“Ako ʻa e Siasí: ʻOku ʻi ai ha Feituʻu maʻá e Tokotaha Kotoa Pē,” Ki Hono Fakamālohia ʻo e Toʻu Tupú, ʻOkatopa 2023.
Ako ʻa e Siasí: ʻOku ʻi ai ha Feituʻu maʻá e Tokotaha Kotoa Pē
ʻOku mahuʻinga ʻa e akó. ʻE tokoniʻi koe ʻe he ʻEikí—mo Hono Siasí—ke ke ako ʻa e meʻa kotoa pē te ke lavá.
Faitaaʻi ʻe ??
“Ko e hā ʻeku ngaahi palani hili ʻa e ako māʻolungá?”
“Ko e hā ʻoku ou fie fakahokó?”
“Ko hai ʻoku ou fie hangē ko iá?”
“ʻOku totonu nai ʻa e ʻunivēsití kiate au?”
Ko e ngaahi fehuʻi mahuʻinga ʻeni! Pea ʻe fakahoko ʻe he ngaahi talí ha liliu mahuʻinga mo tuʻuloa ʻi he kotoa hoʻo moʻuí. Ko e ʻuhinga ia ʻoku fie tokoni atu ai ʻa e ʻEikí—mo Hono Siasí—ke ke ako ʻa e meʻa kotoa pē te ke lavá.
Ko e hā ʻOku Mahuʻinga Fau ai ʻa e Akó?
ʻOku finangalo ʻa e Tamai Hēvaní ke ke ako maʻu pē. ʻOku ʻi ai ha ngaahi ʻuhinga fakatuʻasino mo fakalaumālie ke fekumi ai ki he ʻiló mo e akó. ʻOku akoʻi ʻe he folofolá “ko e nāunau ʻo e ʻOtuá ko e ʻatamai potó, pe, ko hono ʻai ʻe tahá, ko e maama mo e moʻoni” (Tokāteline mo e Ngaahi Fuakava 93:36). Ko e ʻiló mo e akó ko ha “konga ia hoʻo taumuʻa taʻengatá ke hoko ʻo hangē ange ko e Tamai Hēvaní.”1
Kuo akoʻi mai ʻe hotau palōfita ʻofeina ko Palesiteni Lāsolo M. Nalesoní, “ʻI he Siasí, ko hono maʻu ko ia ha tuʻunga fakaakó mo e maʻu ʻo e ʻiló ko ha fatongia fakalotu ia. ʻOku tau akoʻi hotau ʻatamaí koeʻuhí ke tau lava ʻi ha ʻaho ʻo fai ha tokoni mahuʻinga ki ha taha kehe.”2
ʻE Tokoniʻi Koe ʻe he ʻEikí
ʻOku maʻu ha ngaahi tāpuaki maʻongoʻonga ʻi he taimi ʻokú ke fakakau ai ʻa e ʻEikí ʻi hoʻo akó. Te Ne tokoniʻi koe ke ke ikunaʻi ʻa e ngaahi fakafeʻātungiá—mahalo te ke faingataʻaʻia ʻi he tokanga ki he akó, pe mahalo ʻoku faingataʻa ʻa e laukongá kiate koe. ʻI hoʻo tafoki ki he ʻEikí mo fakahoko hoʻo tafaʻakí, ʻe fakaivia ʻe he ʻEikí hoʻo ngaahi ngāué mo ʻoatu ha ngaahi faingamālie ʻoku ʻikai ke ke lava ʻo fakakaukau ki ai ʻi he taimí ni!
Tokoni mei he Siasi ʻo e ʻEikí
Tatau ai pē pe ko e fē feituʻu ʻokú ke nofo aí, ʻoku ʻi ai ha ngaahi faingamālie fakaako ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku fakafou mai ʻi he Potungāue Ako ʻa e Siasí (CES). ʻOku kau heni ʻa e seminelí, ʻa ia ʻokú ne ʻomi ha fakavaʻe fakalaumālie ki hoʻo akó lolotonga hoʻo kei ʻi he ako māʻolungá. Pea ʻoku kau ai ha ngaahi akoʻanga mo e ngaahi polokalama lahi ʻa e Siasí.
ʻOkú ke ʻiloʻi ʻa e ʻuhinga ʻoku ʻinivesi (fakahū) ai ʻe he Siasí ha ngaahi maʻuʻanga tokoni lahi ʻi he akó? Koeʻuhí ko e ʻofa ʻa e ʻEikí ʻiate kimoutolú. ʻOkú Ne finangalo ke ke ofi ange kiate Ia pea maʻu ha mālohi fakaeloto, fakaʻatamai, mo fakalaumālie. ʻOku fiemaʻu ʻe he kau taki ʻo e Siasí ʻa e meʻa tatau! ʻOku mau lotua kimoutolu mo hoʻomou lavameʻá. ʻOku mau līʻoa kiate kimoutolu mo hono tokoniʻi kimoutolu ke mou aʻusia homou tuʻunga malava fakalangí.
Ko e Ako ke Fetongi ʻa e Ilifiá ʻaki ʻa e Tuí
ʻE tokoniʻi fēfē nai koe ʻe he ʻEikí mo Hono Siasí ʻi ho hala fononga fakaakó? Naʻe ako ʻe ha talavou ʻe taha mei Palāsila te nau lava ʻo tokoni ʻi ha ngaahi founga fakaofo.
