“E Mafai Ona Ou Nofo i totonu o Laina,” Mo le Malosi o le Autalavou, Sete. 2023.
Ou Te Mafaia Mea Uma ia Keriso
Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).
E Mafai Ona Ou Nofo i totonu o Laina
Talu mai lava le taimi na amata ai ona ou tamoe i miliga, o saʻu miti le talepeina o se matatiʻa o le aoga i le tamoega o le maila. Ma i le taufaaiuiuga o lenei vaitau sa ou tamoe ai i le maila i le lima minute lelei lava, ma talepeina ai le matatiʻa i le silia ma le tolu sekone.
Ae, o le aso na sosoo ai, na matou iloa ai e leʻi taulia laʻu maila. Sa faamalamalama mai e le au ofisa sa ou tu faatolu i totonu o le ala tamo’e, lea na faaleaogaina ai a’u mai le tuuga. Sa finau atu loʻu faiaoga na ala ona ou tu i fafo ona sa tulei aʻu e se isi tagata tamoe. Sa fai mai le taitai, “Atonu e le o ia sa sese na alai ona tulei ese o ia i fafo, ae o lona sese sa matua latalata lava i le laina.” Sa ou savali ese ma le lagona e pei o la’u mea na ausia ua aveesea faamalosi sese mai ia te a’u.
O le Aso Sa na sosoo ai i le vasega a Tamaitai Talavou, sa matou matamata ai i se vitio e faatusatusa ai le nonofo i totonu o laina i taaloga i le tausia o poloaiga.1 I le aluga o le lesona sa ou saofai ai iina, i le ita i le faamanatu e faapea sa ou toilalo.
O le aso na sosoo ai a o ou tamoe faataamilo i le ala tamoe, sa ou tilotilo ifo i lalo ma iloa ai o loo ou tamoe tonu i le pito i totonu o le laina. Ma o le tele lava o taimi, ou te tu ai i totonu, e pei lava ona sa fai mai ai le taitai. Sa vave ona ou le toe tamoe, ma faamaualalo. Sa faapea ona ou masani lelei i le mea sa ou tamoe ai ma ou le vaai ai i mea matautia o loo i ai.
O le mea e laki ai, sa tuuina mai ia te a’u se avanoa lona lua i ni nai vaiaso mulimuli ane. Sa ou taumamao ese mai le laina ogatotonu ma talepeina ai le matatia a le aoga, o le taimi lea a o ou i ai i totonu o tuaoi.
O lena aafiaga na ou mafaufau ai e uiga i le latalata i le laina sa ou tamoe ai i nisi o poloaiga. Ae ona o Iesu Keriso ma Lana Togiola, ua ou maua ai i taimi uma se isi avanoa pe a ou salamo.
A oo mai i poloaiga, e tatau ona tatou taumamao ese i tatou lava mai le laina ma faia le mea sili tatou te mafaia e tumau ai i totonu o tuaoi. Ae ou te faafetai pe a tatou faia ni mea sese, e faatagaina i tatou e le Faaola ia salamo ma toe taumafai.
Raygan P., Iuta, ISA