kōm̧m̧ane. Irooj ejeļā wōn kwe, im E enaaj ped ijo n̄an kwe. Irooj ekōņaan jipan̄ eok.”
Ilōn̄in aolep men, Jax ej en̄jake bwe ekkatak tuuj in Irish ekar juon kōjeram̧m̧an jān Jemedwōj Ilan̄.
Kwoj Jenolo̧k
Koban jeļā ke—ilo am̧ oktakļo̧k n̄an Irooj, bōlen naaj im̧we eok n̄an ejake juon kapeel ekāāl.
Ejjeļo̧k oktak jān Emo’onahe im Jax, Jetōb Kwojarjar emaron̄ jipan̄ eok kile kapeel ko am̧. Ilo am̧ ejake kapeel kein im kwaļo̧ki, kwomaron̄ lo jipan̄ ilo am̧ kate eok n̄an erom̧ eļapļo̧k āinwōt Rilo̧mo̧o̧r eo.
Ta kapeel ko kwomaron̄ ejaaki im kwaļo̧ki?