O Se Taimi e Siva Ai

Saunia e Stephanie E. Jensen ma Jessica Zoey Strong

Mekasini a le Ekalesia

Sa maua e nei talavou le olioli e ala i le faatoilaloina o le fefe ma le faasoaina atu o a latou taleni i isi.

Ata na pueina e Cristy Powell

E sefulufa tausaga o Emo’onahe Y. ma Jax C. e le itiiti ifo ma le tasi se mea e tutusa ai: sa la faatinoina uma ni faiga masani o siva i se faaaliga eseese o le konafesi a le FSY i Provo, Iuta.

O le siva na o oe i luma o le faitau afe o talavou sa lei faigofie mo se tasi o i laua. Ae a o la saili e atiina ae ma faasoa atu a la taleni, ua la maua faaaliga ma mafai ona tuputupu ae i auala na fesoasoani ia i lauae “avea atili e faapei o Iesu Keriso, ma faia [i latou lava], isi tagata, ma e oo lava i le lalolagi ia sili atu ona lelei” (Atinaega Faaletagata Lava Ia: Tusitaiala mo le Autalavou [2019], 1).

Siva i Mamaofe faatasi ma Emo’onahe

Sa tonu ia Emo’onahe (eh-moh-oh-oh-no) e faasoa atu lana taleni o le siva i mamaofe, o se vaega o lana aganuu moni a Initia Amerika. “O se tasi o a’u uo na alu muamua i le FSY ia te a’u sa fai mai e i ai se faaaliga taleni ma e tatau ona ou faafiafia ai,” o lana tala lea.

“Sa fai si o’u popole laitiiti, o lea sa ou taumafai ai e aua le taulai atu i le motu o tagata.” Ae sa tau faigata! “Sa mafai ona ou faalogoina le pei e leaga uma ulu o tagata,” o lana tala lea. “Sa matuai leotetele lava i latou sa tau le mafai ai ona ou faalogo i le musika, o lea sa tau le mafai ai ona ou siva e tusa ma le pao!

Sa galue malosi Emo’onahe ina ia lelei i le siva i mamaofe. Fai mai o ia, “Sa mautinoa lava le i ai o se auala e aoao ai.” Ae o le tele o lona faataitai, o le tele foi lena o lona aoao e uiga ia te ia lava.

Taleni Faamatalatala

O le siva i mamaofe o se ituaiga o faamatala tala patino. “E te amata i se mamaofe se tasi e faatusa i lou amataga, ona faaauau lea ona e faaopoopoina ni mamaofe e faaali atu ai nisi mea e uiga i lou olaga. I la’u faafiafiaga, e mafai ona e vaai i se lelefua, se aeto, ma se kaupoe,” o le tala lea a Emo’onahe. “Pe a ou faamatalaina lau tala, ou te lagona e pei o loo ou faamatalaina le tala ia i latou na ou aoao mai ai ma aafiaga na ou maua.”

O Emo’onahe e sau mai ituaiga o Cheyenne ma Arapahoe o Oklahoma, ma o Fort Peck Sioux ma Assiniboine foi. Fai mai a ia, “Sa masani ona ou lagona le ese mai isi tagata uma,” ma o nisi taimi “sa ou le maua ai se lagona lelei i lena mea.” Ae o le siva i mamaofe e opogi ai le taitoatasi. E fatuina e tagata siva taitasi a latou lava taga o siva, ma “o le mea lena e tulaga ese ai ma patino ia te oe,” o lana tala lea.

O Taleni e Mafai ona Faamalosia

E lagona e Emo’onahe le latalata atili atu i le Atua a o ia tatalo, faitau tusitusiga paia, ma taumafai e mulimuli ia Iesu Keriso. E lagona foi e ia le latalata atili atu i le Atua a o ia taumafai e faaleleia ana taleni. “Pe a ou pikiina a’u mamaofe ma siva, e mafai ona ou lagonaina le fiafia.” Ua ia fautuaina mai: “Saili mea e te fiafia i ai ma saili ni tagata lelei o le a fesoasoani ia te oe ina ia mafai ona e faaaogaina au taleni e faamalosia ai oe lava ma isi. O le auauna atu i isi e mafai ona fesoasoani ia te oe e faamalosia ai foi lau molimau ia Iesu Keriso.”

Siva Aialani ma Jax

Sa matuai popole lava Jax i le faatinoina o lana taleni, o le siva Aialani, i le faaaliga eseese a le FSY. “Sa matuai o’u fefe lava. E pei o loo ou i ai i-se-lua-o-gata matuai fefe,” o lana tala lea. “Sa ou faia sina tatalo laitiiti ae ou te lei tu i luga iina. Sa ou fefe pea, ae na ola mai loa le musika. Sa ou faafoliga e leai se tasi na i ai iina. Ma sa amata ona ou sivasiva.”

