“Pele a le Atua,” Mo le Malosi o le Autalavou, Set. 2023.
Sau, Mulimuli Mai ia te A’u
Pele a le Atua
I le fuafuaga o le fiafia a le Atua, ua i ai i tamaitai talavou ma alii talavou uma se faamoemoega paia, e pele ma manaomia outou taitoatasi.
Vaai faalemafaufau pe faapeī musika pe afai e tutusa uma leo o mea faimusika. Ae faapefea pe afai o ki uma i luga o se piano e taina le nota lava lea e tasi pe tutusa foi leo uma i se aufaipese? O lenei mea o le a matuā le matagofie ai lava musika!
O le mea e fiafia ai, o mea faimusika ma leo o aufaipese e eseese i leo ma le faaleoga. O ki i se piano e ofoina atu le tele o fati, ma o aufaipese e maua ai ni tuufaatasiga o leo maoae. O foafoa faaFarani, pumalū, vaiolini, ma tagipalau taitasi e faaopoopo ai se leo tulaga ese i le ogatusa o se faili.
Malosiaga ma Meaalofa
E pei o musika, e olioli le Tama Faalelagi i taleni eseese, uiga, ma aafiaga o Ana fanau taitoatasi, o se afafine po o se atalii faapelepele. Po o a lava ou tulaga, po o fea lava e te nofo ai i atunuu, ituaiga, ma nuu, e olioli le Tama Faalelagi i lou gafatia e lē iu, po o ai e mafai ona avea ai oe e ala i le usiusitai, alofa tunoa, ma le alofa.
Faatasi ai ma le alofa tele, ua Ia valaaulia ai oe ia iloa lou faasinomaga paia ma faataunuu lou faamoemoega paia. Na te faamalosiauina oe e atiae au meaalofa faaleagaga, uiga faaleatua, ma avanoa maoae. Ma ua Ia ofoina atu ia te oe avanoa i aso taitasi e aoao ai e vaai ma auauna atu ia i latou o siomia oe e pei ona faia e Iesu Keriso.
I le fuafuaga paia a le Atua, tatou te o mai ai i lenei lalolagi e ala i se tinā ma se tamā. E manaomia e aiga mea uma e lua. Faatasi, i le avea ai ma paaga tutusa, e faafailele ma tausia e matua o latou aiga. I o tatou aiga, e tatau i tamā ma tane ona pulefaamalumalu ma le agamaualalo, agamalu, ma le alofa faamaoni—o uiga auaumama amiotonu e manaomia e alii ma tamaitai i a tatou sootaga uma. E tagi le lagi pe a, i soo se sootaga, i ai sauaga, pule malosi, po o le faamalosia o soo se ituaiga, e alii po o tamaitai. O le faatauanau, tali-tiga, agalelei, ma le malamalama mama o uiga faaKeriso ia tatou te sailia taitoatasi.
Ioe, e leai se tasi—e leai foi se aiga e atoatoa. Po o le a lava lou tulaga, ia ava i ou matua ma alofa i lou aiga—le aiga o loo ia te oe ma le aiga o le a e maua i se aso. E mafai ona fesoasoani lo tatou Faaola ia te oe ia malamalama, faamagalo, ma faamalosiau atu ia i latou o siomia oe. A o e faia le mea sili, o le a fesoasoani ma taialaina oe e le Alii. Faamolemole ia manatua o lou tulaga i luma o le Alii ma Lana Ekalesia e filimaotiina i ou uiga patino ma le amiotonu i le tausia o au feagaiga ma le Atua.
Perisitua ma le Fuafuaga a le Atua
E sili atu le alofa o le Atua ia i tatou ma e sili atu Lona silafiaina o i tatou nai lo lo tatou alolofa po o le iloaina o i tatou lava. Ua tuuina mai Lana pule o le perisitua e faamanuia ai Ana fanau uma. O uso agavaa e umia le perisitua, ae e le o i latou o le perisitua. Ua aoao mai Peresitene Russell M. Nelson o le perisitua “e tutusa lava le talafeagai ma [tamaitai] e pei foi o soo se alii.” O le perisitua e tuuina atu ai i tamaitai ma alii “le mafai ona maua … o oa faaleagaga uma ua i ai i le Alii mo Ana fanau.”1
Auauna Atu Faatasi
I le Ekalesia a le Alii, tatou te fefautuaai ai i aufono a o tatou auauna atu faatasi. I a tatou aufono, e sailia e taitai malamalamaaga ma manatu mai tagata uma, e aofia ai tamaitai talavou ma alii talavou. I tulaga taitasi, tatou te ausia ni faaiuga sili atu ma maua le manuia sili atu i le galuega a le Alii a o tatou faatauaina saofaga a le tasi ma le isi ma galulue faatasi, o uso ma tuafafine i Lana galuega.
