“O Auala e 4 e Faamalosia ai Lou Aiga,” Mo Le Malosi o le Autalavou, Oke. 2023.
O Auala e 4 e Faamalosia ai Lou Aiga
E mafai ona e faamalosia lou aiga ia avea ma mea e sili ona lelei e mafai ona i ai e ala i le ola ai i le talalelei a Iesu Keriso.
Po o le a lava le malosi o lou aiga, e mafai lava ona faaaogaina sina malosi teisi atu. O nei aso, e foliga mai o osofaiga i le aiga o le a faaauau pea ona oo mai. Ua mafua lena mea ona ua iloa e Satani e taua aiga i le fuafuaga a le Tama Faalelagi. Afai e i ai se mea e mafai ona faia e le fili e faalavelave ai i le olaga faaleaiga, e mautinoa lava na te taumafai.
E ui lava e leai se aiga e atoatoa, ae i lou aiga o loo iai se mea e tasi o loo agai mo lena atoatoa e leai se isi aiga o loo i ai: O oe! Ma ua ia te oe le talalelei a Iesu Keriso i ou autafa. Ua a’oa’o mai Perofeta ma aposetolo, “E mafai ona maua le fiafia i le olaga faaleaiga pe a faavae i aoaoga a le Alii o Iesu Keriso.”1
O nisi nei o auala e mafai ai e le talalelei a le Alii ona faamalosia ma aumaia ai le fiafia i lou aiga:
-
E mafai ona faamauina aiga mo le faavavau atoa.
-
E mafai e aiga ona fiafia e faaalu faatasi le taimi, tuuina atu le auaunaga i le tasi ma le isi, ma aafia ai i le avea ai ma ni ō ma se lagona o le faasinomaga paia.
-
E mafai e aiga ona faalagolago i le mana o Iesu Keriso e foia ai feeseeseaiga, finauga, ma luitau e ala i le salamo, faamagaloga, ma le faatuatua.
O auala nei e fa e mafai ona e faamalosia ai lou aiga e ala i le ola ai i le talalelei:
Ata na tusia e Lai T. Sheng
1 Uunaia le Tatalo
E faamalosia atili aiga pe a latou tatalo faatasi. O le tatalo e mafai ona faamanuiaina ai lou aiga i le filemu, alofa, ma le lotogatasi. Afai o le tatalo e le o se masani i lou aiga, tatalo ia iloa pe mafai faapefea ona e fesoasoani i lou aiga e tatalo faatasi. Ia saunia e faatino tali e te maua.
2 O Faatasi i le Lotu
I le lotu tatou te aoao ai e uiga i le talalelei a Iesu Keriso. Tatou te aai ma fetagofi foi i le faamanatuga ma osifeagaiga ma le Atua ua tatou naunau e tauave i o tatou luga le suafa o Iesu Keriso ma manatua pea o Ia (tagai Mosaea 18:8–10; Mataupu Faavae ma Feagaiga 20:77, 79).
O le auai faatasi i le lotu o se aiga e fesoasoani e faalatalata atili atu ai tagata uma i le Atua ma le tasi ma le isi. E manaomia ai le tuuto e alu i vaiaso taitasi, ae o le a faamanuiaina e le Atua au taumafaiga. Afai e filifili lou aiga e le auai faatasi ma oe i le lotu, faamolemole ia iloa o lou auai o le a faamalosia ai oe ma fesoasoani ia te oe e maua ai isi auala e te faamalosia ai lou aiga.
3 Alofa ma Auauna Atu
Sa a’oa’o mai le Faaola, “Ia outou fealofani; pei ona ou alofa atu ia te outou” (Ioane 15:12). Ta’u atu i lou aiga le tele o lou alofa ia i latou—e tusa lava pe e te mautinoa ua uma ona latou iloa. O le faailoa atu o lou alofa mo lou aiga e ala i upu ma faatinoga e valaaulia ai le Agaga i totonu o lou aiga.
O le auauna atu i tagata o le aiga o se auala taua lea e faaali atu ai lou alofa. Ma o le auauna atu faatasi i isi e aumaia ai foi lou aiga ia latalata atili atu i le tasi ma le isi ma i le Tama Faalelagi. E te le tau faatulagaina se galuega auauna atu e telē. O le auauna atu e mafai ona faigofie, e pei o le saunia o se taumafataga e sili ona fiafia i ai mo se tuaoi. O le auauna atu faatasi o se aiga e aumaia ai le fiafia e pei ona tatou faitau i ai i tusitusiga paia, “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).
4 Ola i le Talalelei
E toatele aiga e i ai tagata e le o ni tagata o le Ekalesia po o e ua filifili e le toe o i le lotu. A aunoa ma le lagolago a le aiga, e mafai ona faigata ona auai i le lotu. Afai o loo i ai lou aiga i se tulaga talitutusa faapena, ia manatua e mafai lava ona avea oe ma malosiaga mo le lelei e ala i le ola ai i le talalelei.
Ia vaai mai lou aiga o loo e ola i mea e te talitonu i ai. E te le iloa lava pe o latou vaai i mea e te tautala atu ai ma faia. O lenei mea o le a aumaia ai le malamalama o le talalelei i lou aiga. Po o le a lava le tulaga o lou aiga, o au taumafaiga faifai pea e ola i le talalelei e mafai ona tatalaina ai le faitotoa mo le Agaga e taiala, faatosina, ma siitia lou aiga ma fesoasoani ia i latou ia latalata atili atu i le Faaola, o Iesu Keriso.