“Tuuese, ma Faalogo,” Mo Le Malosi o le Autalavou, Sete. 2023.
Tuuese, ma Faalogo
Sa i ai sa’u fuafuaga e ausia a’u miti. Ae ina ua tuuese ma ou faatagaina le Alii e taitaia lo’u ala, sa faamanuiaina a’u i ni auala matagofie.
Ata na tusia e Michael Mullan
Ina ua faatoa 17 ou tausaga, sa ou siitia atu i San Francisco, Kalefonia, ISA, e alu i le aoga tusiata. Sa ou moemiti i le avea ai ma se tagata tusi ata mo le Disney.
I le kolisi, sa sili atu mea na ou aoaoina nai lo ata. Sa ou aoao po o ai a’u i lo’u Tama Faalelagi. Sa ou le toe i ai i le fale. Sa lei fafaguina a’u e o’u matua e ave a’u i le lotu i Aso Sa uma. E leai se tasi o le a iloa pe sa ou ola i le talalelei pe leai. Ae sa ou iloaina sa ou manaomia o Ia. Sa ou suea le Ekalesia a Iesu Keriso o le Au Paia o Aso e Gata Ai i totonu o le tusi telefoni. Ina ua ou savali atu i totonu o le falelotu o le Ekalesia ma faalogo i le “Ua Ou Iloa Lo’u Faaola” (Viiga, nu. 73) sa taina, sa [ou] lagonaina sa pei lava o le aiga. Sa amata ona ou iloa le uiga o le talalelei ia te a’u ma le mea sa ou manao moni lava i ai.
Fai Ia Numera Tasi le Alii i Lou Olaga
I lena taimi, sa ou manao e faaaofia lo’u Tama Faalelagi i mea uma sa ou faia. Mo se faataitaiga, sa amata ona ou fesili atu ia te Ia po o le a Sona manatu e uiga i a’u fuafuaga faalegaluega ma le mea e tatau ona ou i ai. A o ou tatalo ma fai atu nei fesili, sa amata ona ou lagonaina e tatau ona ou i ai i se isi mea.
Sa fai si o’u loto nutimomoia. Sa ou faia uma a’u miti ma la’u taulaiga i la’u fuafuaga. Sa ou faapea na ou iloa tonu lava le mea o le a ou alu i ai ma le mea o le a ou faia. Ae o lenei, sa ou iloa sa ou manao ia numera tasi le Alii i lo’u olaga, ma e sili atu lena mea ia te a’u nai lo se isi lava mea. E ui lava sa ou iloa atonu e ese lo’u ala mai le mea sa ou mafaufau i ai, sa ou lagonaina Lona alofa mo a’u, ma sa ou faalagolago i Lona atamai.
Sa taitaiina atu a’u i le Iunivesite o Polika Iaga i Idaho ma Polika Iaga i Provo, Iuta, e faamaea ai o’u faailoga tusi ata. A o lei faauu, sa ou mauaina se galuega faataitai i se fale taalo i le lotoifale. Pe tusa ma se tausaga mulimuli ane, ina ua uma ona faafaigaluegaina a’u i le taimi atoa, sa faafuasei ona faatau e le Disney le faletaalo, lea na aumaia ai ni avanoa fou ma le tuputupu ae.
Pe a e tuuese mea e te manatu e tatau ona e maua, o le a faamanuia oe e le Alii i le taimi sa’o i mea o le a faafiafiaina moni ai oe. E te le iloa lava po o fea o le a ave i ai oe e le Alii. Tau lava o le tuuese, ma faalogo.
Faamuamua Mea e Tatau Ona Faamuamua.
I le taimi o le aoga, sa faigata ona faavasega lo’u taimi mo vasega ma meaaoga ma tiutetauave o le Ekalesia. Sa tatau ona ou fuafuaina po o a a’u mea e faamuamua. Pe ou te alu e asiasi i tagata e auauna atu ia i latou, pe ou te suesue mo lenei suega? Pe ou te faitauina ea a’u tusitusiga paia i le taimi nei, pe ou te faamaeaina la’u meaaoga?
O taimi uma lava ou te faamuamua ai le Alii ma faia le galuega na Ia valaauina a’u e fai, e lelei lava mea uma, ona sosoo ai lea ma nisi mea. Na te tausia lava e le aunoa Ana folafolaga. A tatou faamuamua le Alii, o le a fetaui lelei mea uma.
Ina ua ou alu i le aoga faauu, sa ou feagai ma ni filifiliga faapena. Sa avea a’u ma peresitene o Tamaitai Talavou a le uarota i lena taimi. I se tasi aso sa tatau ai ona ou filifili i le va o le suesue mo se suega ma fesoasoani i tamaitai talavou e fuafua se gaoioiga. Sa matou o ma tamaitai talavou. Faatasi ai ma le taimi avanoa na ou maua, sa ou tatalo ai ma sa ou suesue i le mea sili ou te mafaia. I se isi auala, sa ou pasia le suega, ma faatasi ai ma ni togi sili atu nai lo le mea sa ou faamoemoeina.
Tuu Atu ia te Ia e Taitai Oe
O le a taitai e le Tama Faalelagi oe. E alofa o Ia ia te oe ma silafia tonu le mea o loo e i ai. Na te silafia lelei le mea o le a sili ona faamanuiaina ai oe ma le taimi.
I lo’u olaga, ua suia ma ua fai si fesuisuiai o mea. Ae sa i ai o Ia i le taimi atoa. A o ou mulimuli i Lana taitaiga mo a’u, sa matagofie le taunuuga o mea. E le o le auala na ou faamoemoeina, ae matagofie.
E manao o Ia e avea ma se vaega o o tatou olaga. Afai e mafai ona tatou faatagaina o Ia i o tatou olaga, o loo i ai ni mea ofoofogia e faateia ai o loo faatalitali mai mo i tatou taitoatasi. O le a se isi mea o loo Ia teuina mo oe e le mafai ona e vaai i ai?