“4 Wāween ko n̄an Kōkajoorļo̧k Baam̧le eo Am̧,” N̄an Kōkajoorļo̧k Jodikdik ro Okt. 2023.
4 Wāween ko n̄an Kōkajoorļo̧k Baam̧le eo Am̧
Kwomaron̄ kōkajoorļo̧k baam̧le eo am̧ n̄an erom em̧m̧an tata kōn mour kōn gospel eo an Jisōs Kraist.
Jekdo̧o̧n ta ewi kajoor in baam̧le eo am̧, emaron̄ in aolep iien kōjerbal jidik kōkajoorļo̧k. Raan kein, ej āinwōt men ko rej waļo̧k rej kajjieon̄ kōm̧ōjņo̧ikļo̧k baam̧le eo. En̄in ej kōnke Setan ejeļā bwe baam̧le ko rej aorōk n̄an karōk eo an Jemedwōj Ilan̄. Eļan̄n̄e ewōr jabdewōt men rikapo eo emaron̄ kōm̧m̧ane n̄an kakkure mour an baam̧ļe, em̧ool enaaj kajjieon̄.
Men̄e ejjeļo̧k baam̧le eweeppān, baam̧le eo am̧ ewōr juon men ej waļok n̄an e me ejjeļo̧k bar juon baam̧le ewōr an: kwe! Im ewōr ippam̧ gospel eo an Jisōs ilo ijo jikim. Rikanaan ro im rijilōk ro kar katakin: “M̧ōņōņō ilo mour in baam̧le ej maron̄ tōprak eļan̄n̄e ej pedped wōt ioon katakin an Irooj Jisōs Kraist.”1
Erkein ej jet wāween ko gospel eo an Irooj emaron̄ kōkajoorļo̧k im bōktok m̧ōņōņō eo n̄an baam̧le eo am̧.
-
Baam̧le ko remaron̄ liāp n̄an aolepen indeeo.
-
Baam̧le ko remaron̄ lem̧ōņōņō ilo joļo̧k iien ippān doon, leļo̧k jerbal in jipan̄ n̄an doon, im en̄jake uwaan im juon mejatoto in paotok kwojarjar.
-
Baam̧le ko remaron̄ pedped ioon kajoor eo an Jisōs Kraist n̄an ņa mejļan jab meļeļe ko, akweel ko, im apan̄ ko kōn ukweļo̧k, jeorļo̧k bōd, im tōmak.
Erkein rej emen wāween ko kwoj maron̄ kōkajoorļo̧k baam̧le eo am̧ kōn mour kōn gospel eo:
Kōmeļeļe ko jān Lai T. Sheng
1 Kōketak Jar
Baam̧le ko rej erom kajoorļo̧k n̄e rej jar ippān doon. Jar emaron̄ kōjeraam̧m̧an baam̧le eo am̧ kōn aenōm̧m̧an, iakwe, im bōro kuk. Eļan̄n̄e jar ejjab juon iminene ilo baam̧le eo am̧, jar n̄an jeļā ekōjkan am̧ maron̄ jipan̄ baam̧le eo am̧ jar ippān doon. Pojak n̄an jerbale uwaak ko kwoj būki.
2 Etal n̄an Jar Ippān Doon
Ilo jar jemaron̄ ekkatak kōn gospel eo an Jisōs Kraist. Jej barāinwōt bōk kwojkwoj eo im bujen ippān Anij bwe jej m̧ōņōņō in bōk iood make etan Jisōs Kraist im keememej E iien otemjej (lale Mosaia 18:8–10; Katak im Bujen Ko 20:77, 79).
Etal n̄an jar āinwōt juon baam̧le ejipan̄ kepaakeļo̧k aolep n̄an Anij im n̄an doon. Ebōk kallim̧ur n̄an etal kajjojo wiik, bōtaab Anij enaaj kōjeraam̧m̧an kijejeto ko am̧. Eļan̄n̄e baam̧le eo am̧ ej kāālet n̄an jab etal n̄an jar ippam̧, jouj im jeļā bwe am̧ pād enaaj kōkajoorļo̧k eok im jipan̄ eok lo wāween ko jet kwoj kōkajoorļo̧k baam̧le eo am̧.
3 Iakwe im Jerbal
Rilo̧mo̧o̧r eo ekar katakin, “Kom̧win yokwe doon, āinwōt Iar yokwe kom̧” (Jon 15:12). Jiron̄ baam̧le eo am̧ ewi jon̄an am̧ iakwe er—jekdo̧o̧n eļan̄n̄e kwojeļā ke rejela kadede. Kwaļo̧k am̧ iakwe n̄an baam̧le eo am̧ kōn naan im jerbal ej karuwaineneiktok Jetōb eo n̄an lowaan m̧weo im̧ōm.
Jerbal n̄an ro uwaan baam̧le eo am̧ ej juon wāween aorōk n̄an kwaļo̧k am̧ iakwe. Im jerbal n̄an ro jet ippān doon ej barāinwōt kepaakļo̧k baam̧le eo am̧ n̄an doon im n̄an Jemedwōj Ilan̄. Kwojjab aikuj ejake juon būroojāāk in jerbal in jipan̄ eļap. Jerbal in jipan̄ emaron̄ ļam waan, āinwōt kōpooj juon iien m̧ōn̄ā enno tata n̄an eo rūturum̧. Jerbal āinwōt juon baam̧ļe ej bōktok lan̄lōn̄ kōnke, ilo ad riiti ilo jeje ko rekwojarjar “Eļan̄n̄e kom̧ij jerbal n̄an armej ro ami kom̧ij jerbal wōt n̄an Anij” (Mosaia 2:17).
4 Mour kōn Gospel eo
Elōn̄ baam̧le ko ewōr uwaer me rejjab membōr in Kabun̄ in ak ro raar kāālet n̄an bōjrak in etal n̄an jar. An ejjeļo̧k rie jān baam̧le eo, emaron̄ in pen n̄an bōk kuņaan ilo jar: Eļan̄n̄e baam̧le eo am̧ ej pād ilo jekjek rōt in, keememej bwe kwomaron̄ in wōt erom juon kajoor n̄an em̧m̧an kōn mour kōn gospel eo.
Kōm̧m̧an bwe baam̧le eo am̧ en lo am̧ mour kōn ta eo kwoj tōmak. Kwojjamin jeļā n̄e rej lale ta eo kwoj ba im kōm̧m̧ane. Menin enaaj bōktok meram eo an gospel eo n̄an baam̧le eo am̧. Jekdo̧o̧n ta jekjek eo an baam̧le eo am̧, kijejeto ko am̧ rejjab oktak n̄an mour kōn gospel eo emaron̄ kōpeļļo̧k kōjām eo n̄an an Jetōb eo tōl, kareel, im ļōn̄aj baam̧le eo am̧ im jipan̄ er epaakeļo̧k Rilo̧mo̧o̧r, Jisōs Kraist.