Fesili ma Tali

“O le a se mea e mafai ona ou faia pe afai ou te lagona e pei ou te le o mauaina ni aafiaga faaleagaga?”

“Tatalo atu i le suafa o Iesu Keriso e uiga i ou atugaluga, ou popolega, ou vaivaiga—ioe, o faanaunauga tonu o lou loto. Ona e faalogo lea! … A o e toe faia lenei faagasologa … , o le a e ‘tuputupu ae i le mataupu faavae o faaaliga.’”

Peresitene Russell M. Nelson, “Faaaliga mo le Ekalesia, Faaaliga mo o Tatou Olaga,” konafesi aoao Ape. 2018 (Ensign po o le Liahona, Me 2018, 95).

Mafaufau Loloto, Tusitusi, ma Manatunatu

“I le faaiuga o le aso, ou te faaaluina se taimi e mafaufau loloto ai ma tusi i la’u api talaaga e uiga i aafiaga faaleagaga na ou maua i lena aso ma manatunatu i ai. A ou faia lenei mea, ou te lagona le filemu. E faamanatu mai ai foi ia te a’u e saili aafiaga faaleagaga i aso uma.”

Kianna G., 16, Zamboanga del Norte, Filipaina

Ole atu i le Atua

“O le faitauina pea lava pea o au tusitusiga paia ma tatalo i aso taitasi o se auala sili lea e faaali atu ai i le Atua e te manao ia maua ni aafiaga faaleagaga. Afai e te lagona e te le o mauaina ni aafiaga faaleagaga, ona ole atu lea ma le faamaoni i le Atua e fesoasoani ia te oe ia iloa. E alofa o Ia ia te oe ma o le a tali mai i au tatalo a o e saili e fai lau vaega.”

Elijah C., 15, Iuta, ISA

Ia Onosai

“Ia onosai. O ou aafiaga, e le o taimi uma o le a pei ai o aafiaga o isi.”

Isabella F., 16, São Paulo, Pasila

Ola i le Talalelei

“O le a tatou maua aafiaga faaleagaga e ala i le faitauina o tusitusiga paia, faalogo i upu a le perofeta, anapogi, tatalo, alu i le malumalu, ma auauna atu i isi. O nei mea e fesoasoani ia i tatou e faalatalata atili atu ai ia Keriso ma taliagofie atili ai uunaiga mai le Agaga Paia lea e aumaia ia i tatou le filemu.”

Nellie R., 16, Hidalgo, Mekisiko

Ia Gauai Atu.

“E tatau ona tatou manatua pea e gauai atu i uunaiga a le Agaga Paia. E mafai ona tatou mauaina e ala i mea laiti. E ui lava ina laiti i latou, e mafai ona oo atu o latou siuleo i le faavavau.”

Melissa A., 14, Paraíba, Pasila

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“E faapefea ona ou ‘faasusulu atu lo’u malamalama’ pe afai e le o a’u o se tagata e fegaegaleai ma isi?”

Auina mai lau tali ma lou ata ae le‘i oo i le aso 15 o Oketopa, 2023.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.