Naʻe ongo fakailifia ʻa e kolisí kia Samati: ʻOkú ne pehē, “Naʻe ʻikai ke u ongoʻi naʻe totonu ia kiate au. Ka naʻe poupouʻi au ʻe heʻeku tangataʻeikí ke u ʻahiʻahi ʻa e BYU–Pathway Worldwide. Naʻá ku ilifia pea ʻikai ke u tui te u lava, ka naʻá ku fakakaukau ke u hū ai.”
Naʻe ongoʻi loto-foʻi ʻa Samati ʻi he kamatá. ʻOkú ne pehē, “Naʻá ku ongoʻi naʻe teʻeki ke u lavaʻi ha meʻa. Naʻá ku fiemaʻu ha maama mo ha ʻamanaki lelei. Naʻe hoko ʻa e BYU–Pathway ko e ʻamanaki leleí ia kiate au.”
Naʻe kamata ke falala ʻa Samati kiate ia pea mo e Tamai Hēvaní. ʻOkú ne pehē, “Ko e lahi ange ʻeku ako ʻi he uike takitaha, ko e lelei ange ia ʻeku ongoʻí. Naʻe fakamanatu mai ʻe he kau faifekau tokoní mo e kau faiakó ʻa hoku ngaahi talēnití mo e ngaahi meʻa ʻoku ou malavá. Naʻe tokoniʻi au ʻe he ngaahi kalasi fakaofó mo e talanoa ʻa e kakai naʻa nau maʻu ʻa e ngaahi tāpuakí ke fakaava hoku lotó pea tuku ki he ʻEikí ke Ne liliu au ke u toe lelei ange.”
Naʻe mole ʻa e siva e ʻamanaki mo e manavasiʻi ʻa Samati ki he kahaʻú ʻi he foʻi lea foʻou kotoa pē. ʻOkú ne pehē, “ʻOku ou fie vahevahe ʻa e aʻusia ko ʻení mo e niʻihi ʻoku nau fehangahangai mo e manavasiʻi mo e hohaʻa tatau ne u ongoʻí. “ʻOku ʻi ai e ʻamanaki lelei ‘ia Sīsū Kalaisi. Te Ne lava ʻo tokoniʻi koe ʻi hoʻo akó. Naʻá ku fakahoko ʻa e ʻuluaki sitepú, pea he ʻikai ke u teitei fakaʻiseʻisa ai.”
ʻOku ʻi ai ha feituʻu maʻau ʻi ha faʻahinga hala fononga fakaako pē te ke fili. ʻOku finangalo ʻa e ʻEikí ke ke fakaʻaongaʻi hoʻo akó ke fakahoko ha meʻa makehe, pea te Ne tataki koe ʻi hoʻo fāifeinga ke ako ʻi he kotoa hoʻo moʻuí.
Ko e hā e Ngaahi Faingamālie ʻoku ʻAtaá?
Neongo ʻoku fakataumuʻa e ngaahi polokalama ako kotoa ʻa e Siasí ke ʻomi koe ke ke ofi ange kia Sīsū Kalaisi, ka ʻoku takitaha ʻi ai pē ʻa e meʻa pau ʻoku nofotaha ai. Ko e ngaahi meʻa ʻeni ke fili mei ai ʻoku lava ke maʻu ʻi he Potungāue Ako ʻa e Siasí:
-
Ko e ʻinisititiutí ko ha maʻuʻanga tokoni ia naʻe fakataumuʻa ki he potupotutatau fakalaumālie mo e fetuʻutaki fakasōsiale ʻa e kakai lalahi kei talavou ʻoku nau ako ʻi ha ngaahi ʻapiako ʻoku ʻikai ʻa e Siasí pe ʻikai ako.
-
ʻOku tokoniʻi ʻe he BYU–Pathway Worldwide ʻa e fānau ako ʻi ha ngaahi fonua ʻe 180 tupu, ʻi hono tokoniʻi kinautolu ke langaki ʻa e loto-falala fakaakó. ʻE lava ke maʻu ʻe he kau akó ha ako lelei mo maʻamaʻa ʻi ha feituʻu pē ʻoku nau nofo ai.
-
Ko e Brigham Young University (BYU) ʻi Polovo, ʻIutaá ʻoku faingataʻa fakaʻekatēmika, ʻi he filifili e ngaahi fiemaʻu ki he hū ki aí mo e ngaahi polokalama mataʻitohi pau.
-
Ko BYU–Hawaii ʻoku ʻi ai ha kau ako mei he ngaahi fonua ʻe 70 tupu, ʻo tokanga taha ki ʻĒsia mo e Pasifikí.
-
ʻOku fakamamafaʻi ʻe BYU–Idaho ʻa hono tokoniʻi e kau ako BA mo ha kau ngāue ʻoku nofotaha ʻi he faiakó.
-
ʻOku ʻomi ʻe he Ensign College ʻi Sōleki Siti, ʻIutaá, ha ngaahi lēsoni mohu fakakaukau, langaki e tuí, mo ngāue ʻa ia ʻoku fakataumuʻa ke tokoniʻi e kau ako ʻi he ʻēlia lalahi ange ʻo ʻIutaá ke maʻu haʻanau ngāue.