I a tatou uarota ma paranesi, e taitai e tamaitai talavou ma alii talavou ia vasega ma korama. I le aufono a le autalavou a le uarota, e fesoasoani faatasi o tatou taitai talavou i talavou taitasi e fesootai ma le lagi, o tatou taitai o le Ekalesia, ma isi talavou. I le avea ai ma ni soa o auaunaga i tagata matutua, e aapa atu o tatou alii talavou ma tamaitai talavou ma faamanuia le toatele. I la tatou auaunaga, tatou te tutu faatasi uma.
O se faamanuiaga le auauna atu o alii talavou ma tamaitai talavou o ni molimau o sauniga o le talalelei toefuataiina. O outou o molimau mo papatisoga, mo papatisoga o e o soifua ma mo papatisoga mo tuaa i le malumalu. E te auauna atu foi i isi nofoaga i le maota o le Alii.
Faamanuiaga o Feagaiga ma le Atua
E taitoatasi, e osia e tamaitai talavou ma alii talavou ni feagaiga paia ma le Atua. Pe a faamamaluina ma le faamaoni, o a tatou feagaiga ma le Atua e aumaia ai Ana faamanuiaga—e sili atu nai lo mea e mafai ona tatou mafaufauina. O a tatou feagaiga ma le Atua e mafai ona faapaiaina ai o tatou manaoga ma faatinoga. O a tatou feagaiga ma le Togiola a Keriso e mafai ona fesoasoani ia i tatou e avea ai o se atalii/afafine o le Atua—lotomaualalo, onosai, tumu i le alofa (tagai Mosaea 3:19). I mea uma tatou te faia, tatou te amata ia Iesu Keriso. Tatou te filifili muamua o Ia ia tatou filifiliga e tele, ma tatou faamuamua o Ia i filifiliga taitasi tatou te faia.
Vaai atu i le Faaola
E mafai ona e maua lagona fiafia ma mafanafana i lou loto a o e tuu Iesu Keriso i le totonugalemu o lou aoaoina o le talalelei, auaunaga, gaoioiga, ma atinaega faaletagata lava ia ma a o e filifilia le lelei. O au taumafaiga e faatotonugalemu ia Keriso e mafai ona malie ma tauia a o e fesoasoani atu i isi i le agaalofa faamaoni ma le alofa.
E tutupu mea ofoofogia pe a alolofa alii talavou ma tamaitai talavou i le Alii ma auauna faatasi i le lotogatasi ma le sologa lelei. E moni lenei mea i le seminare, gaoioiga masani a le autalavou, ma le FSY.
Faatasi ai ma le alofa e le iu, ua valaaulia ai e lo tatou Tama Faalelagi tamaitai talavou ma alii talavou uma “ia o mai ia te ia ma taumamafa i lona agalelei; ma e le teena e ia se tasi e sau ia te ia” (2 Nifae 26:33).
E alolofa le Tama Faalelagi ma Iesu Keriso ia te oe. O le a Laua fesoasoani ma faamanuia oe ina ia fiafia moni. Faamolemole filifili muamua lo tatou Faaola o Iesu Keriso. Faalagolago i le Atua ma ia tasi ia Iesu Keriso ma i latou o siomia oe. I le avea ai ma se atalii/afafine faapelepele o le Atua, e mafai ona e fesootai ma auai i le nuu o le Au Paia o Lana Ekalesia toefuataiina lena—O Le Ekalesia a Iesu Keriso o le Au Paia o Aso e Gata Ai. O ai oe ma le tagata ua avea ai oe o loo manaomia i le lalolagi i aso nei. Oka se eseesega e mafai ona e faia i lou aiga, i Lana Ekalesia toefuataiina, ma i le lalolagi.
Ia Iesu Keriso, e mafai ai mea lelei uma. Ia Iesu Keriso, o le a oo mai ai mea moni uma, i le taimi ma le ala a le Atua. I le avea ai ma se tasi o Ana molimau faapitoa, ou te molimau atu ai ma folafola atu.