“Pe a O’o i se Tagata e Pele Tauiviga o le Soifua Maloloina o le Mafaufau.” Mo Le Malosi o le Autalavou, Sete. 2023.
Fesoasoanio le Olaga
Pe a O’o i se Tagata e Pele Tauiviga o le Soifua Maloloina o le Mafaufau
O manatu nei e lima e manatua pe a e manao e fesoasoani i se tasi o loo mafatia mai le atuatuvale, popolevale, po o isi luitau faalelagona.
Ata na tusia e Toby Newsome
E mafai ona faigata ona vaai atu i se uo po o se tagata o le aiga o aafia i le atuatuvale, popolevale, po o isi luitau o le soifua maloloina faalemafaufau. Atonu e te manao e fai se mea e fesoasoani ai ae e te le o mautinoa po o le a.
O nisi nei o manatu e manatua a o e mafaufau pe faapefea ona fesoasoani i se tasi o loo tauivi ma lo latou soifua maloloina faalemafaufau:
1. Ia aapa atu.
Afai o loo e mafaufau pe sili ona lelei le aapa atu pe aloese mai ai, o le tali o le: e mautinoa lava le aapa atu. O sootaga vavalalata faaagafesootai e fesoasoani tele i tagata o loo tauivi ma le soifua maloloina faalemafaufau. Fesootai ma i latou. Faatasi ma i latou. E mafai ona avea o se mea faigofie ma masani ai, ae ia aapa atu.
2. Aua le tuuina atu fautuaga sei vagana ua latou talosaga atu ia te oe.
Afai e lei talosaga atu se tasi mo lau fesoasoani, aua nei amata ona tuuina atu ia i latou se fautuaga. Seia oo ina talosagaina oe, ia taulai atu i le na o le faauo atu, agalelei, ma popole moni i ai.
3. Ia agamalu, lelei, ma agaalofa.
A talosaga atu se tagata mo lau fesoasoani, mulimuli i le faataitaiga a le Faaola. Tatalo i le Tama Faalelagi mo le musumusuga. Ia faagaeetia. Talanoa lemu atu ia i latou. Fai atu ni tala lelei. Faaali atu le malamalama ma le agaalofa. Faailoa atu ia i latou e te lagolagoina i latou ma o loo i ai iina mo i latou. Ia uunaia lemu i latou e saili atu mo se fesoasoani faapolofesa.
4. Ia onosai ma tumau ai.
O tagata o loo tauivi atonu o nisi taimi e le o tali atu i fafo pe talisapaia. Ae ia onosai. Pipii ia i latou. O le faaesea e matuai le lelei lava mo i latou. Aua le matua aluese mai ai pe afai latou te le o tali mai i le ala e te manao ai.
5.Tausia lelei foi oe lva ia
Ia mautinoa o loo e mauaina le olioli i lou olaga. Faaauau pea lau tatalo faaletagata lava ia ma le suesueina o tusitusiga paia. Auai i le malumalu. Fai nisi mea e te fiafia i ai. Aua nei faatagaina le atuatuvale po o le popole i le tulaga o se tasi e pele ia te oe e lofituina ai lou olaga. Aapa atu i isi mo le lagolagosua pe a e manaomiaina.