“O Perofeta o loo Mulimuli i Perofeta,” Mo Le Malosi o le Autalavou, Sete. 2023.
Sauniuni mo le Konafesi Aoao
O Perofeta o loo Mulimuli i Perofeta
E mafai e soo se tasi ona maua faamanuiaga e ala i le mulimuli i le perofeta—e oo lava i Aposetolo.
E faaauau pea ona talosagaina i tatou e mulimuli i le perofeta. Ae atonu e taumanatunatu nisi pe aisea e taua tele ai le mulimuli i le perofeta.
I le konafesi aoao ia Aperila 2017, sa talosagaina ai e Peresitene Thomas S. Monson, le perofeta i lena taimi ia tagata o le Ekalesia e suesue, ae le na o le faitau, le Tusi a Mamona i aso taitasi. Sa mulimuli uma Peresitene Russell M. Nelson ma Peresitene Henry B. Eyring i le fautuaga a le perofeta ma sa saunoa e uiga i le mea na tupu.
O Se Aposetolo Usiusitai
Na saunoa Peresitene Nelson: “Sa ou taumafai lava e mulimuli i le fautuaga [a Peresitene Monson]. Faatasi ai ma isi mea, ua ou faia ni lisi o mea e uiga i le Tusi a Mamona, o mea na te faamautuina, o mea na te faamaoniaina le sese, o mea na te faataunuuina, o mea na te faamaninoina, ma mea na te faaalia mai. O le vaavaai atu i le Tusi a Mamona e ala i nei tioata o se faatinoga malamalama ma musuia!”1
Sa faaauau ona faamalamalama mai e Peresitene Nelson e faapea, sa ia fesili atu i isi i ni fesili talitutusa ma iloa ai ua tele naua olaga ua ootia i le mulimuli i le fautuaga a Peresitene Monson. E taiala i tatou uma e le Alii e ala i lo tatou perofeta, tusitusiga paia, ma faaaliga faaletagata lava ia.
O se Aposetolo Faatuatua
Sa saunoa mai Peresitene Eyring: “Ua ou faitauina le Tusi a Mamona i aso uma mo le silia ma le 50 tausaga. E masalo la e mafai ona ou manatu o upu a Peresitene Monson e faatatau i se isi tagata. Ae, e pei o le toatele o outou, sa ou lagonaina le faamalosiauga a le perofeta ma o lana folafolaga ua valaaulia ai a’u e fai se taumafaiga sili atu.”
Sa faaauau le saunoaga a Peresitene Eyring: “O le usitai i le fautuaga a Peresitene Monson ua maua ai isi aafiaga matagofie e lua mo a’u: Muamua, o le Agaga na ia folafola mai ua maua ai se lagona o le a lelei mea uma i mea o loo i luma atu, e tusa lava pe foliga mai ua faateleina le vāvāō i le lalolagi. Ma le, lona lua, ua tuuina mai e le Alii ia te a’u—ma oe—se lagona sili atu o Lona alofa mo i latou o mafatia.”2
Tagata Uma
E mafai ma e tatau i tagata uma ona mulimuli i le fautuaga a le perofeta mai le konafesi aoao. Po o fea lava o e i ai i lau malaga faaleagaga, e mafai lava ona e alualu i luma, pe o oe o se Aposetolo, o se tagata fou faatoa liliu mai, pe o soo se mea i le va. E le faaitiitia ai lo tatou manaomia o faaaliga faaletagata lava ia; o le isi lea auala e mafai ai e le Atua ona faamanuia i tatou. Afai e oo lava i Aposetolo e mafai ona maua faamanuiaga faaopoopo i lenei auala, e mautinoa lava e mafai foi e i tatou uma.