Sa osooso Jax ma minoi solo ona vae i sitaili masani a Aialani. Ae o le vaaia o foliga fiafia o Jax, o le toatele o tagata atonu o le a le mateia o se faigamalaga faigata ina ia oo atu ai iina.

Atiina Ae o se Taleni e Fesoasoani e Pulea ai le Atuatuvale

“I le 2020 sa matuai ou popole lava ma na oo lava i le mafaufau e pule i le ola,” o le tala lea a Jax. “Sa ou i ai i se falemai o le soifua maloloina faalemafaufau mo se masina. Sa ou iloa ai sa i ai ni fulafula i lo’u faiai ma iloa ai sa i ai se faaletonu i lo’u mafaufau. Sa matuai faigata lava.”

O le taimi lava na maua ai e Jax ni togafitiga mo lona soifua maloloina faalemafaufau, sa uunaia o ia e lona tina e sue se gaoioiga faaletino e fesoasoani e taulima ai lona atuatuvale. Sa tonu ia te ia e saili faaaliga faaletagata lava ia e uiga i le mea e mafai ona ia faia.

“Sa ou tatalo e uiga i ai ma ole atu mo se fesoasoani,” o lana tala lea. ”Ma sa ou manatuaina sa aoaoina e le uso o lo’u tina le siva a Aialani. O lea sa ou amataina ai loa le vasega ao lei oo i le matou faaaliga tele o le Kerisimasi. Sa tatau ona ou aoaoina ni siva se lima i totonu o le lua vaiaso, o se mea malie lena,” o le tala ula lea a Jax. E lei umi, ae avea le siva a Aialani ma se faamanuiaga tele i lona olaga. “Sa fesoasoani tele i ou tulaga o le atuatuvale ma lagona pogisa,” o lana tala lea.

Faasoaina Atu o Lana Taleni

I le FSY, sa fesili atu ai le vaega a Jax ia te ia pe i ai sana taleni e mafai ona ia faasoa atu i le faaaliga eseese. O lea sa siva ai o ia i luga o le auala savali mo i latou. Ina ua latou tau atu ia te ia e tatau ona ia faatinoina, o le manatu muamua lava o Jax o le, “Oi, leai.” Ae sa tonu ia te ia e faasoa atu lana taleni e ui ina sa fefe o ia.

O lea la ua vaai Jax i vitio o ia lava o loo faafiafia i le FSY, e le mafai ona taofia lana āta. “Sa leai ma se ataata o ou foliga i le vaega muamua,” o lana tala lea. “Ona amata lea ona tapuai leotetele tagata, ma sa amata ona ou ataata.”

Mo le autalavou o loo tauivi, ua tuuina mai e Jax le fautuaga lenei: “E sili atu le talanoa e uiga i ai ma se tasi nai lo le nanaina e pei ona sa ou faia. E silafia e le Alii oe, ma o le a i ai o Ia iina mo oe. E finagalo le Alii e fesoasoani ia te oe.”

I le aotelega, e lagona e Jax o le aoaoina o le siva Aialani o se faamanuiaga mai le Tama Faalelagi.

E Tulagaese Oe

E te le iloa lava—a o e liliu atu i le Alii, atonu o le a musuia foi oe e atiina ae se taleni fou.

E pei lava o Emo’onahe ma Jax, e mafai e le Agaga Paia ona fesoasoani ia te oe ia iloa taleni. A o e atiina ae nei taleni ma faasoa atu, e mafai ona e maua le fesoasoani a o e taumafai ia avea atili e faapei o le Faaola.

O a taleni e mafai ona e atiina ae ma faasoa atu?

“Aua nei faatagaina le fefe i le toilalo e faalotovaivaia ai oe. Aua nei faatagaina le leo o le au faitio e taofiofia oe—pe sau lena leo mai fafo po o totonu. … O le tele o lou faatuatuaina ma le faalagolago i le Agaga, o le tele foi lea o lou gafatia e fatufatu. … A outou faaaogaina avanoa masani o o outou olaga i aso taitasi, ma fatufatu se mea matagofie ma aoga, e le gata ina ua outou faaleleia le lalolagi i fafo ae faapea foi le lalolagi o i totonu o outou.”

O Peresitene Dieter F. Uchtdorf, i le taimi a o avea ma Fesoasoani Lua i le Au Peresitene Sili, “Fiafia, O Lou Tofi,” konafesi aoao Oke. 2008 (Ensign po o le Liahona, Nov 2008, 119).

Afai o oe po o se e pele o loo tauivi ma mafaufauga o le pule i le ola, po o lagona ogaoga o le popolevale po o le atuatuvale, saili vave se fesoasoani mai se tagata matua faatuatuaina.