“Maʻu ʻa e Laumālié ko Ho Fai Fakahinohino,” Ki Hono Fakamālohia ʻo e Toʻu Tupú, ʻOkatopa 2023.
Lea Fakaʻosí
Maʻu ʻa e Laumālié ko Ho Fai Fakahinohino
Naʻe ʻafioʻi ʻe heʻetau Tamai Hēvaní te tau fehangahangai ʻi he moʻui fakamatelié mo ha ngaahi faingataʻa, mamahi, mo e moveuveu; naʻá Ne ʻafioʻi te tau fefaʻuhi mo e ngaahi fehuʻi, ngaahi taʻe-fiemālie, ngaahi ʻahiʻahi, mo e ngaahi vaivaí. Naʻá Ne foaki mai ʻa e Laumālie Māʻoniʻoní, ke tau maʻu mei ai ha mālohi fakamatelie mo ha tataki fakalangi.
Ko e fatongia fakalangi ʻo e Laumālié, ke tākiekina, fakamoʻoniʻi, akoʻi, mo ueʻi kitautolu ke tau ʻaʻeva ʻi he maama ʻa e ʻEikí. ʻOku tau maʻu ʻa e fatongia toputapu ke ako ke fakatokangaʻi Hono ivi tākiekiná ʻi heʻetau moʻuí pea ʻai ha tali ki ai.
ʻOku anga fēfē hono fai iá?
ʻUluakí, ʻoku tau feinga ke moʻui taau mo e Laumālié.
Uá, kuo pau ke tau loto fiemālie ke maʻu ʻa e Laumālié.
Tolú, kuo pau ke tau ʻiloʻi ʻa e Laumālié ʻi he taimi ʻe hoko mai aí.
Faá, kuo pau ke tau ngāueʻi ʻa e fuofua ueʻí.
ʻOfa ke tau tali fakamātoato ʻa e ui ʻa e ʻEikí ke “mou fiefia, he te u tataki atu ʻa kimoutolu” (Tokāteline mo e Ngaahi Fuakava 78:18). ʻOkú Ne tataki kitautolu ʻaki ʻa e Laumālie Māʻoniʻoní. ʻOfa ke tau moʻui ʻo ofi ki he Laumālié, ʻo ngāue ʻo fakatatau ki heʻetau ʻuluaki ueʻí, mo ʻiloʻi ʻoku nau haʻu mei he ʻOtuá. ʻOku ou fakamoʻoni ki he mālohi ʻo e Laumālie Māʻoniʻoní ke ne tataki, maluʻi, pea ʻiate kitautolu maʻu ai pē.