“Jilu Katak ko Jān Iiō in Jodikdik ko an Josep Smith,” N̄an Kōkajoorļo̧k Jodikdik ro, Jept. 2023.
Jilu Katak ko Jān Iiō in Jodikdik ko an Josep Smith
Lale ta eo kwomaron̄ ekkatak jān en̄jake ko an Rikanaan eo 200 iiō ko remootļo̧k.
Em̧ōj ke am̧ kar en̄jake an pen n̄an keidi kōj n̄an armej ro etto? Rekar mour jem̧aan—remaron̄ ke kanoojin katakin eok jabdewōt men kōn mour eo am̧? Aaet! Josep Smith ej juon waanjon̄ak em̧m̧an. Ilo iien eo ekar 18 an iiō, ekar ekkatak jejjo men ko kōn bōk uwaak ko n̄an jar im kōn jemjerā eo an ippān Jemedwōj Ilan̄. Katak ko remaron̄ jipan̄ eok rainin.
Katak #1: Jet iien ebōk iien n̄an bōki uwaak ko.
Uwaak ko n̄an jar rejjab aolep iien pidodo aer itok. Kōttar ejjab pidodo—eļaptata n̄an uwaak ko rem̧ōkaj reped ilo intōrnet n̄an etin aolep kajjitōk.
Eļan̄n̄e kwoj en̄jake bwe eto kitien n̄an an Anij uwaake eok, kwojjab make iaam̧. Josep Smith ekar 12 iiō drettan ke ekar jinoun ļōmņak kōn “aolep kajjitōk ko reaurōk kōn kejparok im ājmour eo an jetōb eo [an] indeeo.”1 Ekar ire ippen kajjitōk ko kōn erreo eo an make im jerawiwi eo an laļin ilo iiō ko tok ruo. Ebōk ruo iiō ko in kejo̧kļo̧kijeņ, ekkatak jeje ko rekwojarjar, jerbale kajjitōk ko m̧okta jān an Anij im Jisōs Kraist kar waļokļo̧k n̄an e ilo Bukwin Wōjke ko Rekwojarjar.
Ejjeļo̧k oktak ipped. N̄e ewōr juon ad kajjitōk, emaron̄ bōk raan ko, allōn̄ ko, ak em̧ool bar iiō ko m̧okta jān ad bōk juon uwaak. Ak men eo em̧m̧an wōt. Jerbal eo jej likūti ilo ad kōttar ej menin aurōk. Keememej ta eo Elder Jeffrey R. Holland jān Doulul eo an Jon̄oulruo Rijilōk ro ekar katakin: “Juon ine en maron̄ bōk an mour im jej aikuj kōttar an rūttoļo̧k.”2
Katak #2: Anij ejeļā kajjeed kōn etad.
Mokta jān an kar 18 an iiō, kar loļo̧k Josep jān Anij eo Jemed, Jisōs Kraist, im enjeļ Moronai. Menin elukkuun jejjōt! Im rein rekwojarjar rejeļā kajjeen Josep. Rejeļā wōn e.
Anij ejeļā wōn kwe bar. Kwoj juon ajri Nejin im E ejeļā kajjiem̧. Anij ekar katakin m̧ool in kōn menin kōm̧anm̧an ko An: “Aolep men ko otemjeļo̧k ewōr bōnbōnier n̄an Eō, bwe rej Aō im I jeļā kajjier” (Moses 1:35).
Mōttan an kar wōr ippān Josep peran eo n̄an kōm̧m̧ane ta eo kar kajjitōk ippān n̄an kōm̧m̧ane ekar bwe ekar meļeļe bwe e ej juon nejin Anij, eo ejeļā kajjien.
Katak #3: Ilo ad ukweļo̧k, jej kōpeļļo̧k kōj make n̄an en̄jake ko an jetōb.
Juon iaan unin menin kōkkajooror ko an Josep n̄an etal n̄an bukwin wōjke ko rekwojarjar ekar n̄an ukweļo̧k jān jerawiwi ko an. Ejja jar eo wōt eo ekar jar kake bon̄in eo enjeļ Moronai ekar waļo̧kļo̧k n̄ane: “kōn jeorļo̧k bōd kōn aolep jero̧wiwi ko im likjab ko [aō]” (Josep Smith—Bwebwenato 1:29). Menin ej katakin kōj ruo men ko:
Moktata, eļan̄n̄e jekar kōm̧m̧ani bōd ko, jejjab aikuj ļōmņak bwe jejjab erreo n̄an jar. Josep ekar kōm̧m̧ani “jerawiwi ko im likjak ko,” ak jekdoon ekar jeļā bwe emaron̄ kar jar im bōk jeorļo̧k bōd.
Kein karuo, ilo ad ukweļo̧k, emaron̄ ļapļo̧k an kajoor ad en̄jake Jetōb eo. Āinwōt an Elder Jörg Klebingat jān Jiljilimjuonn̄oul ro kar kōmeļeļeik, “Mour in jetōb ej ļapļo̧k n̄e kwoj ukweļo̧k jen jerawiwi ko.”3
Būreejtōn Nelson ekar katakin bwe ukweļo̧k ejipan̄ kōj ero̧m̧ļo̧k āinwōt Rilo̧mo̧o̧r eo. Ilo ad ukweļo̧k, jej kōppeļo̧k kōjem ko an lan̄. “Jej kāālet n̄an eddōkļo̧k ilo jetōb im bōk lan̄lōn̄—lan̄lōn̄ eo jān pinmuur ilo E.”4
Kōn menin eļan̄n̄e kwoj aikuj ukweļo̧k jān juon men, kōm̧m̧ane! Ejjab naaj boktok wōt n̄an eok aenōm̧m̧an im enaaj jipan̄ eok erom̧ eļapļo̧k āinwōt Rilo̧mo̧o̧r eo, ak enaaj barāinwōt jipan̄ eok am̧ kajoorļo̧k am̧ en̄jake Jetōb im bōk uwaak ko n̄an jar ko.
Josep Smith emaron̄ kar mour jem̧aan, ak katak ko ekar ekkatak kaki āinwōt juon jodikdik emaron̄ jipan̄ eok rainin. Ej bar juon un n̄an kam̧m̧oolol kōn Rikanaan Josep Smith.