2023
Lagonaina o le Atuatuvale, Popole, po o le Faanoanoa?
Setema 2023

“Lagonaina o le Atuatuvale, Popole, po o le Faanoanoa?,” Mo le Malosi o le Autalavou, Sete. 2023.

Fesoasoanio le Olaga

Lagonaina o le Atuatuvale, Popole, po o le Faanoanoa?

Saunia e Jessica Zoey Strong

Mekasini a le Ekalesia

O nisi nei o mea e mafai ona e faia i ai.

fua faatatau e lanu eseese ma foliga vaaia

O Le Suega mo le Atuatuvale

E faapeī le faanoanoa po o le atuatuvale o loo e lagonaina?

Afai o loo e lagonaina le leai o se faamoemoe, le mautonu, po o le popole mo se taimi umi po o se popole vale, faamolemole saili le fesoasoani e ala i le talanoa atu i se tagata matua faatuatuaina. E mafai foi ona e faataitaia ni nai fautuaga i le vaega lanu samasama (aemaise lava o mea faavae!), ae o nisi taimi atonu e te manaomia nisi fesoasoani, ma e le afaina lena mea.

Afai o loo e lagonaina le fia pule i le ola, ia vave maua se fesoasoani. Faafesootai la outou laina fesoasoani mo faalavelave faafuasei i le lotoifale, matagaluega o leoleo, po o le falemai.

O se mea masani le popolevale, faanoanoa, po o le atuatuvale i nisi taimi. O nei lagona e masani ona faaosofia i tulaga o le olaga ma e oo mai ma o ese atu a o suia le olaga. Faataitai ni nai fautuaga e mafai ona fesoasoani ai!

O Mea Faavae

  • Liliu atu i le Tama Faalelagi. E faafofoga ma tali mai o Ia i au tatalo. O le a Ia fesoasoani ia te oe e feagai ma luitau e oo mai i lou ala.

  • Taulai ia Iesu Keriso. “O le olioli tatou te lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.”1

  • Auauna atu i isi. “A tatou tuuina atu i tatou lava i le auauna atu i isi, tatou te iloa ai o tatou lava olaga ma lo tatou lava fiafia.”2

  • Ia tausisia le soifua maloloina o lou agaga. Faitau tusitusiga paia i aso taitasi, auai i le malumalu pe a mafai, ai ma inu i le faamanatuga, tausi au feagaiga, ma salamo i aso taitasi. Talosaga atu mo faamanuiaga o le perisitua pe a e manaomia.

  • Ia tausisia le maloloina o lou tino. Ia lava le moe ma le faamalositino, ma usitai i le Upu o le Poto.

Afai O Loo E Lagonaina le Popole

  • Taulai atu i le taimi nei. E le fesoasoani le popole e uiga i le lumanai po o le atuatuvale e uiga i le taimi ua tuanai. O le taimi nei ua na o le pau lea o le mea e mafai ona e suia moni lava.

  • Faaavanoa se taimi e malolo ai. “Ona e lē tatau i se tagata ona momoʼe televave atu nai lo le malosi ua ia te ia” (Mosaea 4:27).

  • Ia mafaufau i mea lelei. O lagona le lelei e mafai ona mafua mai i mafaufauga le lelei. O le mafaufau lelei e mafai ona fesoasoani ia te oe e lagona ai le faaitiitia o le fefe po o le popole.

Afai O E Lagona le Faanoanoa

  • Ia iloa o tofotofoga o se vaega o le fuafuaga. O le feagai ai ma tulaga faigata e le tatau lava ona faapea ai o loo e faia se mea sese. Ia talitonu o le a faamalosia oe e le Tama Faalelagi ma o le a galulue faatasi ou luitau mo lou lelei (Mataupu Faavae ma Feagaiga 90:24; tagai foi Roma 8:28; Mataupu Faavae ma Feagaiga 122:5–9).

  • Taulai atu i le loto faafetai. Tusi i lalo mea e te faafetai ai mo aso taitasi, ma ia mautinoa e faafetai atu i le Tama Faalelagi (tagai Mataupu Faavae ma Feagaiga 98:1).

  • Fai mea e te fiafia i ai. Faaalu se taimi ma uo ma aiga, taumafai se mea fou e fiafia i ai, faalogologo i musika faagaeetia, pe fuafua se gaoioiga malie.

Afai E Te Le Lagonaina Ua Lava Lou Lelei

  • Ia iloa e le manaomia ona e atoatoa. “O iinei i le olaga nei o le atoatoa o loo ‘faatalitali’ pea.”3 Aua e te faatusatusaina oe lava i isi, i le olaga moni po o luga o ala o faasalalauga faaagafesootai.

  • Talanoa agalelei ia te oe lava ia. Ia e agalelei ia te oe lava, e pei ona e i ai i se uo. O le a talanoa atu foi le Agaga Paia ia te oe ma le agalelei ma o le a le faatauemu lava pe ta’ufaatauvaaina oe.

  • Ia iloa e faaatoa e le Faaola le eseesega. Na maliu Iesu Keriso mo a tatou agasala ma tauave i Ona lava luga o tatou tiga, ma’i, ma vaivaiga (tagai Alema 7:11–12). Afai tatou te lotomaualalo, ua Ia folafola mai e “faia mea vaivai ia avea ma mea malolosi” (Eteru 12:27). Atonu e le lava lo tatou lelei na o i tatou, ae e mafai ona lava lo tatou lelei faatasi ma Ia.

Faaiuga

Atonu o le a tele ni aso o le a e lagona ai le to’a ma le saunia e faafetaiaia luitau o le olaga. Po o le a lava le lelei o ou lagona, ia mautinoa o loo e faia pea mea faavae.

Tatalo i le Tama Faalelagi—e tusa lava pe faigofie le olaga. Taulai atu i mea ua faia e le Faaola mo oe ma Lona soifuaga ma aoaoga—e tusa lava pe o lelei mea uma. Ma a e oo i ni lagona faigata, o le a e saunia lelei e taulimaina i latou.