Mai Tusi i Faasalalauga Tuusa’o

Saunia e David A. Edwards

Mekasini a le Ekalesia

O fesootaiga mai taitai o le Ekalesia ua oo mai i se auala umi, ae o faamoemoega e tumau pea.

Ata

O Paulo o loo tusia se tusi

Toeitiiti atoa le 2,000 Tausaga Talu Ai

A o i ai o Ia i le lalolagi, sa faatulagaina e Iesu Keriso Lana Ekalesia. Ina ua mavae le toetu o le Faaola ma afio ae i le lagi, sa taitaia e Ana Aposetolo le Ekalesia i le pule, faaaliga, ma musumusuga na Ia tuuina atu ia i latou.

I na aso, e masani ona fesootai atu taitai o le Ekalesia i tagata o le Ekalesia i nofoaga eseese e ala i tusi.

O le Feagaiga Fou o loo i ai tusi na tusia e Paulo, Peteru, Ioane, Iakopo, ma Iuta. O nei tusi na tusia i lima, tiliva lima, kopiina i lima, ma faitauina leotele.

O nei taitai o le Ekalesia sa masani ona i ai ia lava faamoemoega e tasi i le tusiaina o nei tusi. Sa latou saili e:

Tuuina atu molimau ma aoao atu le talalelei a Iesu Keriso.
Uunaia, musuia, ma siitia.
Faamanatu atu poloaiga ma feagaiga.
Talanoaina luitau o i ai nei.
Lapatai atu e uiga i mea matautia.
Faasa’o soo se mea sese atonu na tolotolo atu i totonu o le Ekalesia.
Tuufaatasia le Ekalesia

Ata

Russell M. Nelson

O Le Asō

Pe a faavave i luma i le tusa ma le 2,000 tausaga ma o le a e vaaia ai le tele o mea ua suia, ae o nisi mea o loo tutusa lava.

Ua toefuatai mai e Iesu Keriso Lana Ekalesia i le lalolagi, ma ua toe i ai perofeta ma aposetolo e taitaia. Ae talu mai aso o tusi, ua siitia le tekinolosi o fesootaiga—mai le masini lomitusi i le leitio i le televise i le initoneti.

Ua mafai nei e taitai o le Ekalesia ona tuuina atu savali i se konafesi aoao mo le Ekalesia atoa i le taimi e tasi. E auina atu foi i luga o le satelite ma faasalalau tuusao atu i luga o le initoneti i le tele o gagana i le taimi e tasi. I totonu o ni nai aso, ua tuuina i luga o le initoneti upu tusitusia i le tele o gagana, ma ua auina atu se lomiga ua lolomiina i le lalolagi atoa.

A o e sauni mo le konafesi aoao o loo loma, atonu e te mafaufau e uiga i na tusi o le Feagaiga Fou. O taimi eseese na, ma o tekinolosi sa matuai eseese lava. Ae o savali o le konafesi e faataunuu ai faamoemoega taua lava e tasi. A o aafia ai oe i savali o le konafesi, atonu e te mafaufau pe faapefea ona latou:

Tuuina atu molimau ma aoao atu le talalelei a Iesu Keriso.
Uunaia, musuia, ma siitia.
Faamanatu atu poloaiga ma feagaiga.
Talanoaina luitau o i ai nei.
Lapatai atu e uiga i mea matautia.
Faasa’o soo se mea sese atonu na tolotolo atu i totonu o le Ekalesia.
Tuufaatasia le Ekalesia