“Ekōjkan Am̧ Naaj Kōpopo n̄an Kweilo̧k eo Eļap,” N̄an Kōkajoorļo̧k Jodikdik ro, Jept. 2023.
Kōpopo n̄an Kweilo̧k eo Eļap
Ekōjkan Am̧ Naaj Kōpopo n̄an̄ Kweilo̧k eo Eļap
Jodikdik rein rekar bōk eļap jān kweilo̧k eo eļap. Ekōjkan am̧ maron̄ kōpopo n̄an bōk juon en̄jake eļap meļeļein?
Ikōņaan Ļoor Rikanaan eo
Ikar kōpooj eō make n̄an Oktoba 2022 kweilo̧k eo eļap jān riit kōn Pinmuur eo an Jisōs Kraist ilo Bok in Mormon eo im ilo Kallim̧ūr Mokta.
Ilo kweilo̧k eo, Būreejtōn Russell M. Nelson ekar ekōnono n̄an kōj im kam̧ool kōn aurōkin tampeļ.1 Ilo tampeļ eo, kōjeram̧m̧an ko an indeeo rej kallim̧ūr kaki, im juon jetōb aiboojoj kwoj en̄jake n̄e kwoj etal n̄āne.
Ejjan̄in de lōn̄ tampeļ ilo Nicaragua, ak emōj kōjjeļā kake juon. Ij kōjatdikdik imaron̄ ron̄jake naan ko an Būreejtōn Nelson im etal n̄an tampeļ eo n̄e ededeļo̧k.
Ilo aō alooje kweilo̧k eo, ikar en̄jake an Jetōb kam̧ool bwe ikar pād ilo jikin eo ejim̧we. Ikar en̄jake an būruō obrak kōn iakwe an Anij.
Carlos M., Nicaragua
Kōmour ej Ped n̄an Aolep
Mokta jān kweilo̧k eo eļap ilo Oktoba 2022 ikar ļōmņak likļo̧k kōn men ko rekar waļo̧k ilo mour e aō ilo juon tōre ej kab jem̧ļo̧kļo̧k. Elōn̄ men ko rekar kainepata ilo ļōmņak e aō m̧okta jān kweilo̧k eo, im ikar kōņaan en̄jake kainōm̧m̧an, ainōm̧m̧an, im kajoor.
Ilo iien kweilo̧k eo, Elder Quentin L. Cook jān Doulul eo an Jon̄oulruo Rijilōk ro ekar ba, “Kōnke kōn Pinmuur eo an Rilo̧mo̧o̧r, kemour ej pād n̄an aolep.”2
Naan ko rekar letok n̄an eō aenōm̧m̧an im kōjatdikdik. Kōn Pinmuur eo an Jisōs Kraist, n̄e inaaj kōm̧m̧ani bōd ko im kāālet ko rebōd, imaron̄ bōk jeorļo̧k bōd im en̄jake ainōm̧m̧an. Im jabdewōt kain metak imaron̄ naaj en̄jake, imaron̄ mour jene. Aoleped emaron̄ en̄jake ejja ainōm̧m̧an in wōt im kōmour ilo ad ukweļo̧k jān jerawiwi ko ad im kajjeon̄ erom̧ em̧m̧anļo̧k kajjojo raan.
Kaye D., Philippines
Kōpopo n̄an Kweilo̧k eo Eļap an Jodikdik ro
Joļo̧k juon minit n̄ān kōpopo n̄an kweilo̧k eo, im kwonaaj bōk juon en̄jake eļapļo̧k an em̧m̧an. Kōn menin, kwomaron̄ ke kōpopo? Jinoe jān am̧ jeiki kajjitōk ko am̧! Kejokļo̧ijeņ kake kajjitōk ko am̧ ilo am̧ alooje, im kwonaaj bwilōn̄ kōn emakijkij in an rikōnono ro kōnono kajju n̄an eok.