“Kōtļo̧k, im Ron̄jake,” N̄an Kōkajoorļo̧k Jodikdik ro, Jept. 2023.
Kōtļok, im Ron̄jake
Ekar wōr juon aō karōk n̄an katōprak ettōņak ko aō. Bōtaab ke ikar kōtļo̧k im kōtļo̧k an Irooj tōl iaļ eo aō, ikar jeram̧m̧an ilo jekjek ko reaiboojoj.
Kōmeļeļeik jān Michael Mullan
Ke ej kab kar 17 aō iiō, ikar em̧makūtļo̧k n̄an San Francisco, California, USA, n̄an etal n̄an juon jikuuļ in art. Ikar ettōņak n̄an erom̧ juon rijin̄n̄a ak rikōm̧m̧ani pija ko n̄an Disney.
Ilo college, ikar ekkatak eļapļo̧k jān art. Ikar ekkatak kōn wōn n̄a n̄an Jemedwōj Ilan̄. Ejako aō ped m̧weo kiio. Ro jinō im jema rekar jab kiiō karūji n̄a n̄an bokļo̧k eō n̄an m̧ōņ jar eo aolep Jabōt. Ejjeļok emaron̄ kar jeļā eļan̄n̄e ak jaab ij mour kōn gospel eo. Bōtaab ikar jeļā bwe ikar aikuji E. Ikar kappukot Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo juon bok in taļeboon. Ke ikar deļo̧n̄eļo̧k Mōn Jar eo im ron̄ “Ijeļā Bwe Aō Ripinmuur ej Mour” (Al in Jar, nō. 36) ej jan̄, kar en̄jake āinwōt m̧weo im̧ōm. Ikar jino kile ta meļeļein gospel eo n̄an eō im ta eo ikar lukkuun kōņaan.
Kōm̧m̧an bwe Irooj en Nōm̧ba Juon ilo Mour eo Am̧
Ilo iien eo, ikar kōņaan kakobaik Jemedwōj Ilan̄ ilo aolepmen ij kōm̧m̧ane. N̄an waanjon̄o̧k, ikar jinoe kajjitōk Ippān ta An ļōmņak kōn karōk in kōttōpar ko aō ikijeen jerbal im ia eo ij aikuj ped ie. Ilo aō kar jar im kajjitōk kajjitōk kein, ikar jinoe en̄jake bwe ikar aikujin ped bar juon jikin.
Ekar rūb būruo jidik. Ikar karōke aolepen ettōņak ko aō im mije kōttōpar eo aō. Ak ikar jeļā jejjōt in ia eo ij aikuj kar tal n̄ane im ta eo ij aikuj kar kōm̧m̧ane. Bōtaab kiiō, ikar jeļā bwe ikar kōņaan bwe Irooj en nōm̧ba juon ilo mour e ao, im men eo ekar ļap an aurōk n̄an eō jān jabdewōt men. Em̧ool men̄e ikar jeļā bwe iaļ eo aō emaron̄ nej kar oktak jāņ eo ikar pijaikiļo̧k, ikar en̄jake iakwe eo An n̄an eō, im ikar lōke ilo jeļāļo̧kijeņ eo An.
Kar tōl eō n̄an Brigham Young University–Idaho im Brigham Young University ilo Provo, Utah, n̄an kadedeļo̧k degree ko aō ilo illustration. Kar m̧okta jān aō kadiwōjļo̧k, ikar bōk juon intership ilo juon game studio ilo jikin eo. Enan̄in kar juon iiō tokālik, ālikin aō kar bōk jerbal in full-time, studio eo ilo jab kōtmene kar wiaki jān Disney, eo ekar boktok iien ko rem̧m̧an im eddōkļo̧k.
N̄e kwoj kōtļo̧k ta eo kwoj ļōmņak kwoj ļōmņak iakuj wōr ippom̧, Irooj enaaj kōjeram̧m̧an eok ilo iien eo ejim̧we im jejjōt kōn ta eo enaaj m̧oolin kam̧ōņōņōiki eok. Kwojaje ia eo Irooj ej bōk eok n̄ane. Kōtļo̧k, im ron̄jake.
Likūt Mokta Men ko Mokta
Ilo iien jikuuļ, ikar lejon̄jon̄ kōn kilaaj ko im homework ko im eddo ko an Mōn jar. Ikar aikuj pukot ta ko reaurōktata ippa. Ij ke loļo̧k armej ro n̄an jerbal in karejar n̄an er, ak ij ekkatak n̄an test in? Ij ke riiti jeje ko rekwojarjar aō kiiō, ak ij kadedeļo̧k katak in?
Aolep iien ij likūt Irooj m̧oktata im kōm̧m̧ane ta eo E ekar kūr eō n̄an kōm̧m̧ane, aolep iien ej tōprak men ko innem ko jet. E ej kejparok kallim̧ūr ko An. N̄e kwoj likūt Irooj m̧oktata, aolep men rej wōtlo̧k n̄an ijoko jikier rejim̧we.
Ke ikar etal in tōn kadiwōjļo̧k jān jikuuļ, ikar jelm̧aik kālet ko rejjab oktak. Kar n̄a būreejtōn an Doulul eo an Jiron̄ ro ilo ward ilo iien eo. Juon raan ikar aikuj kōm̧m̧an kāālet n̄an kāālet ekkatak n̄an juon exam im jipan̄ jiron̄ ro karōke juon m̧akūtkūt. Ikar etal ippān jiron̄ ro. Kōn jidik iien eppeļo̧k n̄an eō, ikar jar im kate eō ekkatak jon̄an eo imaron̄e. Kōn jet wāween ikar pāje exam eo, im kōn grade ko rem̧m̧anļo̧k jān aō kar kōtmene.
Kōtlo̧k An Tōl Eok
Jemedwōj Ilan̄ enaaj lukkuun tōl eok. E ej iakwe eok im ejeļā likkuun ia eo kwoj ped ie. Ejeļā likkuun ta eo enaaj ļap an kōjeram̧m̧an mour eo am̧ im n̄eet
Ilo mour eo aō, men ko rekar oktak im em̧m̧akūt jidik. Ak E ekar ped ie aolepen iien eo. Ilo aō kar ļoor tōl eo An n̄an eō, men ko rekar oktak ilo aiboojoj. Ejjab ilo wāween aō kar kōtmene, bōtaab aiboojoj.
E ekōņaan bwe En m̧ōttan mour ko ad. Eļan̄n̄e jemaron̄ kadeļo̧n̄ E ilo mour ko ad, ewōr menin kailibōkbōk ko reļlap rej kōttar kajjojo iaad. Bar ta eo E em̧ōj an kepooj n̄an eok me kwojjab maron̄ loe?